ء«بىز جاز بويى ەلىمىزدىڭ ءار ءوڭىرىن ارالاپ, حالىقپەن جۇزدەسىپ, ولاردىڭ مۇڭ-مۇقتاجىنا, كوكەيدەگى ماسەلەلەرىنە قۇلاق تۇردىك. بۇل ساپار تەك كەزدەسۋ ماقساتىندا ەمەس, ناقتى پروبلەمالاردى زەرتتەپ, شەشۋ جولدارىن قاراستىرۋ ءۇشىن ۇيىمداستىرىلدى. ءوزىم استانا قالاسى مەن اقمولا وبلىسىن ارالاۋ بارىسىندا قوعامدا شەشىمىن تابۋدى قاجەت ەتەتىن بىرقاتار وزەكتى ماسەلەنى نازارعا الدىم.سونىڭ ءبىرى – الەۋمەتتىك جەلىلەردەگى زاڭسىز ۇتىس ويىندارى مەن لوتەرەيالار. سونىمەن قاتار «وڭاي تابىسقا جەتۋ» يدەولوگياسىن ناسيحاتتايتىن كۋرستار مەن ترەنينگتەردىڭ كوبەيىپ, ولاردىڭ قوعامعا كەرى ءاسەر ەتە باستاعانىن انىق بايقادىم. بۇل – قازىرگى تاڭدا جالپى حالىقتىڭ الاڭداۋشىلىعىن تۋدىرىپ وتىرعان ۇلكەن پروبلەما», دەدى گ.شيپوۆسكيح.
سەناتوردىڭ سوزىنشە, بۇگىندە كەي بلوگەرلەر مەن ينفليۋەنسەرلەر زاڭدى بەلدەن باسىپ, اشىق تۇردە ءتۇرلى GIF, ۇتىس ويىندارى, مارافوندار مەن جالعان كۋرستار ۇيىمداستىرىپ, جۇرتشىلىقتى «تەز ءارى وڭاي بايىتامىن» دەگەن جەلەۋمەن جۇرتشىلىقتى الداپ, ماتەريالدىق پايدا تابۋعا كوشكەن.
«مۇنداي قۇبىلىستىڭ سالدارى تەك قارجىلىق شىعىنمەن شەكتەلمەيدى. ەڭ قاۋىپتىسى – جاستاردىڭ ساناسى بىرتىندەپ ۋلانىپ جاتىر. ادال ەڭبەككە دەگەن قۇرمەت تومەندەپ, ونىڭ ورنىنا جالعان جىلتىر ومىرگە سەنۋ, شىنايى قۇندىلىقتاردان الشاقتاۋ تەندەنتسياسى بەلەڭ الىپ بارادى. بۇرىن «ەڭبەكپەن تاپقان نان – ءتاتتى» دەگەن ۇستانىم ۇرپاق تاربيەسىنىڭ وزەگىندە تۇرسا, قازىر الەۋمەتتىك جەلىدەگى «اۋا ساتىپ, اقشا تابۋ» يدەولوگياسى ورنىن باسقان. بۇل – وتە قاۋىپتى باعىت. ال ءبىز, كەرىسىنشە, ناقتى ەڭبەككە, جۇمىسشى ماماندىقتارعا دەگەن قۇرمەتتى ارتتىرۋ ءۇشىن ناقتى قادامدار جاساپ الەكپىز. ماسەلەن, بيىل جۇمىسشى ماماندىقتارى جىلى دەپ جاريالاندى», دەدى سەنات دەپۋتاتى.
دەپۋتات ءوز سوزىندە قازىرگى كۇماندى كۋرستار مەن ترەنينگتەردىڭ ەش عىلىمي نەگىزسىز, مانيپۋلياتسياعا قۇرىلعانىن باسا ايتتى. ونىڭ پىكىرىنشە, مۇنداي قىزمەت تۇرلەرىن زاڭ جۇزىندە شەكتەۋ – ۋاقىت تالابى.
«جاقىندا الەۋمەتتىك جەلىدە ءبىر وتباسى كولىك ويناتىپ, وعان قاتىسۋ ءۇشىن ادامداردى ارنايى كۋرسقا جازىلۋعا ماجبۇرلەگەنى تۋرالى اقپارات تارادى. بۇل – كلاسسيكالىق مانيپۋلياتسيا. مۇنداي تاسىلدەر قوعامنىڭ قۇقىقتىق قاۋىپسىزدىگىنە تىكەلەي نۇقسان كەلتىرەدى. تاعى ءبىر مىسال, الەۋمەتتىك جەلى بەلسەندىسى زاڭسىز جارناما جاساپ, بەس مارتە اكىمشىلىك ايىپپۇل ارقالاعانىنا قاراماستان, سول ارەكەتىن جالعاستىرىپ وتىر. بۇل نەنى بىلدىرەدى؟ دەمەك, كەيبىر ازاماتتار ءۇشىن اكىمشىلىك جازا توقتاۋ ەمەس, جاي عانا «فورمالدىلىق» بولىپ قالعان», دەدى گ.شيپوۆسكيح.
وسىعان بايلانىستى قارجىلىق مونيتورينگ اگەنتتىگىمەن بىرلەسىپ ارنايى دەپۋتاتتىق ساۋال ازىرلەنگەن. وندا الەۋمەتتىك جەلىدەگى زاڭسىز ۇتىس ويىندارى مەن جارنامالارعا قاتىستى قىلمىستىق جاۋاپكەرشىلىك ەنگىزۋ تۋرالى ناقتى ۇسىنىستار قامتىلعان.
«حالىق اراسىندا «ايۋعا ناماز ۇيرەتكەن – تاياق» دەگەن ءسوز بار. ءبىز دە قوعامنىڭ ساناسىنا تەرىس اسەر ەتەتىن مۇنداي زاڭ بۇزۋشىلارعا ناقتى ءارى ءتيىمدى قۇقىقتىق تەتىك قولدانۋىمىز قاجەت. اكىمشىلىك ايىپپۇل بۇل زاڭبۇزۋشىلاردى توقتاتا الماي وتىر. كەرىسىنشە, ولار ايىپپ ۇلىن تولەپ, زاڭسىز ارەكەتىن جالعاستىرا بەرەدى. سوندىقتان قايتالاناتىن قۇقىقبۇزۋشىلىق ءۇشىن قىلمىستىق جازا قولدانۋ قاجەت. بۇل – ۋاقىت كۇتتىرمەيتىن ماسەلە», دەدى سەناتور.
ونىڭ ايتۋىنشا, بۇل باستاما الداعى جالپى وتىرىستا تالقىلانىپ, ءتيىستى مەملەكەتتىك ورگاندارعا جولدانادى. سونىمەن قاتار, بۇل تۇيتكىلدى ماسەلە ساراپشىلاردىڭ پىكىرى نەگىزىندە دە قارالادى.
«جاڭا قازاقستان – ادىلەتتى زاڭدارمەن عانا ەمەس, ادال ەڭبەككە نەگىزدەلگەن مادەنيەتپەن, شىنايى قۇندىلىقتاردى دارىپتەيتىن ازاماتتارمەن قالىپتاسۋعا ءتيىس. ءبىز وسىعان سەنەمىز جانە سول باعىتتا جۇيەلى ءتۇردە جۇمىس ىستەۋدى جالعاستىرامىز», دەپ ءسوزىن تۇيىندەدى گەننادي شيپوۆسكيح.
