ءىرى كومپانيالاردىڭ جەتكىزۋشىسىنە اينالدى
«اۆرورا حولدينگ» ترانسفورماتورلىق قوسالقى ستانسالاردى, مايلى جانە قۇرعاق كۇشتىك ترانسفورماتورلاردى ۇسىنسا, «Avrora Electric» جشس قۇرعاق كۇشتىك ترانسفورماتورلار مەن ەلەكتر پەشتەرى ترانسفورماتورلارىن وندىرۋگە ماماندانعان. كومپانيا ەلەكتروتەحنيكالىق جابدىقتار, سونداي-اق جيىنتىق ترانسفورماتورلىق قوسالقى ستانسالار (كتپ) وندىرەدى. بلوكتى-ءمودۋلدى, تۇتاس مەتالدى, ىشكى قوندىرعىلاردى, كەرنەۋى 6, 10, 20 جانە 27,5 كۆ تاراتۋشى قۇرىلعىلاردى شىعارادى. بۇگىندە «ماڭعىستاۋمۇنايگاز» اق, «قازگەرمۇناي» بىرلەسكەن كاسىپورنى, باسقا دا ءىرى مۇناي-گاز كومپانيالارىنىڭ الەۋەتتى جەتكىزۋشىسى بولىپ وتىر.
جۇمىس تولىق اۆتوماتتاندىرىلماعان. شارۋانىڭ 80%-ى ءالى دە قول كۇشىمەن اتقارىلادى. ع. جەكسەمبينوۆ مۇنىڭ سەبەبىن تاپسىرىس كولەمىنىڭ بىركەلكى بولماۋىمەن ءتۇسىندىردى. ترانسفورماتورلاردىڭ ءبىرى كولەمى 6 شارشى مەتر بولسا, ەندى ءبىرى 0,5 م كولەمىندە دايىندالادى. سىرتقى قاڭقاسى – وتاندىق ءونىم, ال ىشكى ميكروچيپتەر قىتاي, رەسەي نەمەسە ەۋروپا ەلدەرىنەن جەتكىزىلەدى. بىراق ترانسفورماتورلاردىڭ قاسبەتتەرى ارنايى اۆتوماتتاندىرىلعان باعدارلاما بويىنشا كەسىلىپ, پىشىلەدى. سول سەبەپتى, مۇنداعى ۇدەرىس قالدىقسىز اتقارىلادى.
تاۋلىگىنە – 40 توننا
«ميكروچيپتەردى وزىمىزدە وندىرۋگە مۇمكىندىك بار. ول الداعى كۇننىڭ ەنشىسىندە», دەيدى ع.جەكسەمبينوۆ. 2009 جىلدان باستاپ حولدينگ مەديتسينالىق مەكەمەلەرگە ارنالعان دەزينفەكتسيالىق قۇرالدار مەن تاماق ىشۋگە ارنالعان ءوندىرىستى ىسكە قوستى. دەزينفەكتسيالىق قۇرالداردى مەديتسينالىق مەكەمەلەردىڭ بارلىق قىزمەتكەرى پايدالانادى, ولار وپەراتسيا جاساۋ الدىندا قولىن زارارسىزداندىراتىن حيرۋرگتەردەن باستاپ, ەدەن جۋعا ارنالعان ارنايى زاتتاردى سۋعا قوساتىن تازالاۋشىلارعا دەيىنگى تىزبەكتى قامتيدى. مۇندا تاۋلىگىنە 175 اتاۋدان تۇراتىن 40 توننا ءونىم وندىرىلەدى.
«جۋعا ارنالعان سۇيىق جانە گەل ءتارىزدى قۇرالداردىڭ جاڭا جەلىسىن ىسكە قوستىق. سونداي-اق بالالار ونىمدەرىنىڭ سەرياسىن ۇسىندىق. 2024 جىلدىڭ سوڭىندا اسسورتيمەنت ىدىس-اياققا ارنالعان گەلدەرمەن, بالالار ىدىستارىن جۋعا ارنالعان زاتتارمەن, سۇيىق سابىنمەن جانە شامپۋنمەن تولتىرىلدى», دەيدى «اۆرورا» وندىرىستىك كەشەنى جشس باس ديرەكتورى ماكسيم ياسكەل.
