ماۋلەن اشىمباەۆ موڭعوليا قازاقستاننىڭ وڭىردەگى سەنىمدى جانە ماڭىزدى سەرىكتەسى ەكەنىن ايتىپ, ەلدەرىمىزدى تەرەڭنەن تامىر تارتاتىن ورتاق داستۇرلەر مەن مادەني-تاريحي مۇرا بايلانىستىراتىنىن اتاپ ءوتتى. سونداي-اق ول قازاقستان مەن موڭعوليا اراسىنداعى ىنتىماقتاستىق مەملەكەت باسشىلارىنىڭ ەرىك-جىگەرىنىڭ ارقاسىندا ءوزارا قۇرمەت پەن سەنىم رۋحىندا دامىپ كەلە جاتقانىنا نازار اۋداردى.
سۇحبات كەزىندە قالىپتاسقان قارىم-قاتىناستى ارتتىرۋ جولىندا پارلامەنتارالىق ديالوگتى نىعايتۋدىڭ ماڭىزى جانە وسى باعىتتاعى مىندەتتەر كەڭىنەن ءسوز بولدى. اتاپ ايتقاندا, «قازاقستان-موڭعوليا» پارلامەنتتىك دوستىق توبى اياسىندا سالالىق كوميتەتتەردىڭ ىنتىماقتاستىعىن كەڭەيتۋ ماسەلەسىنە باسا ءمان بەرىلدى.
«ەكى ەلدىڭ مەملەكەت باسشىلارى اراسىنداعى قۇرمەت پەن سەنىمگە نەگىزدەلگەن قارىم-قاتىناس قازاقستان مەن موڭعوليا ىنتىماقتاستىعىن ودان ءارى نىعايتۋعا ۇلكەن ىقپالىن تيگىزىپ كەلەدى. قازاقستان پرەزيدەنتى قاسىم-جومارت توقاەۆتىڭ 2024 جىلى موڭعولياعا جاساعان مەملەكەتتىك ساپارى بارىسىندا ستراتەگيالىق ارىپتەستىك ورناتۋ تۋرالى بىرلەسكەن دەكلاراتسياعا, سونداي-اق ماڭىزدى ۇكىمەتارالىق جانە ۆەدومستۆوارالىق قۇجاتتارعا قول قويىلدى. وسى ورايدا ءبىز جوعارى دەڭگەيدە قول جەتكىزىلگەن ۋاعدالاستىقتاردى ىسكە اسىرۋعا ىقپال ەتۋ, پارلامەنتارالىق بايلانىستاردى نىعايتۋ جانە زاڭ شىعارۋ قىزمەتىندە تاجىريبە الماسۋ ءۇشىن موڭعوليانىڭ ۇلى مەملەكەتتىك حۋرالىمەن ىنتىماقتاستىقتى ودان ءارى تەرەڭدەتۋگە مۇددەلىمىز», دەي كەلە, م.اشىمباەۆ موڭعوليا دەلەگاتسياسىن ۇلى مەملەكەتتىك حۋرالدىڭ 35 جىلدىق مەرەيلى بەلەسىمەن قۇتتىقتادى.
سونىمەن قاتار سەنات توراعاسى مەملەكەت باسشىسىنىڭ باستاماسىمەن ەلىمىزدە جۇرگىزىلىپ جاتقان ساياسي جانە ەكونوميكالىق رەفورمالارعا, سونداي-اق پالاتانىڭ ولاردى زاڭنامالىق تۇرعىدا قامتاماسىز ەتۋ باعىتىنداعى قىزمەتىنە توقتالىپ ءوتتى.
ماۋلەن اشىمباەۆ رۋحاني ديپلوماتيانى دامىتۋدىڭ ماڭىزىنا دا نازار اۋداردى. ول الەمدىك جانە ءداستۇرلى دىندەر ليدەرلەرى سەزىنىڭ ماقسات-مۇددەلەرىن بەلسەندى قولداپ, وعان ەلەۋلى ۇلەس قوسقانى ءۇشىن موڭعوليانىڭ رۋحاني كوشباسشىلارىنا ريزاشىلىعىن ءبىلدىردى.
ءوز كەزەگىندە داشزەگۆين امارباياسگالان قازاقستاندا جۇرگىزىلىپ جاتقان قوعامدىق-ساياسي جاڭعىرۋلارعا جوعارى باعا بەرىپ, پارلامەنتارالىق ءوزارا ءىس-قيمىلدى نىعايتۋعا جانە ەكىجاقتى قارىم-قاتىناستىڭ شارتتىق-قۇقىقتىق بازاسىن كەڭەيتۋگە مۇددەلى ەكەنىن تىلگە تيەك ەتتى. سونداي-اق ول قازاقستاننىڭ جاھاندىق سىن-قاتەرلەردى ەڭسەرۋ ءۇشىن رۋحاني ديپلوماتيانى ىلگەرىلەتۋ باعىتىندا قولعا العان قادامدارى ەرەكشە مانگە يە ەكەنىن ايتتى.
كەزدەسۋ بارىسىندا تاراپتار ساۋدا-ەكونوميكالىق جانە ينۆەستيتسيالىق ىنتىماقتاستىقتى ارتتىرۋ ماسەلەسىنە دە كوڭىل ءبولدى. ورنىقتى دامۋ ماقساتتارىنا قول جەتكىزۋ, اۋىل شارۋاشىلىعى, تاۋ-كەن مەتاللۋرگيا كەشەنى, زاماناۋي تەحنولوگيالار, عارىشتى يگەرۋ جانە باسقا دا سالالارداعى بىرلەسكەن جوبالاردى ىسكە اسىرۋ تەتىكتەرى تالقىلاندى. ودان بولەك, سۇحبات كەزىندە حالىقارالىق جانە وڭىرلىك كۇن تارتىبىندەگى وزەكتى ماسەلەلەر اڭگىمەگە ارقاۋ بولدى.
