مەملەكەت باسشىسى قاسىم-جومارت توقاەۆ 8 قىركۇيەكتەگى قازاقستان حالقىنا جولداۋىندا بۇقارالىق سپورتتى دامىتۋعا ايرىقشا ءمان بەردى. پرەزيدەنتتىڭ باستامالارىن ۇنەمى قولدايتىن تيمۋر ق ۇلىباەۆتىڭ Halyk قورى بيىل دا اۋىل بالالارىنا ۇلكەن سپورتقا جول اشاتىن «AUYL SPORT» ءتۋرنيرىن وتكىزەدى. 11 قىركۇيەك پەن 12 قازان ارالىعىندا وتەتىن II وڭىرلىك «AUYL SPORT 2025» ءتۋرنيرى قىزىلوردانىڭ قۇمدى دالاسىنان باستالىپ, ەلىمىزدىڭ بارلىق ءوڭىرىن ارالاپ, مىڭداعان جاس سپورتشىعا شابىت سىيلايدى.
تۋرنير اۋقىمى
بيىل دودادا ەلىمىزدىڭ 17 ايماعىنان 10 مىڭعا جۋىق ءجاسوسپىرىم قاتىسادى. 10-15 جاس ارالىعىنداعى سپورتشىلار كاراتە, بوكس, ەركىن كۇرەس, شاحمات, ۇستەل تەننيسى, باسكەتبول جانە ۆولەيبول سەكىلدى جەتى سپورت تۇرىنەن 244 مەدال جيىنتىعىن ساراپقا سالادى. بۇل اۋقىمدى شاراعا 100 كاسىبي تورەشى جۇمىلدىرىلدى, سونداي-اق, جەرگىلىكتى سپورت باسقارمالارى مەن اككرەديتتەلگەن فەدەراتسيالار تولىق قولداۋ كورسەتىپ وتىر.
جارىسقا ەلىمىزدىڭ ءار اۋىلىنان كەلگەن سپورت سۇيەر جاستارى قاتىسىپ, جەڭىسكە تالاسادى. 11 قىركۇيەكتەن 12 قازانعا دەيىن ايماقتىق كەزەڭدەر وتەدى. ودان وتكەندەر 3-6 قاراشادا الماتىدا وتەتىن رەسپۋبليكالىق فينالدا كەزدەسىپ, چەمپيون اتاعىن ساراپقا سالادى.
بيىلعى ماقسات مەن جاڭالىقتار
Halyk قورىنىڭ اتقارۋشى ديرەكتورى عالىمبەك جاقسىلىقوۆ ءتۋرنيردىڭ باستى ماقساتى مەن بيىلعى جوسپارلار جايلى پىكىر ءبىلدىردى.
"AUYL SPORT-تىڭ ماقساتى – اۋىل سپورتىنا جاڭا سەرپىن بەرۋ. ءبىز بۇل جوبانى ءبىر رەتتىك جارىس ەمەس, بالالارعا تۇراقتى الاڭعا اينالدىرۋعا تىرىسامىز. بيىل ۇستەل تەننيسىن ەنگىزىپ, اۋىل مەكتەپتەرىندە كاسىبي دايىندىق جاساۋعا جاعداي جاسادىق. جاتتىقتىرۋشىلاردى دايارلاپ, سپورت زالدارىن جاڭارتىپ جاتىرمىز" – دەدى ول.
2025 جىل جوبا ءۇشىن جاڭا بەلەستەردىڭ جىلى بولماق. بيىل AUYL SPORT باعدارلاماسىنا ۇستەل تەننيسى قوسىلدى. قاراپايىم قۇرال-جابدىقپەن شاعىن مەكتەپتەردە دە جاتتىعا الاتىن بۇل سپورت ءتۇرى اۋىلدار ءۇشىن ەڭ قولجەتىمدى باعىتتاردىڭ ءبىرى سانالادى. فەدەراتسيامەن بىرلەسىپ, جاڭا جاتتىقتىرۋشىلار دايارلاۋ جانە ۇستەل تەننيسى تۋرنيرلەرىن وتكىزۋ جۇمىستارى دا باستالىپ كەتتى.
سەرىكتەستىك جانە اكادەميانىڭ ۇلەسى
"AUYLSPORT" جوباسىن ىسكە اسىرۋ اياسىندا 2024 جىلى Halyk قايىرىمدىلىق قورى مەن قازاق سپورت جانە تۋريزم اكادەمياسى اراسىندا ءوزارا ىنتىماقتاستىق تۋرالى مەموراندۋمعا قول قويىلعان ەدى. مەموراندۋم اياسىندا سپورتپەن شۇعىلداناتىن اۋىل بالالارى مەن جاسوسپىرىمدەرىنىڭ كاسىبي باعدارلانۋى, اۋىلداعى جاتتىقتىرۋشىلار مەن تورەشىلەردىڭ بىلىكتىلىگىن ارتتىرۋ, سپورت جوبالاردى ىسكە اسىرۋدا ادىستەمەلىك قولداۋ كورسەتۋ شارالارى جۇرگىزىلىپ جاتىر.
