پالاتا سپيكەرى شەشۋشى سايىسقا قاتىسۋ ءۇشىن بارلىق وڭىردەن كەلگەن شاحماتشىلاردى قۇتتىقتاي وتىرىپ, مەملەكەت باسشىسىنىڭ تاپسىرماسىمەن كەيىنگى جىلدارى ەلىمىزدە اتالعان ويىندى دارىپتەۋگە, كاسىبي جانە اۋەسقوي دەڭگەيلەردە دامىتۋعا ءتيىستى جاعداي جاسالىپ جاتقانىن اتاپ ءوتتى.
«پرەزيدەنت قاسىم-جومارت توقاەۆ شاحماتتى دارىپتەۋگە ۇلكەن ءمان بەرىپ كەلەدى. بۇگىندە مەملەكەت باسشىسى ايقىنداپ بەرگەن مىندەتتەر اياسىندا بۇل باعىتتا جۇيەلى جۇمىس جۇرگىزىلىپ وتىر. شاحماتتى دامىتۋعا ارنالعان 2027 جىلعا دەيىنگى كەشەندى جوسپار ازىرلەنىپ, قابىلداندى. پارلامەنت سەناتى مەن قازاقستان شاحمات فەدەراتسياسى بىرلەسىپ ۇيىمداستىرعان وسى تۋرنير دە – سول باعىتتا جاسالىپ جاتقان ماڭىزدى قادامداردىڭ ءبىرى. «Senat Open» سايىسى وسىمەن ەكىنشى جىل قاتارىنان وتكىزىلىپ وتىر. ۋاقىت وتكەن سايىن سايىسقا قىزىعۋشىلاردىڭ قاتارى ارتىپ كەلەدى. مۇنداي جوبالار ۇلتتىڭ زياتكەرلىك الەۋەتىن ارتتىرۋعا جانە مەملەكەتتىك باسقارۋ سياقتى ماڭىزدى سالالاردا قاجەتتى قابىلەتتەردى شىڭداۋعا جول اشادى دەپ سەنەمىز», دەدى م.اشىمباەۆ.
ايتا كەتەيىك, ءتۋرنيردىڭ العاشقى كەزەڭى 21 اقپان مەن 27 مامىر ارالىعىندا ەلىمىزدىڭ بارلىق وبلىسىندا ءوتتى. سونىڭ اياسىندا 20 ىرىكتەۋ تۋرى ۇيىمداستىرىلدى. ەكىنشى كەزەڭدە وڭىرلەر بويىنشا بەس جارتىلاي فينال وتكىزىلدى. اتاپ ايتقاندا, بۇل سىندا قاتىسۋشىلار 25 ماۋسىمدا – تۇركىستاندا (وڭتۇستىك), 29 ماۋسىمدا – سەمەيدە (ورتالىق), 4 شىلدەدە – كوكشەتاۋدا (سولتۇستىك), 23 شىلدەدە – ورالدا (باتىس) جانە 9 تامىزدا تالدىقورعاندا (شىعىس) ءوزارا مىقتىنى انىقتادى. سولاردىڭ اراسىنان 215 شاحماتشى فينالعا جولداما الدى.
ءوز كەزەگىندە قازاقستان شاحمات فەدەراتسياسىنىڭ پرەزيدەنتى تيمۋر تۋرلوۆ وسىنداي جوبالار شاحماتشىلاردىڭ كاسىبي شەبەرلىگىن ارتتىرۋ, تاجىريبە الماسۋ جانە قاتىسۋشىلاردىڭ كاسىبي بايلانىستارىن نىعايتۋ ءۇشىن تىڭ مۇمكىندىك ەكەنىن تىلگە تيەك ەتتى.
«قازىرگى تاڭدا ءبىزدىڭ ءتۋرنيرىمىز تۇراقتى تۇردە دامىپ, ىلگەرىلەپ كەلەدى. بۇل – پارلامەنت سەناتى مەن شاحمات فەدەراتسياسىنىڭ بىرلەسىپ اتقارعان جۇمىسىنىڭ ناقتى ناتيجەسى. ۇيىمداستىرۋشىلار مەن قاتىسۋشىلار وسى جولدا ۇلكەن جاۋاپكەرشىلىك پەن تاباندىلىق تانىتتى. ءبىز ءۇشىن اتالعان جوبا ەرەكشە ماڭىزعا يە. ويتكەنى ونىڭ ايقىن ماقساتى جانە الەۋمەتتىك ميسسياسى بار. بۇل باستاما كاسىبي بايلانىستار مەن جەكە دوستىقتى نىعايتاتىن الاڭعا اينالدى. سونداي-اق حالىققا جوسپارلاۋ, قۇرمەتتەۋ, كوشباسشىلىققا ۇمتىلۋ سياقتى قۇندىلىقتاردى ناسيحاتتايتىن پلاتفورما رەتىندە قالىپتاستى», دەدى ت.تۋرلوۆ.
اشىلۋ راسىمىندە ايتىلعانداي, شاحماتتى دارىپتەۋ اياسىندا بيىل مەكتەپ باعدارلاماسىنا جاڭا مادەنيەت پەن اناليتيكالىق داعدىلاردى قالىپتاستىرۋعا جانە جان-جاقتى دامۋعا ىقپال ەتەتىن «شاحمات نەگىزدەرى» ءپانى ەنگىزىلگەن. اتالعان باستاما 60 مىڭنان اسا وقۋشىنى قامتىماق.
