فوتو: اشىق دەرەككوز
پرەزيدەنت ازاماتتارعا كورسەتىلەتىن مەملەكەتتىك قىزمەتتەردى تسيفرلاندىرۋ ىسىندە قازاقستاننىڭ زور جەتىستىككە جەتكەنىن اتاپ ءوتتى. بىراق بيۋروكراتيالىق راسىمدەر ءالى كۇنگە دەيىن بيزنەسكە كەدەرگى بولىپ وتىر. تسيفرلاندىرۋ ءىسىنىڭ ماقساتى ءالى ورىندالماعان.
بۇل احۋالدى شۇعىل تۇزەۋ كەرەك. ەڭ الدىمەن, سالىقتىق اكىمشىلەندىرۋگە نازار اۋدارۋ قاجەت. مەملەكەتتىك كىرىستەر كوميتەتى تسيفرلاندىرۋ ۇدەرىسى بويىنشا مەملەكەتتىك ورگاندار اراسىندا كوش باستاۋعا ءتيىس. بۇل مەكەمە جاساندى ينتەللەكتىنىڭ جانە باسقا دا وزىق تەحنولوگيانىڭ الەۋەتىن سالىق تولەۋشىلەردىڭ مۇددەسىنە ساي ءتيىمدى قولدانۋى كەرەك. وسى جۇيەلى قادامنىڭ ءبارى مەملەكەت پەن بيزنەستىڭ اراسىنداعى قارىم-قاتىناستىڭ مۇلدەم جاڭا, سەرۆيستىك ۇلگىسىن جاساۋعا ارنالعان, - دەدى ق.توقاەۆ.
جاڭا سالىق كودەكسى قازىرگى نورمالار مەن راسىمدەردى وزگەرتۋمەن شەكتەلمەۋى كەرەك. بۇل قۇجات سالىق تولەۋشىلەردىڭ اشىقتىق پەن ادالدىققا نەگىزدەلگەن جاڭا تانىم-تۇسىنىگى مەن بولمىسىن قالىپتاستىرۋعا ءتيىس.
پرەزيدەنت مەملەكەت ادال جۇمىس ىستەيتىن سالىق تولەۋشىلەردىڭ مۇددەسىن قورعايتىنىن, ولاردىڭ ادال ەڭبەگىنەن تۇسكەن سالىقتى ەلىمىزدى دامىتۋعا جۇمسايتىنىن اتاپ ءوتتى.
سالىقتان تۇسكەن ءار تەڭگە حالىقتىڭ يگىلىگىنە جۇمسالۋعا ءتيىس. بۇل – ازاماتتارعا ساپالى مەملەكەتتىك قىزمەت كورسەتىلىپ, ينفراقۇرىلىم سالىنىپ, مەملەكەتتىك قولداۋ شارالارى ۇسىنىلۋى قاجەت دەگەن ءسوز. دامۋ ينستيتۋتتارى كاسىپكەرلەردىڭ بەلسەندىلىگىن ارتتىرۋ ىسىندە ايرىقشا ءرول اتقارۋعا ءتيىس. بىراق ولاردىڭ جۇمىسىندا ءبىراز كەمشىلىك بار. دامۋ ينستيتۋتتارىنىڭ قىزمەتىن وزگەرتەتىن كەز كەلدى, - دەدى توقاەۆ.
پرەزيدەنت شىن مانىندە, بۇل قۇرىلىمدار ناقتى ءبىر سالاعا باعىتتالعان, تەرەڭ تالداۋ جاساۋعا قابىلەتتى جانە ينۆەستيتسيا سالۋعا قۇقىلى تولىققاندى دامۋ ينستيتۋتى رەتىندە جۇمىس ىستەۋگە ءتيىس ەكەنىن ايتتى.