كومپانيانىڭ جەكە زەرتحاناسىندا ءونىم مۇقيات تەستىلەۋدەن وتەدى, ال تەحنولوگتەر تۇتىنۋشىلاردىڭ قاجەتتىلىكتەرىن ەسكەرە وتىرىپ, جاڭا رەتسەپتۋرالار ازىرلەيدى.
«2010 جىلداردىڭ ورتاسىنا دەيىن كوسمەتيكالىق ونىمدەر مەن تۇرمىستىق حيميانىڭ 90–95%-ى سىرتتان كەلەتىن. بۇل شامامەن العاندا 500–800 ملن دوللاردىڭ ءونىمى. جەرگىلىكتى وندىرۋشىلەر بار بولعانى 30–40 ملن ءونىمىن عانا ءوز كۇشىمەن شىعارىپ وتىردى. زارارسىزداندىرعىش زاتتاردى ءوندىرۋ نەگىزىندە تۇرمىستىق حيميانى دايىنداي باستادىق. بۇل – ىدىستاردى, اينەكتەردى, سانتەحنيكانى, اكريل ۆاننالارىن, سەبەزگى كابينالارىن جۋعا ارنالعان, اعىزۋ قۇبىرلارىن تازارتۋعا ارنالعان قۇرالدار. ءونىمنىڭ ەكولوگيالىق تازالىعىنا ەرەكشە نازار اۋدارىلادى, بۇل تۇرعىدا رەسمي سەرتيفيكاتتارىمىز بار», دەيدى ماكسيم ياسكەل.
جىلدىق قارجى اينالىمى – 3–4 ملرد تەڭگە
ءبىز تابان تىرەگەن ءۇشىنشى كومپانيا – «اۆرورا77» جشس كاسىپورنى. مۇندا بلوكتى-ءمودۋلدى عيماراتتار مەن مەتالل قۇرىلىمدارىنا ارنالعان تاۋارلار وندىرىلەدى. زاماناۋي جانە تەحنيكالىق جاعىنان جاراقتاندىرىلعان جەكە وندىرىستىك بازاسى بار. كومپانيا قىزمەتىنىڭ نەگىزگى باعىتتارى مىنالار:
- باقىلاۋ مۇنارالارىن قوسا العاندا, ونىڭ ىشىندە بروندى ورىنداۋداعى كۇش قۇرىلىمدارى مەن قاۋىپسىزدىك قىزمەتتەرى ءۇشىن مەتالل قۇرىلىمدارىن جوبالاۋ جانە ءوندىرۋ;
- تەلەكوممۋنيكاتسيالىق كومپانيالار ءۇشىن مەتالل كونسترۋكتسيالارىن دايىنداۋ: انتەننا-دىڭگەكتى قۇرىلىستار, تەحنولوگيالىق كونتەينەرلەر جانە بايلانىس اپپاراتۋراسىن ورنالاستىرۋعا ارنالعان وزگە دە جابدىقتار;
- ءتۇرلى سالالار ءۇشىن بلوكتى-ءمودۋلدى عيماراتتاردى جوبالاۋ جانە ءوندىرۋ;
- ونەركاسىپتىك جانە ازاماتتىق قۇرىلىس نىساندارى ءۇشىن مەتالل كونسترۋكتسيالارىن جاساۋ.
كومپانيا باسشىسى اليتەت احمەتوۆتىڭ ايتۋىنشا, كومپانيانىڭ ءبىر جىلدىق قارجى اينالىمى – 3-4 ملرد تەڭگە. ءونىم نەگىزىنەن ىشكى نارىققا باعدارلانعان.
«نارىقتىڭ وسى سەگمەنتىندە كادر اراسىنداعى بايلانىستىڭ ءۇزىلىپ قالماۋى ماڭىزدى. جاستار جاعى تەمىردى ينەدەي مايىستىراتىن قول جۇمىسىنا كەلە بەرمەيدى. سول ءۇشىن زەينەت جاسىنا تولسا دا تاجىريبەلى مامانداردىڭ جۇمىسىن جالعاستىرۋىنا مۇمكىندىك بەرەمىز», دەيدى اليتەت احمەتوۆ.
الماتى
