«قازىر دۇنيە ءجۇزى جاڭا تاريحي داۋىرگە قادام باستى. بۇل ءداۋىردىڭ بارشا ادامزات ءۇشىن وڭاي بولمايتىنى انىق.
الپاۋىت ەلدەر مەن حالىقارالىق وداقتار اراسىنداعى قاراما-قايشىلىقتاردىڭ اۋقىمى ءوسىپ بارا جاتىر. حالىقارالىق قاتىناستاعى شيەلەنىستەر مەن وزبىرلىقتىڭ سالدارىنان قاقتىعىستار مەن سوعىستار بەلەڭ الدى. كەيبىر مەملەكەتتەردىڭ ىشكى جانە سىرتقى ساياساتىندا اسىرە ۇلتشىلدىق كۇشەيدى.
الەم ەكونوميكاسىندا تەڭسىزدىكتەر مەن قايشىلىقتار ۋشىعا ءتۇستى. كەيبىر مەملەكەتتەر ەكونوميكالىق دامۋدا ارتتا قالىپ, كەيبىر ەلدەر جاساندى ينتەللەكت سالاسىندا تەڭدەسسىز تابىسقا جەتۋدە.
حالىقارالىق قۇقىقتىڭ ءمان-ماڭىزى كەتە باستادى», دەدى پرەزيدەنت.
مەملەكەت باسشىسى وسىنداي جاعدايدا بىرىككەن ۇلتتار ۇيىمى ءوزىنىڭ ءرولى مەن مارتەبەسىنە ساي قازىرگى باستى تۇيتكىلدەردى شەشۋگە قاۋقارسىز بولىپ وتىرعانىن اتاپ ءوتتى.
«ەكولوگيالىق جانە تەحنوگەندىك اپاتتاردىڭ كەسىرىنەن ءتۇرلى ەلدەردىڭ ەكونوميكاسى وراسان شىعىنعا باتۋدا.باتىستاعى ەتنوسارالىق-دىنارالىق ۇيلەسىم مەن مادەني ارالۋاندىق تۇجىرىمداماسى داعدارىسقا ۇشىرادى. جاھاندىق دەسترۋكتيۆتى كۇشتەر ۇلتتىق مادەنيەتتەر مەن داستۇرلەردىڭ ىرگەسىن شايقاۋدا. بوسقىنداردىڭ سانى كوبەيىپ, كوشى-قون داعدارىسى تۋىندادى. ادام ساۋداسى, قارۋ-جاراق پەن ەسىرتكى ساۋداسى دا ءورشىپ تۇر.
بۇرىن-سوڭدى بولماعان مۇلدە جاڭا سىن-قاتەرلەر كۇللى ادامزاتتىڭ قاۋىپسىزدىگىنە نۇقسان كەلتىرۋدە. ءتىپتى, جاساندى ينتەللەكتىنى پايدالانىپ, اسا قاۋىپتى قارۋ جاسايتىندار پايدا بولدى. گەوساياسي احۋالدىڭ تۇبىرىمەن وزگەرە باستاعانىن اڭعارتاتىن باسقا دا فاكتورلار از ەمەس. قىسقاشا ايتساق, الەمدە جاڭا گەوساياسي ءتارتىپ ورنىعا باستادى», دەدى قاسىم-جومارت توقاەۆ.
