«بايقونىس اۋىلىندا اشىلعان جاڭا مەكتەپ مەملەكەت باسشىسىنىڭ اپاتتى جانە ءۇش اۋىسىمدى مەكتەپتەردى ازايتۋ تاپسىرماسى اياسىندا ىسكە استى», دەيدى وبلىستىق باسقارماسىنىڭ باسشىسى ەلدوس سافۋللين.
جاڭا مەكتەپ زاماناۋي ءبىلىم بەرۋ تالاپتارىنا تولىقتاي ساي كەلەدى. مۇندا STEM, روبوتوتەحنيكا, ۆيزۋالدى ديزاين, حورەوگرافيا كابينەتتەرى, ەرەكشە ءبىلىمدى قاجەت ەتەتىن بالالارعا ارنالعان سەنسورلىق جانە ينكليۋزيۆتى كابينەتتەر, كەڭ دە جارىق وقۋ بولمەلەرى, سپورت جانە اكت زالدارى قامتىلعان.
بۇرىن ترەكين, قازىر بايقونىس اتالاتىن بۇل اۋىلدا العاشقى قازاق مەكتەبى 1998 جىلى اشىلعان بولاتىن. باستاپقىدا مەكتەپ تابالدىرىعىن 62 وقۋشى اتتاسا, ورالعا 11 پەداگوگ ساباق بەردى. 2007 جىلى مەكتەپ ەكى قاباتتى جاڭا عيماراتقا كوشتى. از ۋاقىتتا ەرەكشە جەتىستىكتەرىمەن كوزگە تۇسكەن مەكتەپ ۇجىمى 2018 جىلى حالىقارالىق يۋنەسكو كلۋبتارىنىڭ قاتارىنا ەندى. 2021 جىلدان بەرى اقىن قادىر مىرزا ءالى ەسىمىن يەلەنگەن ورتا مەكتەپ بيىل سۋ جاڭا «كەلەشەك مەكتەپ» عيماراتىنا كوشىپ وتىر.
جاڭا عيمارات 600 ورىنعا ەسەپتەلگەن, جالپى قۇنى – 4,9 ملرد تەڭگە, مۇندا 33 وقۋ كابينەتى بار. كابينەتتىڭ بارلىعى ينتەراكتيۆتى تاقتامەن جابدىقتالعان. سونىمەن قاتار, ءتيىستى قۇرالدارمەن جابدىقتالعان بەينەلەۋ ونەرى, گرافيكا جانە جوبالاۋ, ديزاين جانە تەحنولوگيا, تاماقتانۋ مادەنيەتى, ءۇي مادەنيەتى, ينفورماتيكا كابينەتتەرى, 2 سپورتزال, كىتاپحانا, 138 ورىندىق اكت زالى, 176 ورىندىق اسحاناسى بار. مەكتەپ اۋلاسىندا بالالار ويىن الاڭى, فۋتبول, باسكەتبول, جۇگىرۋ جولدارى الاڭدارى بار. بيىلعى وقۋ جىلىندا مەكتەپتەگى 24 سىنىپتاعى 510 وقۋشى تۇسكە دەيىن, 4 سىنىپتاعى 70 وقۋشى ەكىنشى اۋىسىمدا ءبىلىم الادى. وقىتۋ قازاق تىلىندە جۇرەدى. بيىل ءبىرىنشى سىنىپقا 50 وقۋشى, مەكتەپالدى دايارلىق سىنىبىنا 47 بالا قابىلدانعان.
