- مەملەكەت باسشىسى جولداۋىندا ينفراقۇرىلىمدى جاڭعىرتۋدىڭ باسىمدىعىن ەرەكشە اتاپ ءوتتى. بۇل باستاما ەلدىڭ ۇزاق مەرزىمدى دامۋىنا قالاي اسەر ەتەدى دەپ ويلايسىز؟
- پرەزيدەنت قاسىم-جومارت توقاەۆتىڭ تۇرعىن ءۇي-كوممۋنالدىق شارۋاشىلىقتى جاڭعىرتۋ تۇراقتى دامۋدىڭ نەگىزگى تىرەكتەرىنىڭ ءبىرى ەكەندىگىن ءادىل اتاپ ءوتۋى ورىندى. ينفراقۇرىلىمدى قارجىلاندىرۋ - بۇل تەك ەكونوميكالىق ءوسۋدىڭ عانا ەمەس, الەۋمەتتىك سالانىڭ دا ىرگەتاسى. بۇگىندە مەملەكەتتىك ساياسات وڭىرلەردىڭ قارجىلىق دەربەستىگىن ارتتىرۋعا, ولاردىڭ سالىق بازاسىن كەڭەيتۋگە جانە اعىمداعى ءارى ينۆەستيتسيالىق شىعىستاردى ساۋاتتى جوسپارلاۋعا باعىتتالعان.
ينفراقۇرىلىم دايىن بولعاندا, ينۆەستورعا جوبانى جۇزەگە اسىرۋ - زاۋىت نەمەسە باسقا وندىرىستىك نىسان سالۋ الدەقايدا جەڭىل بولادى. بۇل جەكەمەنشىك تۇرعىن ءۇي قۇرىلىسى ءۇشىن دە اسا وزەكتى: ازاماتتار جەر الادى, قۇرىلىس باستايدى, بىراق ەلەكتر, سۋ, گاز سياقتى نەگىزگى جاعدايلاردىڭ جوقتىعىنا تاپ بولادى. ينفراقۇرىلىمدىق باعدارلامالاردى جۇيەلى تۇردە ىسكە اسىرۋ بۇل پروتسەستەردى حالىق پەن بيزنەس ءۇشىن دە جىلدام ءارى جەڭىل ەتەدى.
- جولداۋدا سونداي-اق ينفراقۇرىلىمدىق جوبالاردى تسيفرلاندىرۋ جانە اشىقتىقتى ارتتىرۋعا ەرەكشە ءمان بەرىلدى. ءسىزدىڭ ويىڭىزشا, بۇل شارالار مەملەكەت, بيزنەس جانە وڭىرلەر اراسىنداعى ءوزارا ءىس-قيمىلدىڭ تيىمدىلىگىنە قانشالىقتى ىقپال ەتەدى؟
- مەملەكەت باسشىسى تسيفرلىق قۇرالداردىڭ تيىمدىلىكتى ارتتىرۋداعى ماڭىزىن ورىندى اتاپ ءوتتى. تسيفرلىق جۇيەلەر ارقىلى قاي جوبانىڭ قاشان, قاي جەردە ىسكە اساتىنىن الدىن الا كورۋگە بولادى.
بيزنەس ءۇشىن بۇل اسا ماڭىزدى: قاتىسۋ مۇمكىندىگىن الدىن الا جوسپارلاۋعا, بيزنەس-جوسپار ازىرلەۋگە, تاۋار مەن قىزمەتكە دەگەن سۇرانىستى 2–5 جىلعا دەيىن بولجاۋعا بولادى.
تسيفرلىق پلاتفورمالاردىڭ بولۋى دا كوپ دەڭگەيلى كەلىسىمدەردى قاجەت ەتپەيدى, پروتسەستەر الدەقايدا اشىق ءارى بولجامدى بولادى. بۇل ءوز كەزەگىندە بارلىق تاراپتاردىڭ رەسۋرستارىن ۇنەمدەۋگە جانە جەرگىلىكتى دەڭگەيدەگى باسقارۋ ساپاسىن ارتتىرۋعا مۇمكىندىك بەرەدى.
