فوتو: اشىق دەرەككوز
ءمينيستردىڭ حابارلاۋىنشا, 2029 جىلعا قاراي جالپى ىشكى ءونىمدى ەكى ەسە ۇلعايتۋ جوسپارلانعان. وسى ماقساتقا جەتۋ ءۇشىن مەملەكەت ينۆەستيتسيالىق بەلسەندىلىكتى قولداپ, ەكونوميكالىق ءوسۋدىڭ جەدەل قارقىنىن قامتاماسىز ەتەدى.
«ۇكىمەت جاھاندىق باسەكەگە قابىلەتتى ەكسپورتتىق وندىرىستەر قۇرۋعا باسىمدىق بەرەدى: اۆتوموبيل جاساۋ, تەمىرجول ماشينالارى ءوندىرىسى, حيميا جانە مۇناي-حيميا ونەركاسىبى, سيرەك كەزدەسەتىن مەتالدار مەن مينەرالدىق-شيكىزات بازاسىن تولىقتىرۋ, سونداي-اق اگروونەركاسىپتىك كەشەن ونىمدەرىن قايتا وڭدەۋ سياقتى باعىتتار», دەدى سەرىك جۇمانعارين.
ۆيتسە-پرەمەر اتاپ وتكەندەي, بۇل باعىتتار ەكونوميكانىڭ ءوسۋىن جەدەلدەتۋگە سەپتىگىن تيگىزەدى.
«سالالىق مينيسترلىكتەر مەن اكىمدىكتەر نارىقتى ناقتى زەرتتەپ, ينۆەستيتسيا قاجەتتىلىكتەرىن انىقتاپ, جوبالاردىڭ بولجامدى ورنالاسۋىنا قاراي ءتىزىمىن جاسايدى. «ينۆەستيتسياعا تاپسىرىس» جوباسىنىڭ جالپى سوماسى 5 ترلن تەڭگەدەن اسادى. جوبالاردى تالداۋ, قۇرىلىمداۋ جانە ينۆەستيتسيا تارتۋ جۇمىستارى «بايتەرەك» حولدينگى ارقىلى جۇرگىزىلەدى», دەدى مينيستر.
سونىمەن قاتار, ۇكىمەت باسشىسىنىڭ ورىنباسارى جولداۋدا كورسەتىلگەن باستى باعىتتاردى اتاپ ءوتتى:
- جاڭا ينۆەستيتسيالىق تسيكلدى ەنگىزۋ;
- Alatau City قالالىق جوباسىن دامىتۋ;
- ينفلياتسيامەن كۇرەسۋ;
- يمپورتقا تاۋەلدىلىكتى ازايتۋ;
- ەكونوميكانى ىرىقتاندىرۋ جانە كاسىپكەرلىكتى قولداۋ.
