قازىرگى جاھاندىق سىن-قاتەرلەر جاعدايىندا الەمدىك جانە ءداستۇرلى دىندەر ليدەرلەرىنىڭ سەزىنىڭ ماڭىزى نەدە دەپ ويلايسىز؟
قازىرگى تاڭدا ادامزات بۇرىن-سوڭدى بولماعان گەوساياسي قاقتىعىستارعا, سەنىم داعدارىسىنا, الەۋمەتتىك تەڭسىزدىكتىڭ تەرەڭدەۋىنە جانە ءدىندى بۇركەنىش ەتكەن راديكالدى يدەيالاردىڭ تارالۋىنا كۋا بولىپ وتىر. وسىنداي كۇردەلى جاعدايدا قازاقستاننىڭ باستاماسىمەن 2003 جىلدان بەرى تۇراقتى تۇردە وتكىزىلىپ كەلە جاتقان الەمدىك جانە ءداستۇرلى دىندەر ليدەرلەرىنىڭ سەزى ەرەكشە مانگە يە.
ءدىن ادامعا ءۇمىت سىيلايتىن, ءومىر سۇرۋگە, دامۋعا, تاعدىرىن وزگەرتۋگە جانە ءوزىن قورعالعان سەزىنۋگە كۇش-قۋات بەرەتىن سەنىمنىڭ قاينارى. ال ءدىن ليدەرلەرى وسى ءۇمىت پەن سەنىمدى ادامزاتقا جەتكىزەتىن, ىزگىلىك, جاناشىرلىق جانە سۇيىسپەنشىلىك قۇندىلىقتارىن دارىپتەيتىن رۋحاني كوشباسشىلار. بۇل قۇندىلىقتار عالامدىق سانانى قالىپتاستىرىپ, ادامداردى ءبىر-بىرىنە جاقىنداتادى. سوندىقتان ءدىني كوشباسشىلار اراسىنداعى تۇراقتى, اشىق ءارى سەنىمدى ديالوگتىڭ بولۋى ايرىقشا ماڭىزدى. ولاردىڭ كەلىسىمى مەن دوستىعى ارقىلى ءوزارا تۇسىنىستىك پەن بەيبىت قاتار ءومىر ءسۇرۋ ورنىعادى, ال بۇل بۇكىل الەمدەگى بەيبىتشىلىكتىڭ ەڭ باستى كەپىلى.
قازاقستان ارقاشان دا بولسا, بەيبىتشىلىك پەن كەلىسىم ۇستامىنا ادال بولىپ كەلەدى. سول سەبەپتى ءبىز مۇنداي باستامالاردى ۇسىنىپ قانا قويماي, جۇزەگە اسىرىپ وتىرمىز. ءدىني كونفەسسيالار اراسىنداعى كەلىسىم مەن دوستىق- وركەنيەتتىڭ العا باسۋى مەن تۇراقتى دامۋدىڭ بەرىك نەگىزى. ءدال وسى تۇرعىدان العاندا, سەزد ءتۇرلى مادەنيەتتەردى جاقىنداستىراتىن جانە ءوزارا سىيلاستىقتى نىعايتاتىن تۇراقتى الاڭ رەتىندە جاھاندىق ماڭىزعا يە.
ءسىز وسى فورۋمنان قانداي ناتيجەلەر كۇتەسىز جانە قانداي تاقىرىپتارعا ەرەكشە كوڭىل ءبولۋ قاجەت دەپ سانايسىز؟
2025 جىلدىڭ 17–18 قىركۇيەگىندە استانادا وتەتىن VIII سەزدى ءبىز سەنىم مەن ىنتىماق ديپلوماتياسىن جالعاستىراتىن ماڭىزدى حالىقارالىق الاڭ رەتىندە قاراستىرامىز. بۇل جيىننان كۇتىلەتىن باستى ناتيجە - ءدىني جانە ساياسي كوشباسشىلاردىڭ الەمگە ورتاق ۇندەۋىن قالىپتاستىرۋ. ەڭ ماڭىزدىسى- سەزد قورىتىندىسىنىڭ بۇۇ باس اسسامبلەياسىنىڭ رەسمي قۇجاتى رەتىندە قابىلدانىپ, جاھاندىق دەڭگەيدە تارالۋى. بۇل قازاقستان باستاماسىنىڭ حالىقارالىق بەدەلىن كورسەتەتىن ماڭىزدى قادام.
