ءداستۇر بويىنشا مەرەكەلىك ءىس-شارا كەڭەس وداعىنىڭ باتىرى گەنەرال-مايور سابىر راحىموۆتىڭ ەسكەرتكىشىنە گۇل شوقتارىن قويۋمەن باستالدى. سودان سوڭ اتى اڭىزعا اينالعان اسكەري قولباسشىنى ءبىر مينۋت ۇنسىزدىكپەن ەسكە الدى. بۇعان وقۋ ورنىنىڭ جەكە قۇرامى, جەرگىلىكتى اكىمدىك قىزمەتكەرلەرى مەن قوعام بەلسەندىلەرى, سونداي-اق قارۋلى كۇشتەر ارداگەرلەرى مەن «جاس سارباز» اسكەري-پاتريوتتىق قوزعالىسىنىڭ تاربيەلەنۋشىلەرى قاتىستى.
ءارى قاراي قورعانىس ءمينيسترى اۆياتسيا گەنەرال-لەيتەنانتى د.قوسانوۆ پەن قالا باسشىسى ع.سىزدىقبەكوۆ وقۋ عيماراتىنىڭ باستى كىرەبەرىسىندە قىزىل لەنتانى قيدى. وسىناۋ سالتاناتتى ءراسىمدى اسكەري وركەستر مۋزىكامەن سۇيەمەلدەپ تۇردى. قورعانىس سالاسىنا جاۋاپتى مينيستر سالتاناتتى ءىس-شاراعا قاتىسۋشىلاردى ايتۋلى وقيعامەن شىن جۇرەكتەن قۇتتىقتادى.
– جاڭا كوللەدج باتىلدىقتىڭ, اسكەري بورىشقا ادالدىقتىڭ, وتانعا دەگەن سۇيىسپەنشىلىكتىڭ ونەگەسى بولعان داڭقتى كوماندير, كەڭەس وداعى تۇسىنداعى تۇڭعىش قازاق گەنەرالى سابىر راحىموۆتىڭ ەسىمىمەن اتالادى. سابىر راحىموۆ – ابىروي مەن باتىلدىقتىڭ بيىك ۇلگىسىن كورسەتكەن قازاقتىڭ پەرزەنتى. سەندەر وقيتىن ورىنعا ەرەكشە مىندەت جۇكتەلگەن. ول مىندەت – قيىن جاعدايلاردا جىلدام شەشىم قابىلداي الاتىن, كاسىبي قابىلەتى جوعارى جانە ءاربىر ءىسىن جاۋاپكەرشىلىكپەن اتقاراتىن بىلىكتى سەرجانتتاردى دايارلاۋ. گارنيزوننىڭ اسكەري قىزمەتشىلەرىنە جان-جاقتى كوڭىل بولگەنى, قولداۋ كورسەتكەنى جانە اسكەري بولىمدەر مەن مەكەمەلەردى اباتتاندىرىپ, الەۋمەتتىك قامسىزداندىرۋ ماسەلەسىنە ءجىتى نازار اۋدارعانى ءۇشىن شىمكەنت قالاسى اكىمىنە شىنايى العىسىمدى بىلدىرەمىن, – دەدى اۆياتسيا گەنەرال-لەيتەنانتى د.قوسانوۆ.
قورعانىس ءمينيسترى ريزاشىلىعىن ءبىلدىرۋ ماقساتىندا عابيت سىزدىقبەكوۆكە «ەل قورعانى» سالالىق مەدالىن تابىس ەتتى. مينيستر وقىتۋشىلار مەن كومانديرلەرگە ارناعان سوزىندە تاربيەلەنۋشىلەرگە كاسىبي داعدىلاردى ۇيرەتىپ قانا قويماي, ولاردىڭ بويىنا رۋحاني-ادامگەرشىلىك قۇندىلىقتار, ۇلتتىق رۋحتى جانە ءپاتريوتيزمدى سىڭىرۋگە تالپىنىڭدار دەپ اتاپ ءوتتى. سونداي-اق ول بولاشاق سەرجانتتارعا مىقتى دەنساۋلىق پەن وقۋدا وزات بولۋدى جانە تاۋەلسىز مەملەكەتتىڭ وركەندەۋى جولىندا تولاعاي تابىستار مەن بيىك ماقساتتارعا جەتۋدى تىلەدى.
