جاڭا وقۋ جىلىندا ءبىرىنشى سىنىپقا 6 400-دەي جەتكىنشەك بارادى. سونىڭ 3 مىڭعا جۋىعى قىزىلجاردىڭ وزىندە بولسا, ال قالعانى – وبلىس اۋماعىنداعى ەلدى مەكەندەردە. سونىمەن قاتار 279 اۋىلداعى ءۇش مىڭنان اسا وقۋشىنى 150 اۆتوبۋس تاسىمالداپ, مەكتەپكە جەتكىزەدى.
وبلىستىق ءبىلىم باسقارماسىنىڭ باسشىسى ايناگۇل سۇراعانوۆانىڭ ايتۋىنا قاراعاندا, مەكتەپ جاسىنداعى بىردە-ءبىر بالا وقۋدان تىس قالمايدى. وبلىستا تابىسى تومەن وتباسىلاردا 8 مىڭنان ارتىق وقۋشى بار, ولاردى قامتاماسىز ەتۋگە بيۋدجەتتەن 1,5 ملرد تەڭگە قاراستىرىلعان. بۇل بيۋدجەتتەن جالپى ءبىلىم بەرەتىن مەكتەپتەردى ۇستاۋعا بولىنگەن بيىلعى قارجىنىڭ 1,5 پايىزى. از قامتىلعان وتباسىلارعا «مەكتەپكە جول» اكتسياسى اياسىندا تامىزدىڭ باسىنان باستاپ 46 228 تەڭگەدەن ءبىر رەتتىك كومەك جاسالعان. بۇگىنگە دەيىن 4 مىڭنان اسا وقۋشىنىڭ اتا-اناسى ونى الىپ ۇلگەردى.
وبلىس كولەمىندەگى 24 كوللەدجدە 11 مىڭعا جۋىق ءجاسوسپىرىم وقيدى. بيىل ءبىرىنشى كۋرس تابالدىرىعىن 4 مىڭعا جۋىق تۇلەك اتتايدى. ولاردىڭ 50 پايىزعا جۋىعى جۇمىسشى ماماندىعىن تاڭداعان.
مەكتەپتەردى جاڭا وقۋ جىلىنا دايىنداۋ جۇمىستارى بەلگىلەنگەن جوسپارعا سايكەس ىسكە اسىرىلدى. ماسەلەن, شال اقىن اۋدانىنداعى جالتىر مەكتەبى, پرەسنوۆ اۋىلىنداعى ينتەرنات, اققايىڭ اۋدانىنداعى اگرارلىق كوللەدج كۇردەلى جوندەۋدەن وتكىزىلدى. «كەلەشەك مەكتەپتەرى» ۇلتتىق جوباسى اياسىندا سالىنىپ جاتقان پەتروپاۆلدىڭ «بەرەكە» شاعىن اۋدانىنداعى 600 ورىندىق مەكتەپ قۇرىلىسى 1 قىركۇيەكتە اياقتالىپ, جاڭا وقۋ جىلىنا ەسىگىن ايقارا اشپاق. قازىردىڭ وزىندە وندا وقۋعا 500-دەن ارتىق ءوتىنىش تۇسسە, سونىڭ 116-سى عانا قازاق تىلىندە وقۋدى قالاعان. بۇل مەملەكەتتىك ءتىلدى ۇيرەنۋگە, وقۋعا دەگەن قۇلشىنىستى تۋدىرۋعا ەلىمىزدەگى ءبىلىم بەرۋ قىزمەتىنىڭ كوڭىل اۋدارۋى كەمشىن ەكەنىن كورسەتەدى.
وبلىستىق ءبىلىم سالاسىنداعى ساپانى قامتاماسىز ەتۋ دەپارتامەنتىنىڭ باسشىسى گۇلنار تالاسباەۆانىڭ ايتۋىنا قاراعاندا, مەكتەپتەردىڭ جۇمىسى مەن ماتەريالدىق ساپاسىنا مونيتورينگ ۇزبەي جاسالادى. بيىلعى وقۋ جىلىندا وبلىستىڭ ءبىلىم سالاسىندا 16 128 پەداگوگ – قىزمەت ەتەدى. سونىڭ 11,6 مىڭى مەكتەپ مۇعالىمدەرى. جاڭا وقۋ جىلىندا 985 مامان جەتىسپەيدى, ونىڭ 675-ءى اۋىل مەكتەپتەرىندە. وبلىستاعى 444 مەكتەپتىڭ 44-ىندە باسشى جوق.
گ.تالاسباەۆانىڭ سوزىنشە, وبلىستاعى جاڭعىرتۋ باعدارلاماسىنا 83 مەكتەپ ەنگىزىلگەن, دەپارتامەنت سونىڭ 42-سىنە مونيتورينگ جاساعان. مەكتەپتەر باسقا جيھازداردان گورى ءبىلىم وشاعىنىڭ اسحاناسىنا جاراقتار الۋدا بەلسەندىلىكپەن كوزگە تۇسكەن. 42 مەكتەپتىڭ 38-ىندە قاۋىپسىزدىك شارالارىن جولعا قويۋ دۇرىس ساپاعا جەتكىزىلگەن. وكىنىشكە قاراي, ءالى كۇنگە دەيىن 27 مەكتەپ اتتەستاتسيالاۋدان وتپەگەن.
وبلىستاعى م.قوزىباەۆ اتىنداعى سولتۇستىك قازاقستان ۋنيۆەرسيتەتىندە بيىلعى وقۋ جىلىندا 5 835 ستۋدەنت وقيدى. ونىڭ نەگىزگى بولىگى, ياعني 5 354 باكالاۆر, 286 ماگيسترانت, 14 دوكتورانت. بىلتىر جوعارى وقۋ ورنىن اياقتاعان تۇلەكتەردىڭ 84 پايىزى جۇمىسقا ورنالاسقان. بيىل «سەرپىن» باعدارلاماسىمەن 65 تۇلەك ۋنيۆەرسيتەتتى ءتامامداسا, سونىڭ 63-ءى جۇمىسقا قابىلدانعان.
جاڭا وقۋ جىلىندا كوشە مەن مەكتەپ قاۋىپسىزدىگىنە ەرەكشە ءمان بەرىلىپ وتىر. وسىعان وراي وبلىستىق پد وزدەرىنىڭ جۇمىسىن بىرنەشە باعىتقا بولگەن. مەكتەپ ماڭىنداعى جول قاۋىپسىزدىگى – سونىڭ العاشقى باعىتى. اكىمشىلىك پوليتسياسى بۇل باعىت بويىنشا جول بەلگىلەرىنىڭ, ايرىقتارىنىڭ انىق جانە بالالارعا كورنەكى بولۋىن قاداعالايدى.
سونداي-اق 31 تامىزدان باستاپ, 9 قىركۇيەككە دەيىن «اباي بولىڭىزدار, بالالار!» اتتى اكتسيا جۇرگىزىلەدى.
سولتۇستىك قازاقستان وبلىسى
