«بۇگىنگى جولداۋ – قوعام سۇرانىسىنا, ەلدەگى تۇيتكىلدى ماسەلەلەردى شەشۋگە بەرىلگەن ناقتى جاۋاپ. ول قازاقستاننىڭ دامۋىنا تىڭ سەرپىن بەرەتىن, ەكونوميكالىق ورلەۋىنە جول اشاتىن تىڭ ويلارمەن, جاڭا باستامالارمەن ەرەكشەلەندى. پرەزيدەنت مەملەكەتىمىزدىڭ الداعى دامۋىنىڭ باعىت-باعدارىن ايقىنداپ بەردى. بۇل جولداۋ تۇتاس حالقىمىزدىڭ رۋحىن كوتەردى», – دەدى ەرلان قوشانوۆ.
ونىڭ ايتۋىنشا, سوڭعى جىلدارى اۋقىمدى ساياسي رەفورمالار قولعا الىنىپ, ەلدىڭ ساياسي كەلبەتى تۇبەگەيلى وزگەردى. ەندىگى كەزەكتە نەگىزگى باسىمدىق ەكونوميكالىق دامۋ مەن تسيفرلىق ترانسفورماتسياعا بەرىلىپ وتىر.
«پرەزيدەنت جولداۋىنىڭ نەگىزگى ارقاۋى – ەكونوميكانى تسيفرلاندىرۋ, جاساندى ينتەللەكتىنى ەنگىزۋ جانە جاڭا تەحنولوگيالار ارقىلى حالىقتىڭ تۇرمىس-تىرشىلىگىن جاقسارتۋ. ءتىپتى, تسيفرلاندىرۋ ۇلتتىق يدەيا دەڭگەيىنە كوتەرىلدى دەسەك ارتىق ەمەس. مەملەكەت باسشىسى قازاقستاندى ءۇش جىل ىشىندە جاپپاي تسيفرلىق ەلگە اينالدىرۋ مىندەتىن قويدى. وسى ماقساتتا جاساندى ينتەللەكت جانە تسيفرلىق دامۋ مينيسترلىگى قۇرىلىپ, ونى ۆيتسە-پرەمەر دەڭگەيىندەگى مامان باسقاراتىن بولادى», – دەدى ءماجىلىس توراعاسى.
سونىمەن قاتار ەرلان قوشانوۆ پرەزيدەنت ۇسىنعان زاڭنامالىق باستامالاردىڭ ىشىندە جاڭا تسيفرلىق كودەكستىڭ قابىلدانۋىن ەرەكشە اتاپ ءوتتى. ونىڭ ايتۋىنشا, قۇجات جاساندى ينتەللەكت پەن پلاتفورمالىق ەكونوميكانى قولدانۋدىڭ نەگىزگى باعىتتارىن ايقىنداپ, بارلىق سالاداعى جاڭعىرتۋ جۇمىستارىنا قۇقىقتىق نەگىز بولادى.
ءماجىلىس توراعاسى جولداۋدا كوتەرىلگەن ينۆەستيتسيالىق ساياساتتى جەتىلدىرۋ, جاڭا وندىرىستەردى دامىتۋ, بانكتەردىڭ ناقتى سەكتوردى قارجىلاندىرۋداعى ءرولىن كۇشەيتۋ, تۇرعىن ءۇي-كوممۋنالدىق شارۋاشىلىعىن جاڭعىرتۋ, بيزنەستى ارتىق تەكسەرىستەردەن قورعاۋ سىندى باسىم باعىتتارعا دا توقتالدى.
«پرەزيدەنت ينۆەستيتسيالىق ساياساتتى تۇبەگەيلى جاڭعىرتىپ, وڭدەۋ سالاسىنا كوبىرەك قارجى تارتۋدى تاپسىردى. سونىمەن بىرگە بانكتەردىڭ قاراجاتىن ەكونوميكاعا جۇمساۋدىڭ ءتيىمدى تەتىكتەرىن تابۋ قاجەتتىگىن ايتتى. بۇل ماسەلەلەر ماجىلىستە قارالاتىن جاڭا زاڭداردا ەسكەرىلەتىن بولادى», – دەدى ول.
ەرلان قوشانوۆ مەملەكەت باسشىسىنىڭ ءبىر پالاتالى پارلامەنت قۇرۋ باستاماسىن دا تاريحي قادام دەپ باعالادى.
«پرەزيدەنت مۇنداي تاعدىرلى ماسەلەنى اسىعىس شەشپەي, بۇكىل قوعامدا كەڭىنەن تالقىلاپ, 2027 جىلى جالپىۇلتتىق رەفەرەندۋم ارقىلى قابىلداۋدى ۇسىندى. بۇل – حالىقتىڭ پىكىرىن ەسكەرەتىن, اشىق ساياساتتىڭ ناقتى كورىنىسى», – دەدى ءماجىلىس توراعاسى.
ونىڭ ايتۋىنشا, جولداۋدا ايتىلعان ءاربىر باستاما حالىقتىڭ ءومىر ساپاسىن ارتتىرۋعا, قازاقستاندى ادىلەتتى, باقۋاتتى, قاۋىپسىز جانە تازا مەملەكەتكە اينالدىرۋعا باعىتتالعان.
«جولداۋ – ەلىمىزدى ۇيىستىراتىن, حالقىمىزدى بىرىكتىرەتىن ماڭىزدى قۇجات. ءماجىلىس دەپۋتاتتارى پرەزيدەنتتىڭ تاپسىرمالارىن ورىنداۋ ءۇشىن بارلىق كۇش-جىگەرىن سالادى», – دەدى ەرلان قوشانوۆ.
