ءىس-شارانىڭ مارتەبەلى قوناعى رەتىندە تۇركيا رەسپۋبليكاسىنىڭ پرەزيدەنتى رەجەپ تايىپ ەردوعان قاتىستى. ول ۇلتتىق ۇلاننىڭ لەيتەنانتى اسحات سۇلتاناحمەتكە اكادەميا ديپلومىن ءوز قولىمەن تابىستادى. بۇل وقيعا قازاقستان مەن تۇركيا اراسىنداعى ىنتىماقتاستىقتىڭ ايقىن كورىنىسى بولدى.
«وسىدان بەس جىل بۇرىن ۇلتتىق ۇلان اكادەمياسىنان تۇركيا مەملەكەتىنىڭ انكارا قالاسىنداعى جاندارمەريا اكادەمياسىنا وقۋعا تۇسكەن بولاتىنمىن. مىنە, بيىل سول وقۋ ورنىن ءساتتى اياقتاپ, تۇركيا پرەزيدەنتى ەردوعان مىرزانىڭ ءوز قولىنان ديپلوم الىپ جاتىرمىن. بۇل ۇلكەن ابىروي ءارى ۇلكەن جاۋاپكەرشىلىك. بىزگە شەت ەلدە شىڭدالۋعا مۇمكىندىك بەرگەن قۇقىقتىق ءتارتىپ اسكەرىنە العىسىم شەكسىز. باۋىرلاس ەلدەن العان ءبىلىمىمىز بەن تاجىريبەمىز الداعى ۋاقىتتا ەلگە قىزمەت جولىندا وڭ اسەرىن تيگىزەدى دەپ سەنەمىن. ءوز ەلى مەن جەرىنە قىزمەت ەتۋ – ءار ەر ازاماتتىڭ بورىشى, سوندىقتان اسكەري سالانى سانالى تۇردە تاڭدادىم», دەيدى جاس وفيتسەر.
تۇركيا تاراپىنىڭ رەسمي شاقىرۋى بويىنشا سالتاناتتى راسىمگە ەلىمىزدىڭ قۇقىقتىق ءتارتىپ اسكەرىنەن ارنايى دەلەگاتسيا قاتىستى. دەلەگاتسيانى ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى گەنەرال-مايور اڭساعان بالتابەكوۆ باستاپ باردى.
ساپار بارىسىندا قازاقستاندىق وكىلدەر جاندارمەريا جانە جاعالاۋ كۇزەتى اكادەمياسىنىڭ جەكە قۇرامدى دايارلاۋ جۇيەسىمەن جانە زاماناۋي اسكەري ءبىلىم بەرۋ ادىستەمەلەرىمەن تانىستى. سونىمەن قاتار دەلەگاتسيا جاندارمەريانىڭ لوگيستيكا قولباسشىلىعىندا, ارنايى ماقساتتاعى JÖAK بولىمشەسىنىڭ وقۋ ورتالىعىندا, سونداي-اق بايلانىس ەلەكتروندىق جۇيەلەرى مەن اقپاراتتىق جۇيەلەردى باسقارۋ ورتالىعىن كوردى.
ساپار بارىسىندا اڭساعان سكەندىر ۇلى جاندارمەريانىڭ باس قولباسشىسى ارميا گەنەرالى الي چارداكچىمەن كەزدەستى.
ۇلتتىق ۇلاننىڭ باس قولباسشىسىنىڭ تۇركياعا ساپارى اسكەري سالاداعى ەكىجاقتى ىنتىماقتاستىقتى دامىتۋداعى ماڭىزدى قادام.
بۇل ساپار تاجىريبە الماسۋعا, كاسىبي بايلانىستاردى نىعايتۋعا جانە قازاقستان رەسپۋبليكاسى ۇلتتىق ۇلانى مەن تۇركيا جاندارمەرياسى اراسىنداعى ءوزارا ءىس-قيمىلدى ودان ءارى نىعايتۋعا جول اشتى.
