فوتو: اشىق دەرەككوز
بيىل ۇاتو-نى نەگىزگى قارجىلاندىرۋ كولەمى 2,6 ملرد تەڭگەگە ارتقان, ال 2024–2026 جىلدارى باعدارلامالىق-ماقساتتى قارجىلاندىرۋعا جىل سايىن 9,6 ملرد تەڭگە باعىتتالادى.
سونىمەن قاتار زاماناۋي زەرتتەۋ زەرتحانالارىن قۇرۋعا جانە حالىقارالىق ىنتىماقتاستىققا ايرىقشا كوڭىل ءبولىنىپ كەلەدى. وتكەن جىلدان باستاپ ەلىمىزدە قىتايمەن بىرلەسكەن بيولوگيالىق قاۋىپسىزدىك زەرتحاناسى جانە ءدان ساپاسىن انىقتايتىن زەرتحانا جۇمىس ىستەي باستادى.
2025 جىلعى ماۋسىمدا ورگانيكالىق ونىمدەردى سەرتيفيكاتتاۋ ورتالىعى جانە حالىقارالىق سانيتارلىق جانە ۆەتەرينارلىق ستاندارتتارعا سايكەس تاماق قاۋىپسىزدىگى زەرتحاناسى اشىلدى. اتالعان ورتالىقتار پەستيتسيد قالدىقتارى, ميكوتوكسيندەر, اۋىر مەتالدار جانە انتيبيوتيكتەردى تالداۋعا مۇمكىندىك بەرىپ قانا قويماي, «جاسىل» ءوندىرىس ستاندارتتارىن ەنگىزۋگە جول اشادى.
2024 جىلى اقتوبە وبلىسىندا جىلقى شارۋاشىلىعى جانە جەموندىرۋ ينستيتۋتىنىڭ قۇرىلۋى ماڭىزدى وقيعا بولدى. ونىڭ قىزمەتى – جىلقى تۇقىمدارىن جەتىلدىرۋ جانە وتاندىق جەم بازاسىن دامىتۋعا باعىتتالعان.
ايتا كەتەيىك عىلىمي جوبالاردىڭ قاتارىنا اۋىل شارۋاشىلىعى ونىمدەرىن گەنەتيكالىق پاسپورتتاۋ, كليماتقا بەيىمدەلگەن ەگىنشىلىك جانە سەنسورلار, دروندار مەن AI-مونيتورينگ جۇيەلەرىن قولداناتىن «اقىلدى فەرمالاردىڭ» تسيفرلىق مودەلدەرى كىرەدى. سونداي-اق قىتاي, نيدەرلاندى, اقش, فرانتسيا, ۇلىبريتانيا جانە باسقا ەلدەردىڭ عىلىمي ورتالىقتارىمەن حالىقارالىق عىلىمي ىنتىماقتاستىق جۇرگىزىلىپ جاتىر.
2027–2029 جىلدارعا «Agri Export» (ونىمدەردى گەنەتيكالىق سايكەستەندىرۋ, ورگانيكالىق ءونىم ءوندىرىسى, كليماتقا ءتوزىمدى تەحنولوگيالار) جانە «Agri Future» (AgriTech-ينكۋباتور, «اوك-ءتىڭ 100 جاس عالىمى» باعدارلاماسى, فەرمەرلەردى VR/AR ارقىلى وقىتۋ, جاڭا بۋىن تسيفرلىق فەرمالار) باعدارلامالارى ازىرلەنگەن. بۇل باستامالار قازاقستاننىڭ اوك-ءىن عالامدىق عىلىمي جەلىلەرگە ينتەگراتسيالاۋعا نەگىزدەپ, سالانى تەحنولوگيالىق سەرپىنگە شىعارۋعا جاعداي جاسايدى.
وسىلايشا, اگرارلىق عىلىم اۋىل شارۋاشىلىعىن جاڭعىرتۋدىڭ باستى قۇرامداس بولىگىنە اينالىپ, ونىڭ باسەكەگە قابىلەتتىلىگىن, يننوۆاتسيالىق سيپاتىن جانە ۇزاق مەرزىمدى تۇراقتى دامۋىن قامتاماسىز ەتەدى.
«اتالعان ناتيجەلەر – اگرارلىق سەكتوردى قاجەتتى رەسۋرستارمەن قامتاماسىز ەتۋ بويىنشا اتقارىلعان جۇمىستىڭ تىكەلەي ناتيجەسى. اۋىل شارۋاشىلىعى مينيسترلىگى قولداۋ شارالارىن جەتىلدىرۋدى, ساياساتتىڭ اشىقتىعى مەن ناتيجەلىلىگىن قامتاماسىز ەتۋدى جانە ەڭ باستىسى, اۋىل تۇرعىندارى مەن اگرارلار ءۇشىن مۇمكىندىكتەردى كەڭەيتۋدى جالعاستىرادى», دەدى ايداربەك ساپاروۆ.
پرەزيدەنتتىڭ جولداۋىن ىسكە اسىرۋدا ۇكىمەتتىڭ اگروونەركاسىپ كەشەنىندە جۇرگىزىپ وتىرعان شارالارى جۇيەلى ءتاسىل قولدانىلىپ وتىرعانىن كورسەتەدى. مال شارۋاشىلىعى مەن وسىمدىك شارۋاشىلىعىنان باستاپ تەرەڭ قايتا وڭدەۋ مەن عىلىمي زەرتتەۋلەرگە دەيىن تۇراقتى دامىپ وتىر. ينۆەستيتسيالىق تارتىمدىلىق قامتاماسىز ەتىلىپ, يمپورتتى الماستىرۋ مەن ەكسپورتتى كوبەيتۋگە قاجەتتى نەگىز جاسالدى.
