بۇل دودا – ەلىمىزدە BISFed قامقورلىعىمەن ۇيىمداستىرىلعان العاشقى حالىقارالىق بوچچا جارىسى. تۋرنير 2028 جىلعى لوس-اندجەلەس پاراليمپياداسىنا ىرىكتەۋ مارتەبەسىنە يە بولىپ, وعان 12 مەملەكەتتىڭ 56 سپورتشىسى جينالدى.
بوچچانىڭ حالىقارالىق فەدەراتسياسى (BISFed) وكىلدەرى جارىستىڭ جوعارى دەڭگەيدە وتكەنىن اتاپ ءوتتى. ولاردىڭ ايتۋىنشا, مۇنداي كولەمدەگى تۋرنير ەلدىڭ ينكليۋزيۆتى سپورتتى دامىتىپ, حالىقارالىق ىنتىماقتاستىققا جول اشىپ وتىرعانىن كورسەتتى. قازاقستان پاراسپورتتاعى اۋقىمدى شارالاردى قابىلداۋعا دايىن ەكەندىگىن دالەلدەدى.
«Astana World Boccia Challenger ءتۋرنيرى قازاقستان ءۇشىن تاريحي وقيعا بولدى, ەلىمىزدە العاش رەت وسىنداي دەڭگەيدەگى جارىس ۇيىمداستىرىلدى. 12 مەملەكەتتەن كەلگەن 56 ۇزدىك سپورتشى جوعارى شەبەرلىك پەن سپورتتىق كۇش-جىگەرىن تانىتتى. قازاقستان بوچچا فەدەراتسياسى اتىنان بارلىق جەڭىمپازدار مەن جۇلدەگەرلەردى قۇتتىقتايمىن! ءبىزدىڭ قۇرامامىز ءۇشىن بۇل باستاۋ ايرىقشا ماڭىزعا يە. ءبىز پاراسپورتشىلارىمىزعا سەندىك, ولار بارلىق ءۇمىتتى اقتادى. بۇل جەڭىس بىزگە شابىت بەرىپ, ەلدەگى ينكليۋزيۆتى سپورتتىڭ جاڭا بەلەستەرىن اشادى», دەدى پارلامەنت سەناتىنىڭ توراعاسى, قازاقستان بوچچا فەدەراتسياسىنىڭ پرەزيدەنتى, ماۋلەن اشىمباەۆ.
ول ءسوزىنىڭ سوڭىندا تورەشىلەرگە, باپكەرلەر مەن اتا-انالارعا, ەرىكتىلەر مەن دەمەۋشىلەرگە ريزاشىلىعىن ءبىلدىردى.
سەگىز كۇنگە سوزىلعان تۋرنيردە سپورتشىلار تەك مەدال ءۇشىن عانا ەمەس, ناعىز ەرىك-جىگەر مەن شەبەرلىكتى پاش ەتتى. قازاقستاندىق اتلەتتەر ناتيجەلى ونەر كورسەتىپ, ەكى التىندى (يتيانا شىڭعىسحانوۆا, بالجان بولەكپاەۆا), ەكى كۇمىستى (ازامات ايازباەۆ, ەرحات المات), ءبىر قولا مەدالدى (ەلميرا مۋسراليەۆا) جانە ارالاس جۇپتىق سىندا التىندى (ەلميرا مۋسراليەۆا – ازامات ايازباەۆ) جەڭىپ الدى.
فينالدىق سايىستاردا ارالاس جۇپتىق BC4 ساناتىندا قازاقستاندىق دۋەت مۋسراليەۆا – ايازباەۆ يراندىق قارسىلاستارىن تىزە بۇكتىرىپ, چەمپيون اتاندى. ال كوماندالىق BC4 جارىسىندا كورەيا قۇراماسى ءبىرىنشى ورىننان كورىندى. BC3 جۇپتىق سىندا دا وڭتۇستىككورەيالىق سپورتشىلار توپ جارىپ, يتاليا مەن ءۇندىستاندى ارتتا قالدىردى.
Astana 2025 World Boccia Challenger ءتۋرنيرىن قازاقستان بوچچا فەدەراتسياسى تۋريزم جانە سپورت مينيسترلىگى, Sport Qory قورى, «سامۇرىق-قازىنا» اق, ERG جانە وزگە دە سەرىكتەستەردىڭ قولداۋىمەن وتكىزدى. بۇل سەرىكتەستىك جارىستىڭ تابىستى وتۋىنە ايرىقشا ىقپال ەتتى.
ءتۋرنيردىڭ استانادا ءوتۋى تەك سپورتشىلار ءۇشىن عانا ەمەس, قازاقستاننىڭ پاراسپورتتىق جۇيەسى ءۇشىن دە ماڭىزدى كەزەڭگە اينالدى.
