ميسسيا اياسىندا امەريكالىق دارىگەرلەر 10 كۇردەلى رەكونسترۋكتيۆتىك وپەراتسيا جۇرگىزدى. پاتسيەنتتەر قاتارىندا تۋا بىتكەن اقاۋلارمەن نەمەسە اۋىر جاراقاتتان كەيىنگى اسقىنۋلارمەن كۇرەسىپ جۇرگەن بالالار مەن ەرەسەكتەر بولدى. جولعا قويىلعان وتالار تەك ەمدەۋگە عانا ەمەس, قازاقستاندىق مامانداردىڭ كاسىبي بىلىكتىلىگىن ارتتىرۋعا باعىتتالدى. وپەراتسيالار تاجىريبەلىك ساباق رەتىندە تىكەلەي ەفيردە ەلىمىزدىڭ 15 وڭىرىندەگى دارىگەرلەرگە كورسەتىلىپ, 150-گە جۋىق مامان جاڭا ءبىلىم الىپ, سەرتيفيكاتقا يە بولدى.
بۇل يگى ءىستىڭ جۇزەگە اسۋىنا اقش-تا تۇراتىن بەس وتانداسىمىز باستاماشى بولدى. اينۇر رودجەرس, گۇلنار فەبرەس, توقجان بالدەرستون, ءالفيا بيكينەەۆا جانە كسەنيا كامەنەۆا قۇرعان KCBANA اسسوتسياتسياسى ميسسيانىڭ نەگىزگى ۇيىمداستىرۋشىسى اتاندى. اسسوتسياتسيا رەسمي تۇردە جىل بۇرىن تىركەلگەنىمەن, پاندەميا كەزىندە-اق ەل دارىگەرلەرىنە كومەك كورسەتىپ, ەمگە مۇقتاج بالالاردى قولداۋمەن اينالىسا باستاعان ەدى.
KCBANA مۇشەلەرى ءداستۇرلى جولدان باس تارتىپ, پاتسيەنتتەردى شەتەلگە جىبەرۋدىڭ ورنىنا امەريكالىق مامانداردى قازاقستانعا شاقىرۋدى ءجون كوردى. مۇنداي ءتاسىل كوپ ادامعا بىردەن كومەك كورسەتىپ قانا قويماي, وتانىڭ ءۇي جاعدايىنا جاقىن, قولايلى ورتادا جاسالۋىنا مۇمكىندىك بەردى.
«ەگەر بۇل جوبا كەم دەگەندە ءبىر بالاعا كومەكتەسسە, سونىڭ ءوزى جەڭىس بولار ەدى», دەيدى KCBANA-نىڭ نەگىزىن قالاۋشىلاردىڭ ءبىرى اينۇر رودجەرس.
ونىڭ ايتۋىنشا, دايىندىق كەزەڭىندە كوماندا بار ۋاقىتىن وسى ىسكە ارناعان.
«تۇندە, دەمالىس كۇندەرى, نەگىزگى جۇمىسىمىزدان كەيىن ەڭبەك ەتتىك. العاشقى كۇنى بالالاردى كورگەندە بار شارشاۋىمىز ۇمىتىلدى», دەپ ەسكە الدى ول.
ميسسياعا پلاستيكالىق حيرۋرگ داررين حيۋبەرت, بەت جۇيكەسى سالاسىنداعى جەتەكشى مامان توماس لي, وپەراتسيالىق مەدبيكە مەريلين بەيگەن جانە پيتتسبۋرگ ۋنيۆەرسيتەتىندە ءبىلىم العان, بۇگىندە اقش-تا قىزمەت اتقارىپ جۇرگەن وتانداسىمىز جازيرا يرگەباي قاتىستى.
«الداعى ۋاقىتتا قازاقستان مەن اقش دارىگەرلەرى اراسىندا جاڭا ىنتىماقتاستىق جوبالارى ىسكە اسادى دەپ سەنەمىز», دەيدى اينۇر رودجەرس.
