سۋرەت: primeminister.kz
كەزدەسۋ بارىسىندا الەۋمەتتىك سالاداعى ىنتىماقتاستىقتى دامىتۋ جولدارى قاراستىرىلدى. ءتىل ساياساتى, ءبىلىم بەرۋ جانە عىلىم, تۋريزم, حالىقارالىق مەكتەپتەر مەن ۋنيۆەرسيتەتتەردى دامىتۋ, قۇزىرەت ورتالىقتارىن قۇرۋ ءىسى نەگىزگى تاقىرىپ بولدى. ەرمەك كوشەرباەۆ قازاقستان ادامي كاپيتالدى دامىتۋعا باسىمدىق بەرىپ وتىرعانىن جانە شۆەيتساريامەن تاجىريبە الماسۋعا ەرەكشە ءمان بەرەتىنىن ايتتى.
«ەلىمىزدىڭ ەڭ ۇلكەن بايلىعى – ازاماتتارىنىڭ ءبىلىمى مەن كاسىبي داعدىلارى. ءبىز شۆەيتساريالىق ءبىلىم بەرۋ جۇيەسىن جوعارى باعالايمىز جانە ونداعى وزىق تاجىريبەلەر ءبىزدىڭ ستۋدەنتتەرگە ەلىمىزدە قولجەتىمدى بولعانىن قالايمىز. شۆەيتساريادا وقۋ قىمبات بولعاندىقتان, حالىقارالىق مەكتەپتەر مەن الەمدىك دەڭگەيدەگى باعدارلامالاردى ەلىمىزدە اشۋ – باستى مىندەت. اسىرەسە كاسىبي-تەحنيكالىق بىلىمگە باسىمدىق بەرىپ وتىرمىز. ورتا بۋىن ماماندار مەن تەحنيكالىق كادرلاردى دايارلاۋ – ەكونوميكانىڭ دامۋىنا تىكەلەي اسەر ەتەدى. جاستارىمىز سۇرانىسقا يە ماماندىقتاردى الەمدىك دەڭگەيدە مەڭگەرۋى ءتيىس», دەدى ول.
كەزدەسۋدە تاراپتار كەلەسى باعىتتار بويىنشا جۇمىس ىستەۋ تۋرالى كەلىسىمگە كەلدى:
- قازاقستان مەن شۆەيتساريا ۋنيۆەرسيتەتتەرى اراسىندا اكادەميالىق الماسۋ باعدارلامالارىن ىسكە قوسۋ;
- بىرلەسكەن قۇزىرەت ورتالىقتارى مەن عىلىمي-زەرتتەۋ الاڭدارىن قۇرۋ;
- حالىقارالىق مەكتەپتەردى دامىتۋ جانە مۇعالىمدەردى شۆەيتساريالىق ستاندارتتار بويىنشا دايارلاۋ;
- كاسىبي-تەحنيكالىق ءبىلىم بەرۋ سالاسىندا بىرلەسكەن باعدارلامالاردى ەنگىزۋ.
فارماتسەۆتيكا سالاسىنا ەرەكشە كوڭىل ءبولىندى. قازاقستان شۆەيتساريالىق جەتەكشى كومپانيالاردى ءدارى-دارمەك ءوندىرىسىن لوكاليزاتسيالاۋعا جانە مەديتسينا مەن فارماتسەۆتيكا ماماندارىن دايارلاۋ باعدارلامالارىنا تارتۋعا مۇددەلى ەكەنىن ءبىلدىردى.
سونىمەن قاتار تۋريزم باعىتى دا نازاردان تىس قالمادى. ەلىمىزدە جاڭا تۋريستىك باعىتتاردى دامىتۋعا, تۋريستىك قىزمەت ساپاسىن كوتەرۋگە جانە ۇلتتىق مادەني مۇرانى حالىقارالىق دەڭگەيدە ىلگەرىلەتۋگە شۆەيتساريا تاجىريبەسىن قولدانۋعا نيەتتى. ءوز كەزەگىندە شۆەيتساريا ەلشىسى بال سالمان ءوز ەلىنىڭ سەرىكتەستىكتى نىعايتۋعا دايىن ەكەنىن اتاپ ءوتتى.
«شۆەيتساريا قازاقستانمەن ءبىلىم, عىلىم, تۋريزم جانە فارماتسەۆتيكا سالالارىنداعى ىنتىماقتاستىقتى كەڭەيتۋگە مۇددەلى. ءبىز بىرلەسكەن جوبالارعا, ۋنيۆەرسيتەتتەر, عىلىمي ورتالىقتار, فارماتسەۆتيكالىق كومپانيالار مەن بيزنەس اراسىنداعى ارىپتەستىككە اشىقپىز. ىنتىماقتاستىعىمىز ادامي كاپيتالدى دامىتۋعا جانە ەكى ەلگە دە پايدا اكەلەتىنىنە سەنىمدىمىن», دەدى ديپلومات.
كەزدەسۋ قورىتىندىسى بويىنشا تاراپتار بىرلەسكەن جوبالاردىڭ جوسپارىن پىسىقتاپ, شۆەيتساريا كومپانيالارى مەن ءبىلىم بەرۋ ۇيىمدارىنىڭ وكىلدەرىمەن الداعى كەلىسسوزدەرگە ۇسىنىستار ازىرلەۋگە ۋاعدالاستى.
