سۋرەتتى تۇسىرگەن – ءالي عالىم
ە.راحماديەۆ اتىنداعى مەملەكەتتىك اكادەميالىق فيلارمونيادا جاستار ۇلتتىق كومپانيالاردان باستاپ, ونەركاسىپتىك كاسىپورىندارعا دەيىنگى 70-تەن اسا كومپانيالاردىڭ وكىلدەرىمەن بەتپە-بەت سويلەستى. وسىلايشا جۇمىسقا ورنالاسۋ مۇمكىندىگى تۋرالى ءبىلىپ, العاشقى سۇحباتتان ءوتتى.
– مەن كوللەدجدى «ەلەكترومونتەر» ماماندىعى بويىنشا ءتامامداپ, ۇزاق ۋاقىت لايىقتى جۇمىس ىزدەدىم. وسى جارمەڭكەدە بىرنەشە كومپانيا وكىلىمەن سويلەسىپ, سۇحباتقا شاقىرۋ الدىم. مۇندا جۇمىس بەرۋشى ءسىزدى تاڭدامايدى, كەرىسىنشە ءسىز بوس جۇمىس ورىندارىنىڭ اراسىنان وزىڭىزگە قولايلىسىن تاڭدايسىز, – دەدى جارمەڭكەگە قاتىسقان ايدار كەنجەباەۆ.
جارمەڭكە اياسىندا «وتباسى بانك» وكىلدەرى يپوتەكا رەسىمدەۋگە نيەتتى ازاماتتارعا كەڭەس بەرىپ, استانا قالاسى اكىمدىگىنىڭ وكىلدەرى NEET ساناتىنداعى جاستاردى جۇمىسپەن قامتۋعا جاردەمدەسۋ بويىنشا «Joltap» جوباسىن ۇسىندى. ال ەلورداداعى ەڭبەك ۇتقىرلىعى ورتالىعىنىڭ قىزمەتكەرلەرى تۇلەكتەرگە ارنالعان «العاشقى جۇمىس ورنى» جانە «جاستار پراكتيكاسى» جوبالارى تۋرالى حاباردار ەتتى. سونىمەن قاتار ازاماتتارعا ەلىمىزدىڭ وزگە وڭىرلەرىنە كوشىپ بارۋ مۇمكىندىگى تۋرالى مالىمەت ۇسىنىلدى.
«Amanat» پارتياسىنىڭ اتقارۋشى حاتشىسى داۋلەت كارىبەك مەملەكەت باسشىسى قاسىم-جومارت توقاەۆ جاريالاعان جۇمىسشى ماماندىقتارى جىلىندا وسىنداي ءىس-شارالار ۇيىمداستىرۋدىڭ ءمانى مەن ماڭىزىنا توقتالدى.
– بۇگىندە جۇمىسشى ماماندىقتار – تۇراقتىلىق پەن جوعارى سۇرانىس قانا ەمەس, سونىمەن قاتار لايىقتى جالاقى, سىي-قۇرمەت جانە مانساپ جولىندا جوعارىلاۋ مۇمكىندىگى. جاستار ەكونوميكانىڭ وسى سەكتورىنا بەت بۇرىپ, ەل ەرتەڭى ەڭبەكپەن بايلانىستى ەكەنىن تۇسىنە باستادى. ءبىزدىڭ بوس جۇمىس ورىندارى جارمەڭكەلەرىمىز جاستارعا ومىردە ءوز ورنىن, ال جۇمىس بەرۋشىلەرگە لايىقتى مامان تابۋىنا كومەكتەسەدى. ماسەلەن, پارتيانىڭ ەڭبەك جانە حالىقتى الەۋمەتتىك قورعاۋ مينيسترلىگىمەن بىرلەسىپ جۇزەگە اسىرىپ جاتقان «جاستارعا جۇمىس» جوباسى ءوز تيىمدىلىگىن دالەلدەدى. كەيىنگى ەكى جىلدا 150 مىڭعا جۋىق جاس ازامات قامتىلعان 1,5 مىڭنان اسا ءىس-شارا وتكىزىلدى. 200-گە جۋىق بوس جۇمىس ورىندارى جارمەڭكەسى ۇيىمداستىرىلدى, وعان 5,2 مىڭنان اسا ۇيىم قاتىستى, 55 مىڭنان اسا جاس ازامات جۇمىسقا ورنالاستىرىلدى. شالعايداعى ەلدى مەكەندەردى قامتۋ ماقساتىندا «جاستار رۋحىنىڭ» ءموبيلدى توپتارى 150-دەن اسا اۋىلعا بارىپ, 55 مىڭ ادامعا الەۋمەتتىك-ەڭبەك ماسەلەلەرى بويىنشا كەڭەس بەردى, – دەدى د.كارىبەك.
سونداي-اق جارمەڭكەدە «تازا قازاقستان» ارنايى ورنى جۇمىس ىستەدى. وندا قايتا وڭدەۋ ماقساتىندا پلاستيك جينالىپ, جاسىل تەحنولوگيالار تۋرالى مالىمەت بەرىلدى.
استانامەن بىرگە «جاستار رۋحىنىڭ» باستاماسىمەن ەلىمىزدىڭ بارلىق وبلىس ورتالىعىندا وسىنداي جارمەڭكەلەر وتەدى. ولارعا كەم دەگەندە 50 مىڭ جاس كەلەدى دەپ جوسپارلانىپ وتىر. ءىس-شارا ء«بىر تەرەزە» قاعيداتى نەگىزىندە ۇيىمداستىرىلادى.
