سۋرەت: instagram.com/mfa_kz
ساپار بارىسىندا مۇرات نۇرتىلەۋدى پاكىستان پرەزيدەنتى اسيف الي زارداري قابىلداپ, تاراپتار ەكىجاقتى ىنتىماقتاستىقتىڭ قازىرگى احۋالى مەن دامۋ بولاشاعىن تالقىلادى. سۇحبات بارىسىندا ا.زارداري كەيىنگى جىلدارى ورناعان سەنىمدى ساياسي ديالوگتى جوعارى باعالاپ, ستراتەگيالىق سالالارداعى كووپەراتسيانى تەرەڭدەتۋگە مۇددەلىلىك ءبىلدىردى. ءوز كەزەگىندە قازاقستان ءسىم باسشىسى استانا تاراپىنان جان-جاقتى سەرىكتەستىكتى دامىتۋعا دايىن ەكەنىن راستاپ, بىرقاتار الەۋەتتى جوبالاردان حاباردار ەتتى.
– قازىرگى تاڭدا ەلدەرىمىز اراسىنداعى ساۋدا-ينۆەستيتسيالىق قاتىناستاردا وڭ ۇردىستەردى بايقاپ وتىرمىز. قازاقستان پاكىستانمەن ەكونوميكالىق ىنتىماقتاستىقتى ودان ءارى نىعايتۋعا مۇددەلى, – دەپ مالىمدەدى م.نۇرتىلەۋ.
بۇل تۇرعىدا تاراپتار كولىك-لوگيستيكالىق بايلانىستى دامىتۋدى, ەكىجاقتى ءبىلىم بەرۋ باستامالارىن قولداۋ ارقىلى ەكى ەلدىڭ جوعارى وقۋ ورىندارى اراسىنداعى اكادەميالىق ىنتىماقتاستىقتى نىعايتۋدى, مادەني-گۋمانيتارلىق قاتىناستاردى ودان ءارى ىلگەرىلەتۋگە ەرەكشە نازار اۋداردى.
مينيستر مۇرات نۇرتىلەۋ پاكىستان پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇحامماد يسحاق دارمەن دە كەلىسسوزدەر جۇرگىزدى. تاراپتار ساۋدا-ەكونوميكالىق, كولىك, لوگيستيكا, ەنەرگەتيكا, اۋىل شارۋاشىلىعى جانە IT سالالارىنداعى ءوزارا ءىس-قيمىل ماسەلەلەرىن سارالادى. سونداي-اق باسقوسۋدا الداعى جىلدارى تاۋار اينالىمىن 1 ملرد دوللارعا دەيىن جەتكىزۋ جونىندەگى ماقساتقا قول جەتكىزۋ ءۇشىن پراكتيكالىق شارالار قابىلداۋدىڭ ماڭىزىن اتاپ ءوتتى. سونىمەن قاتار كولىكتىك ءوزارا بايلانىسقا جانە ترانزيتتىك لوگيستيكانىڭ تيىمدىلىگىن ارتتىرۋعا ەرەكشە كوڭىل ءبولىندى.
– پاكىستان – وڭتۇستىك ازياداعى ۋاقىت سىنىنان وتكەن دوسىمىز ءارى ماڭىزدى سەرىكتەسىمىز. ەكى ەل اراسىندا جوعارى دەڭگەيدەگى بايلانىستاردى قوسا العاندا, مازمۇندى ساياسي ديالوگ جولعا قويىلعان, – دەدى م.نۇرتىلەۋ.
ال پاكىستاننىڭ سىرتقى ىستەر ءمينيسترى يسلامابادتىڭ استانامەن پراكتيكالىق بايلانىسىن كەڭەيتۋگە مۇددەلىلىگىن جەتكىزدى.
– ەلدەرىمىز ساۋدا-ەكونوميكالىق جانە گۋمانيتارلىق سالالارداعى ءوزارا ءىس-قيمىل ءۇشىن ايتارلىقتاي الەۋەتكە يە. ءبىز حالىقتارىمىزدىڭ تۇراقتى ءارى گۇلدەنگەن بولاشاعى ءۇشىن بىرلەسكەن كۇش-جىگەرگە جاڭا سەرپىن بەرۋ ءۇشىن جۇمىس ىستەۋگە دايىنبىز, – دەدى م.دار.