اشىلۋ سالتاناتى بارىسىندا اسكەري كوللەدج ۇلانى سابىر قوشقارباي ءسوز سويلەپ, ستۋدەنتتەردىڭ الاڭسىز ءبىلىم الۋىنا جاسالعان جاعداي ءۇشىن باسشىلىق قۇرامعا العىسىن ءبىلدىردى. اسكەري ماماندىقتى يگەرۋگە بەل بۋعان كۋرستاستارى دا ونىڭ ءسوزىن قوستاي جونەلدى.
– اسكەري مامان بولۋ مەنىڭ بالا كەزدەن ارمانىم ەدى. سوندىقتان وسى وقۋ ورنىنا تۇسكەندە قۋانىشتان توبەم كوككە ەكى ەلى جەتپەي قالدى. ەڭ تاڭداۋلىلار تۇسكەن كوللەدجدە ەندى ساباقتى جاقسى وقۋىمىز كەرەك. اتا-انامىزدىڭ ءۇمىتىن اقتاپ, ەل قورعايتىن ناعىز اسكەري مامان بولىپ شىعامىز دەگەن ۇمىتتەمىز. سول ءۇشىن وقۋ ورنىنىڭ ىشكى ءتارتىبىن بۇزباي, جاقسى ءبىلىم الىپ, ۇستازداردىڭ ايتقانىن بۇلجىتپاي ورىندايمىز. ەلىمىزدىڭ دامۋى جولىندا اركىم شاماسىنا قاراي ەڭبەك ەتىپ جاتىر. ءار سالاداعى مامانداردىڭ جۇمىسى تۋعان جەردى تۇلەتۋگە ۇلەس قوسىپ جاتىر دەپ ەسەپتەيمىن. سونىڭ ىشىندە قىزمەتى وتان قورعاۋعا ارنالعان مامانداردىڭ ەڭبەگى ەرەكشە دەپ بىلەمىن. ولار ءاردايىم ەلى مەن جەرى ءۇشىن جانىن ءبىرىنشى قيۋعا دايار تۇرادى. اسكەري ادامنىڭ قىزمەتى سونىسىمەن دە قادىرلى, – دەدى س.قوشقارباي.
وسىدان كەيىن ءبىلىم ۇياسىندا ەرەكشە كوزگە تۇسكەن اسكەري قىزمەتشىلەردى ماراپاتتاۋ ءراسىمى ءوتتى. كوللەدجدىڭ جەكە قۇرامىنىڭ سالتاناتتى شەرۋى مەن اسكەري تەحنيكانىڭ ۇلگىلەرى قويىلدى. سونداي-اق الاڭدا قويان-قولتىق ۇرىستىڭ تاسىلدەرى كورسەتىلدى. ۇلاندارمەن بولعان كەزدەسۋدەن سوڭ قوناقتار وقۋ عيماراتىن, كازارما, كىتاپحانا, مۇراجاي, اسحانا, سپورت زالى مەن ستاديوندى ارالاپ شىقتى. اسكەري وقۋ ورداسىنىڭ ماتەريالدىق-تەحنيكالىق بازاسى تالاپقا ساي ەكەنىنە كوزى جەتكەن قوناقتار مۇنداي ءبىلىم ۇياسى ەلىمىزدەگى بىرەگەي وقۋ ورىندارىنىڭ ءبىرى دەپ ماقتانىشپەن ايتۋعا بولاتىنىن جەتكىزدى. راسىندا دا, جاس اسكەري ساربازداردىڭ ساپالى ءبىلىم الۋىنا مۇندا بار جاعداي جاسالعان. كوللەدجدە دەنە تاربيەسى جاتتىعۋلارىنا دا ەرەكشە كوڭىل بولىنەدى. سوندىقتان سپورتتىق قۇرالداردىڭ بارلىق تۇرىمەن قامتاماسىز ەتىلگەن. ارنايى دارىگەرلەر ستۋدەنتتەردىڭ دەنساۋلىق جاعدايىن ءجىتى قاداعالاپ وتىرادى.
