3 قىركۇيەكتە س.تانگال مىرزا ەلشىلىكتە ەلىمىزدىڭ بىرقاتار باق وكىلدەرىن قابىلداپ, ءوزىنىڭ الداعى جۇمىسى جايىندا بايانداپ, ەكى ەلدىڭ بايلانىسىن ودان ءارى تەرەڭدەتۋ تۋرالى ويلارىمەن ءبولىستى.
«مەن جاقىندا جوعارى مارتەبەلى قاسىم-جومارت توقاەۆقا سەنىم گراموتاسىن تابىستادىم. قازاقستان سەكىلدى عاجايىپ ءارى جەدەل دامىپ كەلە جاتقان ەلدە ءۇندىستان رەسپۋبليكاسىنىڭ وكىلى رەتىندە قىزمەت ەتۋ – مەن ءۇشىن ۇلكەن ابىروي. ءۇندىستان مەن قازاقستاندى كوپعاسىرلىق باي تاريحىمىز, مادەني ۇقساستىعىمىز جانە ءوزارا قۇرمەت بايلانىستىرادى. قازىرگى تاڭدا ءبىزدىڭ قارىم-قاتىناسىمىز ستراتەگيالىق سەرىكتەستىك نەگىزىندە دامىپ كەلەدى. قازاقستان ءۇندىستاننىڭ «كەڭەيتىلگەن كورشىلىك» ساياساتىندا ايرىقشا ورىن الادى», دەدى ەلشى.
ونىڭ ايتۋىنشا, ەكى مەملەكەت بۇۇ, شىۇ, ازياداعى ءوزارا ىقپالداستىق پەن سەنىم شارالارى جونىندەگى كەڭەس سەكىلدى ۇيىمدار اياسىندا سەنىمدى وداقتاس سانالادى. تاراپتار ەنەرگەتيكا, فارماتسەۆتيكا, اقپاراتتىق تەحنولوگيا, عارىشتى يگەرۋ, قورعانىس, ءبىلىم, مادەني سالالاردا ىنتىماقتاسىپ جۇمىس جۇرگىزىپ كەلەدى جانە ءالى دە ىسكە اسىرىلماعان ءوزارا بايلانىس الەۋەتتەرى جوعارى.
«الداعى ايلاردا قازاقستان ۇكىمەتىمەن, بيزنەس قاۋىمداستىقپەن, اكادەميالىق ورتامەن جانە جالپى قوعاممەن بايلانىسىمىزدى تەرەڭدەتە بەرەمىز دەگەن ۇمىتتەمىن. ءوزارا بارىس-كەلىس, ىسكەرلىك ميسسيالار جانە مادەني باستامالارىمىز جالعاسىن تاۋىپ, حالىقتارىمىزدىڭ جاقىنداسۋى مەن ستراتەگيالىق سەرىكتەستىگىمىزدىڭ دامۋىنا ۇلەسىمىزدى قوسا بەرەمىز», دەدى س.تانگال.
ەلشىمەن كەزدەسۋ ءوزارا پىكىر الماسۋ تۇرىندە ءوتىپ, جۋرناليستەر تاراپىنان ەكونوميكا, ءبىلىم, جاساندى ينتەللەكت سالالارىنداعى بايلانىستار مەن تاجىريبە الماسۋلار جونىندە سۇراقتار قويىلدى. س.تانگال قازىرگى تاڭدا ءبىزدىڭ ەلىمىزدە, اتاپ ايتقاندا, الماتى, استانا, قاراعاندى, سەمەي, پەتروپاۆل قالالارىندا 12 مىڭداي ءۇندى ستۋدەنتى ءبىلىم الاتىنىن, ولاردىڭ باسىم بولىگى مەديتسينالىق ماماندىقتاردى تاڭداعانىن اتاپ ءوتتى. سونىمەن قاتار كەيىنگى جىلدارى قازاقستانعا كەلەتىن ءۇندى تۋريستەرىنىڭ دە سانى ارتىپ كەلەدى.
