دياس ەسداۋلەتوۆتىڭ ايتۋىنشا, «جۇمىسشى ماماندىقتار جىلى» اياسىندا وبلىستاعى كادر تاپشىلىعىن جويۋ ءۇشىن «وڭىرلىك جاڭا ماماندىقتار اتلاسى» ازىرلەندى. سونىڭ ناتيجەسىندە 11 كوللەدجدە 14 جاڭا ماماندىق اشىلدى. سونداي-اق تالدىقورعاندا حالىقارالىق تالاپتارعا ساي «Zhetysu Skills» ورتالىعى سالىنىپ جاتىر. بۇل ورتالىق ستۋدەنتتەردى 12 باعىت بويىنشا «WorldSkills» چەمپيوناتتارىنا كاسىبي دايارلاۋعا مۇمكىندىك بەرەدى.
ورتا ءبىلىم بەرۋ سالاسىندا دا اۋقىمدى جۇمىستار جۇرگىزىلۋدە. «كەلەشەك مەكتەپتەرى» باعدارلاماسى اياسىندا جاڭا مەكتەپتەردىڭ قۇرىلىسى قاتار, قولدانىستاعى ءبىلىم مەكەمەلەرىن كۇردەلى جوندەۋ جانە زاماناۋي قۇرال-جابدىقتارمەن جابدىقتاۋ جۇمىستارى قولعا الىنعان. ال باستاۋىش سىنىپ وقۋشىلارى ءۇشىن تەگىن تاماقتانۋ جۇيەسى جولعا قويىلىپ وتىر.
مەكتەپكە دەيىنگى ءبىلىم بەرۋ سالاسىندا بيىلعى مامىر ايىنان باستاپ تالدىقورعانداعى بارلىق بالاباقشالار ۆاۋچەرلىك قارجىلاندىرۋعا كوشتى. بۇل جۇيە قارجىنىڭ اشىق ءبولىنۋىن قامتاماسىز ەتىپ, اتا-انالار ءۇشىن بالالارىن كەزەككە قويۋ نەمەسە بالاباقشا اۋىستىرۋ ىسىندە قولايلىلىق تۋعىزدى.
بۇقارالىق جانە كاسىبي سپورتتى دامىتۋ دا نازاردان تىس قالعان جوق. سوڭعى ءۇش جىلدا وبلىستا 32 جاڭا سپورت كەشەنى سالىنىپ, تۇراقتى تۇردە سپورتپەن شۇعىلداناتىن تۇرعىنداردىڭ ۇلەسى 42 پايىزعا جەتتى. وبلىس بويىنشا 29 سپورت ءتۇرى نەگىزگى باعىت رەتىندە بەلگىلەنگەن: ونىڭ ىشىندە 11 وليمپيادالىق, 2 پاراليمپيادالىق جانە 13 ۇلتتىق سپورت ءتۇرى بار.
بۇقارالىق سپورتتى قولداۋدىڭ تابىستى جوبالارىنىڭ ءبىرى – «J-LEAGUE» تۋرنيرلەرى. باسكەتبول, ۆولەيبول جانە فۋتبولدان وتەتىن بۇل دودا جاقىن كۇندەرى جاڭا ماۋسىمىن باستاماق.
ءباسپاسوز ءماسليحاتى سوڭىندا دياس ەسداۋلەتوۆ جۋرناليستەردىڭ سۇراقتارىنا جاۋاپ بەرىپ, وڭىردەگى ادامي كاپيتالدى دامىتۋعا باعىتتالعان شارالاردىڭ جالعاسا بەرەتىنىن اتاپ ءوتتى.