اسكەري قىزمەتكەر تەك فيزيكالىق تۇرعىدان مىقتى بولۋمەن قاتار اتىس قارۋلارىن جاقسى مەڭگەرگەن, وي-ءورىسى دامىعان زەرەك ادام بولۋ كەرەك. وسى جاعىنان كەلگەندە وقۋ ورنىندا شاكىرتتەردىڭ ءبىلىم الۋىنا, قارۋلى كۇشتەر تەحنيكاسىنىڭ ءتىلىن ءبىلىپ, ۇرىس جۇرگىزۋدىڭ تاسىلدەرىن ۇيرەنۋگە بارىنشا جاعداي قاراستىرىلعان. بۇل – ءبىرىنشى كەزەكتە بىلىكتى ۇستازداردىڭ بەرەتىن ارنايى دارىستەرى. ولاردان ءتالىم العان ستۋدەنتتەر كەلەشەكتە ناعىز ءبىلىمدى اسكەري قىزمەتكەر بولىپ شىعادى. ءوز كەزەگىندە ۇستازدار شاكىرتتەرگە ساباقتى بارىنشا قىزىقتى وتكىزۋگە تىرىسادى. سول ءۇشىن ارنايى وقىتۋ تاسىلدەرىن قولدانىپ وتىر. ءبىلىم الۋشىلارعا تۇسىنىكتى بولۋ ءۇشىن كورنەكى قۇرالداردى دا كوبىرەك پايدالانادى. ول جاس ساربازدىڭ وتىلگەن ساباقتى تەز ۇعىنىپ, تۇپكى ءمانىن ءتۇسىنۋ ءۇشىن كەرەك. ەكىنشىدەن, كوللەدجدە باي كىتاپحانا قورى بار. ول جەردەن اسكەري سالاداعى وقۋلىقتاردان باستاپ ءتۇرلى جانرداعى ادەبيەتتەردى تابۋعا بولادى. ستۋدەنتتەر اندا-ساندا كوركەم ادەبيەتتى دە قولىنا الىپ, رۋحاني سۋسىنداپ تۇرادى. بولاشاق اسكەري قىزمەتكەر ءبىر جاقتى ەمەس, جان-جاقتى ويلاي بىلەتىن, كوزى اشىق كوكىرەگى وياۋ ازامات بولۋ ءۇشىن كوپ وقىپ تەرەڭ ءبىلىم الۋ قاجەت. وسى تۇرعىدان العاندا كوللەدجدە شاكىرتتەردىڭ زەيىنىن اشىپ, وقۋعا دەگەن ىنتاسىن ارتتىرۋعا اسكەري پەداگوگتەر تاراپىنان كوپ جۇمىس جاسالىپ جاتىر. كەلەشەكتە وقۋ ورداسىن تامامداعان تۇلەكتەر ەلىمىزدىڭ اسكەري سالاسىن نىعايتۋعا, قورعانىس كۇشتەرىن بەرىك ەتۋگە ايانباي ۇلەس قوسادى.
ايتا كەتۋ كەرەك, اسكەري كوللەدج تەحنيكالىق جانە كاسىپتىك ءبىلىم بەرۋ باعدارلاماسى بويىنشا كىشى كوماندالىق قۇرامدى دايارلايدى. وقۋ مەرزىمى 2 جىل 10 ايدى قۇرايدى. وسى مەرزىم ارالىعىندا جاسۇلاندىقتار موتواتقىشتار, تانك, زىمىران جانە ارتيللەريالىق بولىمشەلەردى باسقارۋ ماماندىقتارى بويىنشا ديپلوم الىپ شىعادى. كوللەدجدى ءساتتى اياقتاعان تۇلەكتەرگە كىشى سەرجانت اسكەري اتاعى بەرىلەدى. اسكەري كوللەدجگە 15 پەن 17 جاس ارالىعىنداعى ەلىمىزدىڭ كەز كەلگەن ازاماتى قابىلدانادى. وسى جىلى كونكۋرس ناتيجەسىندە گەنەرال سابىر راحىموۆ اتىنداعى اسكەري وقۋ ورداسىنا 168 جاس تالاپكەر قابىلداندى.
جۇمىس ساپارى اياسىندا قورعانىس ءمينيسترى شىمكەنت گارنيزونىندا جاۋىنگەرلىك دايىندىق پەن قىزمەت جاعدايلارىن تەكسەردى. اۆياتسيا گەنەرال-لەيتەنانتى د.قوسانوۆ شىمكەنتتەگى بىرقاتار اسكەري بولىمدەر مەن مەكەمەلەردى ارالاپ, ولاردىڭ قىزمەتىمەن, ينفراقۇرىلىمىمەن جانە اسكەري قىزمەتشىلەرگە جاسالعان جاعدايمەن تانىستى.
