فوتو: اشىق دەرەككوز
ۇيىمداستىرۋشىلاردىڭ مالىمەتىنشە, ەلدەگى 15 اۋەجايدان شامامەن 15 مىڭ قىزمەتكەر نارازىلىققا قوسىلۋعا نيەتتى. ولاردىڭ قاتارىندا ەڭ ءىرى اۋەجايلار ينچحون مەن كيمپحو دا بار. ەرەۋىلدى اۋەجاي قىزمەتكەرلەرىنىڭ ۇلتتىق اليانسى قولعا الىپ وتىر. بۇل ۇيىمعا ينچحون اۋەجايىنىڭ ايماقتىق كاسىپوداعى مەن وزگە اۋەجايلاردىڭ جۇمىسشىلار بىرلەستىگى كىرەدى.
ولار ەڭبەك جاعدايىن جاقسارتۋ جانە جۇمىس كەستەسىن وزگەرتۋدى تالاپ ەتەدى. قازىرگى تاڭدا ينچحون اۋەجايىندا «3 بريگادا, 2 اۋىسىم» جۇيەسى قولدانىلادى. قىزمەتكەرلەردىڭ ايتۋىنشا, مۇنداي ءتارتىپ دەنساۋلىققا اسەر ەتەدى. كاسىپوداق «4 بريگادا, 2 اۋىسىم» جۇيەسىن ەنگىزۋدى جانە ەنشىلەس قۇرىلىمدارداعى قىزمەتكەرلەر ءۇشىن تەڭ ەڭبەك جاعدايىن قامتاماسىز ەتۋدى تالاپ ەتىپ وتىر.
«بيىلعى اي كۇنتىزبەسى بويىنشا جاڭا جىل كەزىندە ەرەۋىل بولماعاننىڭ وزىندە, اۋەجايلاردا رەيستەر 3-تەن 8 ساعاتقا دەيىن كەشىكتى. قازىر قىزمەتكەرلەردىڭ 60 پايىزدان استامى اكتسياعا قاتىساتىنىن راستادى. بۇل رەيستەردىڭ توقتاۋىنا دا اكەلۋى مۇمكىن», دەيدى اليانس وكىلدەرىنىڭ ءبىرى.
سوعان قاراماستان ينچحون اۋەجايىنىڭ اكىمشىلىگى جولاۋشىلاردى سابىرعا شاقىرىپ وتىر. ولار اۋە قاۋىپسىزدىگىنە جاۋاپتى نەگىزگى قىزمەتتەردىڭ «ومىرلىك ماڭىزى بار» ساناتقا كىرەتىنىن جانە ولاردىڭ جۇمىسى توقتامايتىنىن ەسكەرتتى.
«ەرەۋىل باستالعان كۇننىڭ وزىندە رەيستەردىڭ تولىقتاي توقتاۋىنا جول بەرىلمەيدى. ۇشۋلاردىڭ قاۋىپسىزدىگىنە جاۋاپ بەرەتىن قىزمەتتەردىڭ جۇمىسى قامتاماسىز ەتىلەدى», دەپ مالىمدەگەن اۋەجايدىڭ رەسمي وكىلى.
دەگەنمەن ساراپشىلار ساياحاتشىلارعا ساقتىق شارالارىن ەسكەرۋدى ۇسىنادى. كورەياعا 19 قىركۇيەكتەن باستاپ نەمەسە چحۋسوك مەرەكەسى كەزىندە جولعا شىعاتىن تۋريستەر اۆياكومپانيالاردان دەر كەزىندە اقپارات الىپ, قوسىمشا ۋاقىتتى الدىن الا جوسپارلاعانى ءجون.
