ۇدەمەلى زامانىمىزدا وقۋعا جانە دامۋعا قابىلەتتى بولۋ – كەز كەلگەن مامانعا قويىلاتىن باستى تالاپتاردىڭ ءبىرى. كومپانيالار قىزمەتكەرلەردىڭ كاسىبي دەڭگەيىنىڭ ءوسۋى بيزنەستىڭ تابىسىنا تىكەلەي اسەر ەتەتىنىن ءتۇسىنىپ, ءبىلىم بەرۋگە قاراجات بولۋگە ءجيى بەت بۇرۋدا. قىزمەتكەرلەر ءۇشىن بۇل – بىلىكتىلىكتى ارتتىرۋ, كاسىبي داعدىلاردى دامىتۋ جانە مانساپ قۇرۋ مۇمكىندىگى, ال كومپانيالار ءۇشىن – باسەكەگە قابىلەتتىلىكتى نىعايتۋدىڭ جولى.
«جومارت ەسەنعۇلوۆ – وسى باعدارلاماعا قاتىسۋشىلاردىڭ ءبىرى. ول ءوزىنىڭ ەڭبەك جولىن ماركشەيدەرلىك قىزمەتتە كەن جۇمىسشىسى رەتىندە باستادى. كومپانيا بەرگەن گرانتتىڭ ارقاسىندا ول ابىلقاس ساعىنوۆ اتىنداعى قاراعاندى تەحنيكالىق ۋنيۆەرسيتەتىنە وقۋعا ءتۇسىپ, بيىل «ماركشەيدەرلىك ءىس» ماماندىعى بويىنشا وقۋىن ءبىتىردى. جومارتتىڭ العان ءبىلىمى وعان تاۋ-كەن جۇمىستارىن جوسپارلاۋ بويىنشا جەتەكشى ينجەنەر لاۋازىمىن الۋعا مۇمكىندىك بەردى. «جۇمىس بەرۋشى بەرەتىن گرانتتار – جولدا جاتا بەرمەيتىن مۇمكىندىك. كومپانيانىڭ جۇمىسشىلارىنا بەرىپ وتىرعان وسىنداي مۇمكىندىكتەرىنە العىسىم شەكسىز», دەيدى ول.
تاعى ءبىر ايتپاي كەتۋگە بولمايتىن مىسالداردىڭ ءبىرى – ەردەن تايجانوۆ.
«جەر استى كەنىشىندە 12 جىل جۇمىس ىستەگەننەن كەيىن ول كەنىشكە ديسپەتچەر بولىپ ورنالاستى. سالالىق ءبىلىمى بولماعان ەردەن بۇل جاعدايدى وزگەرتۋگە بەل بۋدى. 37 جاسىندا ول ستەپنوگور تاۋ-كەن تەحنيكالىق كوللەدجىنە «پايدالى قازبالار كەن ورىندارىن جەر استى ادىسىمەن يگەرۋ» ماماندىعى بويىنشا وقۋعا ءتۇستى. وقۋىنىڭ اقىسىن تولىقتاي كومپانيا تولەپ بەردى. وقۋ بارىسىندا ەردەننىڭ قىزمەتى ءوسىپ, كەن قويماسىن باقىلاۋ شەبەرى لاۋازىمىنا تاعايىندالدى. «وتباسىم بار, ءۇش كىشكەنتاي قىزىم بار, مەن كومپانيانىڭ ءوزىنىڭ قىزمەتكەرلەرىنە جاساپ جاتقان يگى ىستەرىنە وتە ريزامىن. بىلىمىمە سالىنعان قاراجات كاسىبي ءبىلىمىمدى جەتىلدىرىپ, جاڭا ماقساتتارعا جەتۋگە كومەكتەسەدى دەپ سەنەمىن», دەيدى ول.
وسى ءبىر-ەكى بايان – ۇلكەن تاجىريبەنىڭ كىشكەنە بولىگى عانا. ماسەلەن, تاۋ-كەن بايىتۋ كەشەنىنىڭ ەكى قىزمەتكەرى ءبىلىم العاننان كەيىن ۋچاسكە باسشىلارى بولدى, ودان باسقا دا تالايى مانساپتىق جولىن جاقسارتتى.
مۇنداي قولداۋ قىزمەتكەرلەردىڭ وزدەرىنە عانا جاسالىپ قويماي, ولاردىڭ وتباسىلارىنا دا قولىن سوزادى. مۇنداي مۇمكىندىك قىزمەتكەرلەردىڭ بالالارىنا ساپالى ءبىلىم الۋعا جول اشىپ, ولاردىڭ كاسىبي دامۋىنا كەڭ ءورىس بەرەدى. كومپانيا مۇنى بولاشاق مامان بۋىنىنا قوسقان ۇلەس جانە ۇجىم ىشىندەگى الەۋمەتتىك قۇندىلىقتاردى نىعايتۋ دەپ بىلەدى.
التىنالماس ءبىلىم گرانتتارىن بەرۋگە بايقاۋ وتكىزەدى. بيىل قازاقستاننىڭ جەتەكشى جوعارى وقۋ ورىندارى مەن كوللەدجدەرىنە 39 ءوتىنىم ماقۇلداندى, ولاردىڭ قاتارىندا ساعىنوۆ اتىنداعى قاراعاندى تەحنيكالىق ۋنيۆەرسيتەتى, Satbayev University, ستەپنوگور تاۋ-كەن تەحنيكالىق جانە تاراز گۋمانيتارلىق-تەحنيكالىق كوللەدجدەرى بار.
سۇرانىسى ەڭ جوعارى ماماندىقتار قاتارىندا پايدالى قازبا بايىتۋ, ماركشەيدەرلىك ءىس, كەن ورىندارىن جەر استى ادىسىمەن يگەرۋ, ەلەكتر ەنەرگەتيكاسى, گەولوگيا, گەودەزيا جانە ت.ب. بار.
ءبىلىم بەرۋ گرانتتارى باعدارلاماسى – «التىنالماس اك» اق-تىڭ بارلىق كاسىپورىندارىنا قاتىستى كادر وقىتۋ, دامىتۋ جانە بىلىكتىلىكتى ارتتىرۋدىڭ كەشەندى جۇيەسىنىڭ ءبىر بولىگى. قىزمەتكەرلەردىڭ دامۋىنا ينۆەستيتسيا سالا وتىرىپ, كومپانيا ءوز بولاشاعىنا قامقورلىق جاساپ, باسەكەگە قابىلەتتىلىگىن ارتتىرادى. «كومپانيا ىشىندە مامان ءوسىرۋ» ستراتەگياسىنىڭ جەمىسى دە ءپىسىپ جاتىر: قىزمەتكەرلەر ءبىلىم الىپ, مانسابىن وسىرۋگە مۇمكىندىك الىپ جاتىر, وقۋ ورىندارىندا ىنتالى ستۋدەنت سانى ارتىپ, كومپانيا دايىن مامان الىپ جاتىر.
التىنالماس قىزمەتكەرلەردىڭ بىلىمىنە سالىنعان ينۆەستيتسيا كومپانيا مەن بۇكىل قازاقستاننىڭ تاۋ-كەن سالاسىنىڭ بولاشاعىنا سالىنعان ينۆەستيتسيا دەپ بىلەدى.