- پرەزيدەنت «اقىلدى قالالار» تۇجىرىمداماسىن دامىتۋ تۋرالى ايتتى. ءسىزدىڭ ويىڭىزشا, بۇل باعىت ازاماتتاردىڭ ءومىر ساپاسىن ارتتىرۋعا جانە ينۆەستيتسيا تارتۋعا قانداي ارتىقشىلىق بەرەدى؟
- پرەزيدەنت ۇسىنىپ وتىرعان «اقىلدى قالالار» تۇجىرىمداماسى قالالىق ورتانى جۇيەلى دامىتۋعا جاسالعان ماڭىزدى قادام. مۇندا ينجەنەرلىك جەلىلەردەن باستاپ الەۋمەتتىك نىساندارعا دەيىنگى بارلىق ينفراقۇرىلىم ەلەمەنتتەرى تسيفرلاندىرىلاتىن «تسيفرلىق ەگىزدەر» جاسالۋى كوزدەلگەن.
بيزنەس ءۇشىن بۇل تەحنيكالىق شارتتاردى الۋ پروتسەسىن جەڭىلدەتەدى, ينجەنەرلىك جۇيەلەرگە قوسىلۋ مەن جوبالاردى جۇزەگە اسىرۋدى جەدەلدەتەدى.
حالىق ءۇشىن بۇل وزەكتى اقپاراتقا قول جەتكىزۋ مۇمكىندىگى: قانداي نىساندار سالىنىپ جاتىر, قايسىسى ىسكە قوسىلادى, قاي جەردە قۇرىلىس جوسپارلانۋدا. مۇنىڭ ءبارى كەدەرگىلەردى ازايتادى, جوبالاردى ىسكە اسىرۋ مەرزىمدەرىن قىسقارتادى جانە قالالىق ورتانىڭ دامۋىن اناعۇرلىم اشىق ءارى بولجامدى ەتەدى. ينۆەستورلار ءۇشىن مۇنداي ءتاسىل ءوڭىردىڭ دايىندىق دەڭگەيىن, تاۋەكەلدەردىڭ ازدىعىن جانە قاجەتتى ينفراقۇرىلىمنىڭ بار ەكەنىن بىلدىرەدى.
- پرەزيدەنت مەملەكەت پەن بيزنەس اراسىنداعى ارىپتەستىكتى نىعايتۋدى دا ەرەكشە اتاپ ءوتتى. جەكە سەكتوردىڭ قاتىسۋى قانشالىقتى ماڭىزدى؟ بۇل حالىقتىڭ رەفورماعا دەگەن سەنىمىنە قالاي اسەر ەتەدى؟
- مەملەكەت باسشىسى جەكە سەكتورمەن سەرىكتەستىكتىڭ ماڭىزدىلىعىن ۇنەمى ايتىپ كەلەدى جانە ونىڭ بەلسەندى قاتىسۋىنا قولايلى ءارى اشىق جاعداي قالىپتاستىرۋدا. بۇرىن بيزنەس ءجيى بەلگىسىزدىككە تاپ بولاتىن: تاريف بەكىتىلە مە, بيۋدجەتتەن وتەماقى قاراستىرىلا ما, وسىنىڭ ءبارى ينۆەستيتسيالىق بەلسەندىلىكتى تەجەيتىن.
بۇگىندە ناقتى ەرەجەلەر بەكىتىلدى, قارجىلاندىرۋ كوزدەرى مەن ينۆەستيتسيالاردىڭ قايتارىمدىلىق تەتىكتەرى انىقتالدى. بۇل جەكە كومپانيالاردىڭ ينفراقۇرىلىمدىق جوبالارعا كىرۋىن ايتارلىقتاي جەڭىلدەتەدى.
بيزنەس ءۇشىن نەگىزگى فاكتور - جوبانىڭ ءوزىن-ءوزى اقتاۋى. كوممۋنالدىق ينفراقۇرىلىم تۇراقتى سۇرانىس پەن تابىستىلىقتى قامتاماسىز ەتەدى. ۇزاق مەرزىمدى قارجىلاندىرۋ مەن مەملەكەتتىك قولداۋ بولعان جاعدايدا ينۆەستورلار مۇنداي جوبالارعا قاتىسۋعا دايىن. بۇل رەفورمالارعا دەگەن سەنىمدى كۇشەيتىپ, ەلدىڭ الەۋمەتتىك-ەكونوميكالىق دامۋىن تۇراقتى ەتۋگە ىقپال ەتەدى.