2 قىركۇيەكتە ەلىمىزدە كۇزگى اسكەرگە شاقىرۋ ناۋقانى باستالعانى بەلگىلى. وسىعان وراي مينيستر قالالىق شاقىرۋ پۋنكتىنە بارىپ, اسكەرگە شاقىرىلۋشىلاردىڭ جاعدايى قالاي ەكەنىن, مەديتسينالىق كوميسسيادان ءوتۋ ءتارتىبىن زەردەلەدى. سونداي-اق العاشقى شاقىرىلۋشىلار مەن قارۋلى كۇشتەردىڭ ارداگەرلەرىمەن سۇحباتتاستى. قورعانىس سالاسىنىڭ باسشىسى ارنايى وپەراتسيالار كۇشتەرى بولىمشەلەرىنىڭ ينفراقۇرىلىمىندا بولىپ جاۋىنگەرلىك دايىندىق دەڭگەيىن باعامدادى. وقۋ-جاتتىعۋ كەشەنىندە مينيستر عيماراتتى شابۋىلداۋ مەن قالا جاعدايىندا ۇرىس قيمىلدارىن جۇرگىزۋدىڭ ادىستەرىن تاماشالادى.
قالالىق اۋماقتىق قورعانىس بريگاداسىندا مينيسترگە رەزەرۆتەگى اسكەري قىزمەتشىلەردى قايتا دايارلاۋ ءىس-شاراسىنىڭ ورىندالۋى جونىندە باياندالدى. سالا باسشىسى تاجىريبەلىك ساباقتار وتكىزۋگە ارنالعان ينفراقۇرىلىممەن, سونىڭ ىشىندە ارنايى شابۋىلداۋ جولاعىمەن تانىسىپ شىقتى. د.قوسانوۆ ءوز سوزىندە مۇنداي جاتتىعۋلاردىڭ جەكە قۇرامنىڭ كاسىبي دايىندىعىن ارتتىرىپ, كۇردەلى جاعدايلاردا ۇيلەسىمدى ءارى ءتيىمدى ارەكەت ەتۋىنە ىقپال ەتەتىنىن اتاپ ءوتتى.
«وڭتۇستىك» وڭىرلىك قولباسشىلىعى اسكەرلەرىنىڭ ەڭ ءىرى قۇرامالارىنىڭ ءبىرى – مەحانيكالاندىرىلعان بريگادادا مينيستر مەرزىمدى اسكەري قىزمەتشىلەرگە جاسالعان الەۋمەتتىك-تۇرمىستىق جاعدايلارعا ەرەكشە نازار اۋدارىلعانىن كوزبەن كوردى. ماسەلەن, ساربازدار جەكە گيگيەنالىق قۇرالدارمەن تولىق قامتاماسىز ەتىلگەن. ءاربىر شاعىن جيھازدا قاجەتتى زاتتاردىڭ تولىق جيىنتىعى ساقتالعان. سونىمەن قاتار ەلىمىزدىڭ قورعانىسىنا جاۋاپتى سالا باسشىسى جەكە قۇرامدى مەديتسينالىق قامتاماسىز ەتۋدى ۇيىمداستىرۋداعى وڭ تاجىريبەگە دە ەرەكشە توقتالىپ ءوتتى.
اسكەري مامانداردىڭ ايتۋىنشا, بولىمدە ءاربىر ساربازعا ارنالعان جەكە مەديتسينالىق كارتا جۇرگىزىلەدى. وندا دەنساۋلىق جاعدايى تۋرالى بارلىق مالىمەت تىركەلىپ وتىرادى. بۇل جۇيە ساربازداردىڭ قاجەتتىلىكتەرىن انىقتاپ, ولاردى ءتيىستى ءدارى-دارمەكپەن ۋاقتىلى قامتاماسىز ەتۋگە مۇمكىندىك بەرەدى. مينيستر توتەنشە جاعدايلار كەزىندەگى العاشقى مەديتسينالىق كومەك كورسەتۋ داعدىلارىنىڭ ماڭىزدىلىعى ايرىقشا ەكەنىن جەتكىزدى.
سونىمەن, ءىسساپار قورىتىندىسىندا قورعانىس ءمينيسترى مەرزىمدى اسكەري قىزمەتكە شاقىرىلۋشىلاردى ساپالى ىرىكتەۋ مەن جەكە قۇرامدى وقىتۋ جانە جاۋىنگەرلىك دايىندىق ادىستەرىن جەتىلدىرۋ جونىندە بىرقاتار ناقتى تاپسىرمالار بەردى.
