قارسىلاسىمىز – اقش قۇراماسى

بۇرىندارى «فەدەراتسيا كۋبوگى» دەپ اتالىپ, كەيىن­نەن ايگىلى تەننيسشى, بەلگىلى سپورت فۋنكتسيونەرى ءارى قوعام قايراتكەرى بيللي دجين كينگ­تىڭ ەسىمىن يەلەنگەن بۇل تۋرنير 1963 جىلدان بەرى ۇيىمداستىرىلىپ كەلەدى. سول ارالىقتا ەڭ كوپ تابىسقا جەتكەن ءداپ وسى اقش قۇراماسى. امەريكالىقتاردىڭ 18 جارىستا جۇلدىزى جارقىرادى. سونداي-اق باس جۇلدەنى ولجا­لاعاندار قاتارىندا چەحيا (11 رەت), اۋستراليا (7), يسپا­نيا (5), رەسەي (5), يتاليا (5), فران­تسيا (3), گەرمانيا (2), بەلگيا (1), كانادا (1), سلوۆاكيا (1), شۆەيتساريا (1), وار (1) سىندى كوماندا بار.

قازاقستان قۇراماسى بولسا, بۇعان دەيىن بيللي دجين كۋبوگىنىڭ فينالدىق بولىگىندە بار-جوعى ەكى رەت قانا ويناعان. بۇل كۇندەرى ءبىزدىڭ ەلدىڭ ەڭ ۇزدىك تەننيسشىسى ەلەنا رىباكينا WTA رەيتينگىندە 11-ورىندى يەلەنگەن. ەلىمىزدىڭ ەكىنشى راكەتكاسى يۋليا پۋتينتسەۆا 44-ساتىعا جايعاستى. باسقا قىزداردىڭ ناتيجەسى تىپتەن تومەن. دەسەك تە جۇپتىق سايىس­تاردا اننا دانيلينانىڭ تابىستى ونەر كورسەتىپ جۇرگەنىن ەستەن شىعارمايىق.

اقش-قا قارسى شيرەك في­نالدىق سايىسقا كوماندا كاپيتانى يۋري ششۋكين ەلەنا رىباكينا, يۋليا پۋتينتسەۆا, زارينا دياس, اننا دانيلينا جانە جىبەك قۇلامباەۆانى شى­عارۋدى ءجون كوردى. ال قار­سىلاس كومانداسىنىڭ نامىسىن دجەسسيكا پەگۋلا, مەديسون كيز, ەمما ناۆاررو, حەيلي باپتيست, تەيلور تاۋنسەند قور­عايدى. بۇل قۇرا­مانىڭ كاپي­تانى – «ۇلكەن دۋلىعا» سانا­تىنداعى تۋرنيرلەردىڭ التى دۇركىن جەڭىمپازى, وليمپيادا چەمپيونى ليندسي دەۆەنپورت.

بىلتىرعى بيللي دجين كينگ كۋبوگىنىڭ فينالىندا يتاليا مەن سلوۆاكيا قۇرا­مالارى كۇش سىناسقان. اپەننين تۇبەگىنىڭ وكىلدەرى پلەي-وفف دودالارىندا جا­پو­نيا (2:1) مەن پولشانى (2:1) ۇتتى. سلوۆاكتار اقش (2:1), اۋستراليا (2:0) مەن ۇلىبريتانياعا (2:1) سان سوقتىردى. باس جۇلدە ءۇشىن تار­تىستا يتاليانىڭ مىسى باسىم بولدى. ولار سلوۆاكيا­نى 2:0 ەسەبىمەن جەڭىپ, باس جۇل­دەنى ولجالادى. جەڭىمپاز كوماندانىڭ ساپىندا جاس­­مين پاوليني, ليۋچيا برونتسەت­تي, سارا ەرراني, ەليزا­بەت­تا كوچچارەتتو سىندى ارۋلار ونەر كورسەتتى.

قىركۇيەك ايىنىڭ ەكىن­شى جارتىسىندا قىتايدىڭ شەنچ­جەن قالاسىندا وتە­تىن پلەي-وفف باسەكەلەرىندە اقش پەن قازاقستاننان بو­لەك, يتاليا مەن قىتاي, يسپا­نيا مەن ۋكراينا, ۇلىبريتا­نيا مەن جاپونيا قۇرامالارى شە­بەرلىك بايقاسادى.