اكادەميادا وسى مەموراندۋم اياسىنداعى جوسپارلار تالقىلانعان جيىن ءوتتى. شارا بارىسىندا وقۋ ورنىنىڭ وقۋ-سپورت بازاسىن جاڭعىرتۋ جۇمىستارىنىڭ ناتيجەسى رەتىندە "№29 شىعىس جەكپە-جەگى" زالى جاڭادان جابدىقتالىپ, وعان "AUYLSPORT" شىعىس جەكپە-جەگى زالى دەگەن اتاۋى بەرىلدى.
اكادەميا باسشىلىعى دا مەموراندۋم اياسىنداعى جۇمىستىڭ باعىتىنا توقتالدى.
"ماقساتىمىز – اۋىلدان شىققان بالالاردىڭ كاسىبي سپورتقا جول تابۋىنا كومەكتەسۋ. AUYL SPORT ارقىلى اۋىلداعى دارىنداردى ۇلكەن ارەناعا شىعارۋعا كۇش سالىپ جاتىرمىز. اۋىل بالالارىنا وسىنداي مۇمكىندىك بەرىلۋى – ءبارىمىز ءۇشىن قۋانىش. بۇل باستاما تالاي دارىندى جاستىڭ جولىن اشىپ, بولاشاق چەمپيونداردىڭ قالىپتاسۋىنا ىقپال ەتەدى. جوبانىڭ عۇمىرى ۇزاق بولىپ, ەلىمىزدىڭ تۇكپىر-تۇكپىرىنەن شىققان جاستاردىڭ ارمانى ورىندالسىن دەپ تىلەيمىز. ءاربىر جەڭىس – جاڭا ارمانعا جول اشاتىن جالىندى قادام", – دەدى اكادەميانىڭ وقۋ-ادىستەمەلىك ءىسى جونىندەگى پرورەكتورى, پروفەسسور نۇرمۇحانبەتوۆا دينارا كەنجەقىزى.
اكادەميانىڭ بوكس, اۋىر اتلەتيكا جانە شىعىس جەكپە-جەگى كافەدراسىندا 770 ستۋدەنت وقيدى. ونىڭ 350-دەن استامى شىعىس جەكپە-جەگى ماماندىعى بويىنشا ءبىلىم الۋدا.
جەتىستىك تاريحى
"AUYL SPORT" جوباسى – اۋىل بالالارىنا سپورت ارقىلى ۇلكەن ومىرگە جول اشۋدى ماقسات ەتكەن تيمۋر ق ۇلىباەۆتىڭ باستاماسى. بۇل جوبا العاش 2024 جىلى باستالعاندا-اق اۋىلداعى مىڭداعان ءجاسوسپىرىمنىڭ جۇرەگىنە ءۇمىت وتىن جاقتى. ءبىر جىلدىڭ ىشىندە 200 اۋىلدىق ەلدىمەكەننەن 12 مىڭنان استام بالا قاتىسقان العاشقى ماۋسىم ناعىز سپورت مەرەكەسىنە اينالدى. الماتىدا وتكەن فينالدا 1300 ۇزدىك سپورتشى باس قوسىپ, ەل تاريحىنداعى ەڭ اۋقىمدى اۋىل جاستارىنىڭ جارىسىن جاسادى. سپورتشىلار تەگىن كيىممەن, تاسىمالمەن, تۇرۋمەن قامتاماسىز ەتىلىپ, كاسىبي دەڭگەيدە ۇيىمداستىرىلعان ءتۋرنيردىڭ قاتىسۋشىسى رەتىندە سەزىنە الدى.
جوبانىڭ العاشقى ناتيجەلەرى كوپ كۇتتىرمەدى. 2025 جىلدىڭ كوكتەمىندە AUYL SPORT جەڭىمپازدارى قازاقستان قۇراماسىنىڭ ساپىندا سەربيادا وتكەن ISF U-15 گيمنازياداسىنا اتتاندى. كەز كەلگەن ەلدىڭ ارمانى سانالاتىن بۇل دودادا 22 قازاقستاندىق جاس سپورتشىنىڭ 12-ءسى – اۋىل بالالارى بولدى. قازاقستان قۇراماسى 11 مەدال جەڭىپ الىپ, ەل نامىسىن اسقاقتاتتى. ونىڭ تورتەۋى اۋىل سپورتشىلارىنىڭ ەنشىسىندە.
AUYL SPORT اۋىل بالالارىنىڭ دا الەمدىك ارەنادا جەڭىسكە جەتە الاتىنىن كورسەتتى. ت.ق ۇلىباەۆتىڭ Halyk قورى ولاردىڭ ارمانىنا جول اشۋدى جالعاستىرادى.