قوس ەل وڭىرلىك جانە جاھاندىق كۇن ءتارتىبى, ونىڭ ىشىندە بۇۇ, اوسشك, شىۇ, يىۇ شەڭبەرىندەگى ديالوگ, سونداي-اق ەكى مەملەكەتتىڭ حالىقارالىق باستامالارىن ىلگەرىلەتۋ كەزىندە ءوزارا قولداۋ كورسەتۋ ماسەلەلەرى بويىنشا «ساعاتتاردى تەڭەستىردى». كەزدەسۋ قورىتىندىسىندا 2025–2026 جىلدارعا ارنالعان قازاقستان مەن پاكىستان سىرتقى ىستەر مينيسترلىكتەرى اراسىنداعى بىرلەسكەن ءىس-قيمىل جوسپارىنا قول قويىلدى. بۇل قۇجات اياسىندا تاراپتار ساياسي ديالوگتى جالعاستىرۋعا, باسىم سەكتورلارداعى بىرلەسكەن جوبالاردى جانداندىرۋعا جانە بەيىندى مەملەكەتتىك ورگاندار اراسىندا ءتيىمدى ۇيلەستىرۋدى قامتاماسىز ەتۋگە ۋاعدالاستى.
سونداي-اق قازاق دەلەگاتسياسى پاكىستاننىڭ جەتەكشى كومپانيالارىمەن ىسكەرلىك كەزدەسۋلەر وتكىزدى. «Fauji Foundation» باسشىلىعىمەن وتكەن كەلىسسوزدەردە اۋىل شارۋاشىلىعى, مينەرالدى تىڭايتقىشتار ءوندىرىسى, ازىق-ت ۇلىك جانە بانك سەكتورى بويىنشا بىرلەسكەن جوبالاردى جۇزەگە اسىرۋ مۇمكىندىكتەرى قاراستىرىلدى. تاراپتار «Fauji Foundation» مەن «سامۇرىق-قازىنا» اق اراسىنداعى ىنتىماقتاستىقتى جانداندىرۋ جانە ونى كەزەڭ-كەزەڭىمەن جۇزەگە اسىرۋ جوسپارىن ازىرلەۋدە ءوزارا ساپارلار ۇيىمداستىرۋ جونىندە كەلىسىمگە كەلدى.
«National Logistics Corporation» كومپانياسى باسشىسىمەن كەزدەسۋدە لوگيستيكا سالاسىنداعى ىنتىماقتاستىقتى دامىتۋعا باعىتتالعان ناقتى شارالاردى ايقىندادى. قازاق دەلەگاتسياسى قازاقستان-پاكىستان كولىك-لوگيستيكالىق كونسورتسيۋمىن قۇرۋ باستاماسىن ۇسىندى.
«TCS Logistics» كومپانياسىنىڭ توراعاسىمەن جۇزدەسۋدە قازاقستاندا جۇزەگە اسىرىلاتىن اۋقىمدى ينفراقۇرىلىمدىق جوبالارعا قاتىسۋ مۇمكىندىگى قاراستىرىلدى. مينيستر مۇرات نۇرتىلەۋ پرەزيدەنت قاسىم-جومارت توقاەۆتىڭ تاپسىرماسى بويىنشا كولىك-لوگيستيكالىق ينفراقۇرىلىمدى دامىتۋ ستراتەگيالىق باسىمدىق رەتىندە ايقىندالعانىن اتاپ ءوتتى. نەگىزگى باستامالاردىڭ قاتارىندا ەۋرازيا مەن ورتالىق ازيا نارىقتارىن پاكىستانمەن بايلانىستىرىپ, پارسى شىعاناعى, افريكا جانە وڭتۇستىك شىعىس ازيا ەلدەرىنە شىعۋعا مۇمكىندىك بەرەتىن اۋعانستان ارقىلى وتەتىن تەمىرجول قۇرىلىسى بار.
ساپار قورىتىندىسىندا قازاق دەلەگاتسياسى پاكىستان تاراپىنا قىزىعۋشىلىعى ءۇشىن العىس ءبىلدىرىپ, تالقىلانعان باستامالاردى پراكتيكالىق تۇرعىدا ىسكە اسىرۋعا باعىتتالعان كونسترۋكتيۆتى ديالوگتى جالعاستىرۋعا دايىن ەكەنىن راستادى.
