ەلشى اۋەجاي باسشىلىعىن قر ۇكىمەتىنىڭ اۆياتسيا سالاسىن جاڭعىرتۋ, التى حالىقارالىق اۋە حابىن دامىتۋ, سونداي-اق ۇلتتىق جۇك اۋە تاسىمالداۋشىسىن ىسكە قوسۋ جونىندەگى شارالارىمەن تانىستىرعان.
قازاقستاندا «اشىق اسپان» رەجيمىنىڭ ەنگىزىلۋى جانە «اۋە ەركىندىگىنىڭ» بەسىنشى دارەجەسىنىڭ قولدانىلۋى شەتەلدىك اۋە كومپانيالارىنىڭ قازاقستاندىق نارىققا شىعۋىنا قولايلى جاعداي جاساپ, ازاماتتىق اۆياتسيا سالاسىندا باسەكەنى ارتتىرۋعا ءارى اۋە باعىتتارىنىڭ گەوگرافياسىن كەڭەيتۋگە مۇمكىندىك بەرەتىنى اتالىپ ءوتتى.
ال قازاقستان ءوزىنىڭ ءتيىمدى گەوگرافيالىق ورنالاسۋى مەن الەۋەتىنىڭ ارقاسىندا ەۋروپا مەن ازيا نارىقتارىن بايلانىستىراتىن جولاۋشىلار مەن جۇك تاسىمالى اعىنىن قامتاماسىز ەتۋدە ماڭىزدى دانەكەر بولا الاتىنى نازارعا الىندى.
«سلوۆاكيا تاراپىنا جۇك اۋە تاسىمالدارىن ۇيىمداستىرۋ, سونداي-اق ەۋروپالىق اۋە كومپانيالارىنىڭ شىعىسقا باعىتتالعان رەيستەرىندە قازاقستان اۋەجايلارىن ترانزيتتىك جانە قوسالقى اۋەجاي رەتىندە پايدالانۋ مۇمكىندىگىن قاراستىرۋ ۇسىنىلدى. قازاقستان سلوۆاكيا ازاماتتارى ءۇشىن ورتالىق جانە وڭتۇستىك-شىعىس ازياعا ساپارلار بارىسىندا قولايلى ترانزيتتىك توراپ قىزمەتىن اتقارا الاتىنى ايتىلدى. تاراپتار تىكەلەي اۋە قاتىناسىن ورناتۋ ءوزارا ساۋدا, ىسكەرلىك بايلانىستار جانە تۋريستىك اعىنداردىڭ كەڭەيۋىنە سەرپىن بەرەتىنى جونىندە ورتاق پىكىرگە كەلىپ, الداعى ىنتىماقتاستىققا دايىن ەكەندىكتەرىن راستادى», دەپ جازىلعان قر ءسىم مالىمدەمەسىندە.
