«مەملەكەت باسشىسى تسيفرلىق قالىپقا كوشۋ ارقىلى ەكونوميكانىڭ بارلىق سالالارىن جاڭعىرتۋ مىندەتىن قويدى. سوندىقتان جي ەنگىزۋ ناقتى ناتيجەگە باعىتتالۋى ءتيىس», دەدى و.بەكتەنوۆ.
وتىرىس قورىتىندىسى بويىنشا بىرىڭعاي ۇلتتىق تسيفرلىق جۇيەنى قۇرۋعا باعىتتالعان بىرقاتار شەشىم قابىلداندى. ءتيىستى مەملەكەتتىك ورگاندارعا ناقتى تاپسىرمالار بەرىلدى. وسى جىلدىڭ 15 قاراشاسىنا دەيىن دەنساۋلىق ساقتاۋ سالاسىنىڭ باسىم باعىتتارىنا نقا-عا ءتيىستى وزگەرىستەر ەنگىزە وتىرىپ, وتاندىق ستارتاپتاردىڭ شەشىمدەرىن ەنگىزۋدى قامتاماسىز ەتۋ ءلازىم. سونداي-اق وسى جىلدىڭ 20 جەلتوقسانىنا دەيىن دەنساۋلىق ساقتاۋ سالاسىنداعى 7 ءارتۇرلى اقپاراتتىق جۇيەنى «Qaztech» بازاسىنداعى ينتەگراتسيالانعان 2 پلاتفورماعا بىرىكتىرۋ كەرەك.
سونىمەن قاتار وسى جىلدىڭ 1 جەلتوقسانىنان باستاپ ەلەكتر جانە جىلۋ جەلىلەرىن دياگنوستيكالاۋ ءۇشىن جاساندى ينتەللەكتى تەحنولوگيالارىن ەنگىزۋ قاجەت. بۇلارمەن بىرگە بيىل 20 جەلتوقسانعا دەيىن ەلدىڭ وتىن-ەنەرگەتيكالىق كەشەنىندە اقپاراتتىق قاۋىپسىزدىكتىڭ سالالىق ورتالىعىنىڭ جۇمىسىن قامتاماسىز ەتۋ تاپسىرىلدى.
الداعى ۋاقىتتا دەنساۋلىق ساقتاۋ سالاسىندا نقا-عا وزگەرىستەر ەنگىزۋ نەگىزىندە جي داميتىن بولادى. بۇل مەديتسينالىق مەكەمەلەرگە وتاندىق يننوۆاتسيالىق جوبالاردى ەنگىزۋگە سەبەپشى بولادى. ماسەلەن, دارىگەرلەرگە ارنالعان جي-اسسيستەنت, ونكولوگيالىق جانە تاعى دا باسقا اۋرۋلاردى ەرتە انىقتاۋ بويىنشا فۋنكتسيونال ىسكە قوسىلماق.
وسى جىلدىڭ سوڭىنا دەيىن 7 اقپاراتتىق جۇيە 2-گە بىرىكتىرىلەدى. وسىنداي جۇمىسپەن سالادا جۇمىس ىستەپ تۇرعان بارلىق 30 اج قامتىلادى. وسىلايشا, ءبىرىن-ءبىرى قايتالايتىن جۇيەلەر شوعىرلاندىرىلادى. بۇل شارا مەديتسينالىق پەرسونالدىڭ جۇمىسىن جەڭىلدەتىپ, جۇكتەمەسىن ازايتادى.
ەنەرگەتيكا سالاسىنا جاساندى ينتەللەكتى تەحنولوگيالارىن ەنگىزۋ, ەلەكتر جانە جىلۋ جەلىلەرىن دياگنوستيكالاۋ ءۇشىن درونداردى پايدالانۋ اقاۋلاردى ءدال انىقتاي وتىرىپ, وبەكتىلەردى قىسقا مەرزىمدە تولىق تەكسەرۋدى قامتاماسىز ەتۋگە مۇمكىندىك بەرەدى.
قالالىق ينفراقۇرىلىمدى تەكسەرۋ ءۇشىن قۇبىرلاردىڭ بويىمەن قوزعالۋعا قاجەتتى داتچيكتەرمەن جابىقتالعان ارنايى قۇرىلعىلاردى پايدالانۋ مەن ينفراقۇرىلىمنىڭ قازىرگى جاعدايىن ىشكى جاعىنان تەكسەرۋ جوسپارلانىپ جاتىر. بۇل شارالار مونيتورينگكە, ۋاقتىلى دەن قويۋعا, اقاۋلاردىڭ بىرىڭعاي بازاسىن جانە سىني دارەجەلەرگە بولىنگەن جوندەۋ جوسپارلارىن قالىپتاستىرۋعا باعىتتالعان. جاساندى ينتەللەكتىنى ەنگىزۋ ەڭبەك شىعىنىن ازايتادى, ەنەرگيامەن تۇراقتى جابدىقتاۋعا ءارى جىلىتۋ ماۋسىمىنىڭ ويداعىداي وتۋىنە ىقپال ەتەدى.
اقپاراتتىق قاۋىپسىزدىكتىڭ سالالىق ورتالىعىن قۇرۋ ەنەرگەتيكالىق جۇيەنىڭ كيبەرقاۋىپسىزدىك سالاسىنداعى شارالارىن كۇشەيتە تۇسەدى. ورتالىق ماماندارى سالانىڭ اقپاراتتىق قاۋىپسىزدىگىن قامتاماسىز ەتۋ ءۇشىن ونىڭ ەرەكشەلىگىن ەسكەرە وتىرىپ, ەنەرگەتيكالىق وبەكتىلەرگە قويىلاتىن جاڭا تالاپتاردى ازىرلەيدى.