ال تاقىرىپتارعا كەلسەك, ەڭ اۋەلى ءدىني ەكسترەميزمگە قارسى تۇرۋ جانە ءدىندى ساياسي ماقساتتا پايدالانۋعا جول بەرمەۋ قاجەت. سونداي-اق تسيفرلىق داۋىردە ادامزاتتىڭ مورالدىق-رۋحاني قۇندىلىقتارىن ساقتاۋ, جاستار مەن ايەلدەردىڭ بەيبىتشىلىك مادەنيەتىن نىعايتۋداعى ءرولى ايرىقشا نازاردا بولۋى ءتيىس. بىراق ەڭ باستىسى- ءدىني كونفەسسيالار اراسىنداعى كەلىسىم مەن دوستىقتى بولاشاقتىڭ ناقتى شارتى رەتىندە ۇسىنۋ. قازاقستان ءدال وسى ارقىلى بۇكىل الەمدىك اشىق ديالوگ پەن ءوزارا سىيلاستىقتى نىعايتۋعا اتسالىسادى.
مەملەكەت باسشىسىنىڭ باستاماسىمەن وتكىزىلىپ كەلە جاتقان بۇل سەزد قازاقستاننىڭ حالىقارالىق بەدەلىنە قالاي اسەر ەتۋدە؟
الداعى سەزد قازاقستاننىڭ سىرتقى ساياساتتاعى بەدەلىنىڭ اجىراماس بولىگىنە اينالىپ وتىر. بۇل - ەلىمىزدىڭ بەيبىتشىلىك پەن ديالوگ قۇندىلىقتارىن تەك ءسوز جۇزىندە ەمەس, ناقتى ىستەرىمەن جۇزەگە اسىرىپ وتىرعانىنىڭ ايقىن ايعاعى. ماسەلەن, 2022 جىلى قابىلدانعان VII سەزدىڭ دەكلاراتسياسى بۇۇ باس اسسامبلەياسىنىڭ 77-سەسسياسىنىڭ رەسمي قۇجاتى رەتىندە جاريالانىپ, ءبىزدىڭ ۇندەۋىمىزدىڭ بۇكىل حالىقارالىق قاۋىمداستىق تاراپىنان مويىندالعانىن كورسەتتى.
وسىلايشا, قازاقستان ءوزىن مورالدىق بەدەلى جوعارى, حالىقتار اراسىنداعى سەنىم مەن ءوزارا تۇسىنىستىكتىڭ دانەكەرى, بىتىمگەرلىكتىڭ شىنايى جارشىسى رەتىندە تانىتىپ كەلەدى. قاقتىعىستاردان شارشاعان جانە ونى ەڭسەرۋدىڭ جولىن ىزدەگەن قازىرگى الەمدە ءبىزدىڭ ەلىمىز ءدىني كونفەسسيالار اراسىنداعى كەلىسىم مەن دوستىققا, الۋان ءتۇرلى مادەنيەتتەر مەن كوزقاراستاردى قۇرمەتتەۋگە نەگىزدەلگەن ۇلگىنى ۇسىنادى. بۇل - قازاقستاننىڭ الەمگە جولداعان ورتاق ۇندەۋى: تەك كەلىسىم, ءوزارا سىيلاستىق پەن سەنىم ارقىلى ءبىز بارشامىز ءۇشىن ادىلەتتى ءارى تۇراقتى بولاشاق قالىپتاستىرا الامىز.
