وتىرىسقا ءماجىلىس دەپۋتاتتارى, كونستيتۋتسيالىق سوتتىڭ, ادىلەت مينيسترلىگىنىڭ, سوت اكىمشىلىگىنىڭ, ورتالىق سايلاۋ كوميسسياسىنىڭ, پارلامەنتاريزم ينستيتۋتىنىڭ وكىلدەرى, سونداي-اق تاۋەلسىز ساراپشىلار قاتىستى. دوڭگەلەك ۇستەل اشىلۋىندا ءسوز العان قحپ توراعا ورىنباسارى, فراكتسيا جەتەكشىسى, ءماجىلىس دەپۋتاتى ماگەررام ماگەرراموۆ كونستيتۋتسيا مەملەكەتىمىزدىڭ تىرەگى ءارى قۇقىقتىق جۇيەنىڭ نەگىزى ەكەنىن ايتتى.
«كەيىنگى 30 جىل ىشىندە كونستيتۋتسيا ەلىمىزدىڭ مەملەكەتتىلىگىن نىعايتىپ, ازاماتتاردىڭ قۇقىعى مەن ەركىندىگىن قامتاماسىز ەتەتىن باستى قۇجاتقا اينالدى. ول دەموكراتيالىق ينستيتۋتتاردىڭ دامۋىنا جول اشىپ, قوعامدى ورتاق قۇندىلىقتار توڭىرەگىنە توپتاستىردى. ەلدىڭ دامۋ باعىتىن ايقىنداپ, جاڭعىرۋ ۇدەرىسىنىڭ ىرگەتاسىنا اينالدى. بۇگىندە وسى كەزەڭگە كوز جۇگىرتسەك, اتا زاڭىمىزدىڭ تاۋەلسىزدىكتى بەكەمدەۋدە, قۇقىقتىق مەملەكەت قۇرۋدا, زاڭ ۇستەمدىگىن قامتاماسىز ەتۋدە, سونداي-اق ەل ىشىندەگى تۇراقتىلىق پەن تىنىشتىقتى ساقتاۋدا ماڭىزدى ءرول اتقارعانىن بايقايمىز. كونستيتۋتسيانىڭ 30 جىلدىعى – قوعام الدىندا تۇرعان جاڭا سىن-قاتەرلەردى تالقىلاۋعا, قۇقىقتىق جۇيەنىڭ ءارى قاراي دامۋى مەن كونستيتۋتسيانىڭ ءاربىر ازاماتتىڭ ومىرىندەگى ءرولى جونىندە پىكىر الماسۋعا مۇمكىندىك», دەيدى دەپۋتات.
جيىندا 2022 جىلعى رەفەرەندۋمنان كەيىن كونستيتۋتسياعا 33 باپ بويىنشا 56 تۇزەتۋ ەنگىزىلگەنى تۋرالى ايتىلدى. وسى رەتتە ءماجىلىس دەپۋتاتى مارات ءباشىموۆ كونستيتۋتسيالىق باقىلاۋ جونىندە بايانداما جاساپ, بۇل مەحانيزمنىڭ زاڭ ۇستەمدىگىن قامتاماسىز ەتۋدەگى ماڭىزدىلىعىن اتاپ ءوتتى.
«ەنگىزىلگەن وزگەرىستەردىڭ باستى ماقساتى – ادام قۇقىقتارىن جوعارى دەڭگەيگە كوتەرۋ, قوعامدىق باقىلاۋدى كۇشەيتۋ, قۇقىق قورعاۋ ينستيتۋتتارىن دامىتۋ بولدى. بۇگىندە كونستيتۋتسيالىق سوت وتە ءتيىمدى جۇمىس ىستەپ جاتىر. تەك بيىلدىڭ وزىندە كونستيتۋتسيالىق سوتقا 2450 ءوتىنىش كەلىپ ءتۇستى. ەڭ ماڭىزدىسى – كەز كەلگەن ازاماتتىڭ سوتقا تىكەلەي جۇگىنۋ قۇقىعى بار. مۇنداي مۇمكىندىك كوپ ەلدەردىڭ زاڭدارىندا جوق. ال بىزدە ءار ازامات, ەگەر قانداي دا ءبىر زاڭ نورماسى كونستيتۋتسياعا قايشى دەپ ەسەپتەسە, ءوتىنىش بەرە الادى. سونداي-اق ادام قۇقىقتارى جونىندەگى ۋاكىلدىڭ قۇزىرەتى كۇشەيتىلىپ, شالعاي ايماقتاردا وكىلدىكتەر قۇرىلدى. بۇل دا جايدان-جاي ەمەس. قازىر جاڭا كونستيتۋتسيانىڭ نورمالارى مەن قاعيداتتارىنا سۇيەنىپ ءومىر ءسۇرىپ جاتقان جاڭا بۋىن ءوسىپ كەلەدى. بۇل – حالقىمىز ءۇشىن ۇلكەن يگىلىك», دەيدى م.ءباشىموۆ.
باسقوسۋ قورىتىندىسىندا قاتىسۋشىلار مەرەيلى 30 جىلدىق اياسىندا كونستيتۋتسيانى تەك تاريحي قۇجات رەتىندە قۇرمەتتەپ قانا قويماي, ونىڭ قاعيداتتارىن كۇندەلىكتى ومىردە باسشىلىققا الۋ, قۇقىقتىق مادەنيەتتى قالىپتاستىرۋ جانە ازاماتتىق جاۋاپكەرشىلىكتى كۇشەيتۋ قاجەت ەكەنىن جەتكىزدى.
