ءىس-شاراعا مەملەكەتتىك ورگاندار مەن ازاماتتىق قوعام وكىلدەرى, ساراپشىلار مەن ۇەۇ مۇشەلەرى قاتىستى. وتىرىستىڭ «زاڭ مەن ءتارتىپ: ازاماتتىق قوعام ءرولى» اتتى العاشقى بولىمىنە ققدي قوعامدىق ۇردىستەردى زەرتتەۋ ورتالىعىنىڭ باسشىسى ريززات تاسىم مودەراتورلىق ەتتى.
– مەملەكەت باسشىسى بىلتىرعى جولداۋىندا «زاڭ مەن ءتارتىپ» قاعيداتىنا ايرىقشا توقتالسا, جىل باسىندا «انا ءتىلى» گازەتىنە بەرگەن سۇحباتىندا «زاڭ مەن ءتارتىپ» قاعيداتى – شىن مانىندە كەمەل دەموكراتيانىڭ تىرەگى, قۇقىقتىق مەملەكەتتىڭ نەگىزى. سوندىقتان ءبىزدىڭ مىندەتىمىز – بۇل قاعيداتتى ەلىمىزدىڭ قۇندىلىقتار جۇيەسىنە بارىنشا كىرىكتىرىپ, حالىق بولمىسىنىڭ, قوعام ءومىرىنىڭ اجىراماس بولىگىنە اينالدىرۋ» دەگەن بولاتىن. سوندىقتان كونستيتۋتسيا كۇنى قارساڭىنداعى «Sarap» جيىنىن قۇقىق جۇيەسىنىڭ دامۋى, ادىلەتتىلىك پەن تەڭدىك قاعيداتتارىنىڭ نىعايۋى, سونداي-اق ەلىمىزدە كەمسىتپەيتىن ورتا قۇرۋعا قاتىستى نەگىزگى ماسەلەلەردى كاسىبي جانە اشىق فورماتتا تالقىلاۋعا ارنادىق, – دەدى مودەراتور.
پرەزيدەنت ءىس باسقارماسى جانىنداعى پارلامەنتاريزم ينستيتۋتى نورماتيۆتىك قۇقىقتىق اكتىلەر مونيتورينگى جانە حالىقارالىق تاجىريبە ورتالىعىنىڭ باسشىسى مەرۋەرت قابىلباەۆا «قۇقىقتىق ساۋاتتىڭ نەگىزى – زاڭنامانى بازالىق دەڭگەيدە ءتۇسىنۋ» دەپ اتاپ ءوتتى.
ادام قۇقىقتارى جونىندەگى ۇلتتىق ورتالىقتىڭ قۇقىقتىق جانە ۇيىمداستىرۋ-تالداۋ جۇمىسى ءبولىمىنىڭ باس ينسپەكتورى ءاليا تولەگەنقىزى كونستيتۋتسيالىق رەفورمالاردىڭ دەموكراتيالىق قاعيداتتاردى نىعايتۋداعى ماڭىزى تۋرالى بايانداما جاسادى.
سونداي-اق مەديا-ساراپشى, «قۇقىقتىق مەديا-ورتالىق» قق ديرەكتورى ديانا وكرەموۆا ۇەۇ قىزمەتىن رەتتەۋدەگى نەگىزگى پروبلەمالار مەن مۇمكىندىكتەرگە توقتالسا, MNU قاۋىمداستىرىلعان پروفەسسورى, زاڭ عىلىمدارىنىڭ PhD دوكتورى مۋسليم حاسەنوۆ كەمسىتۋشىلىككە قارسى زاڭنامانى ازىرلەۋگە ارنالعان عىلىمي تاسىلدەردى ۇسىندى.
ال وتىرىستىڭ «قازاقستاندا كەمسىتپەيتىن ورتا قۇرۋ: ادىلەتتى قۇقىقتىق جۇيە, ءدىني سەنىم بوستاندىعىن قورعاۋ, ازاپتاۋعا قارسى كۇرەس» اتتى ەكىنشى بولىمىندە ساراپشىلار ءدىني سەنىم بوستاندىعى, ءدىني قىزمەتتى جۇيەلى تۇردە رەتتەۋ, راديكالدانۋدان ساقتانۋ جانە ازاماتتاردى ءدىني سەنىمىنە جانە باسقا دا سيپاتىنا قاراي كەمسىتۋگە قارسى ءىس-قيمىل ماسەلەلەرىن تالقىلادى.
جالپى «Sarap» ەكسپەرتتىك كلۋبىنىڭ وتىرىسى مەملەكەتتىك ورگاندار, ساراپشىلار قاۋىمداستىعى جانە ازاماتتىق سەكتور وكىلدەرى ءۇشىن اشىق ديالوگ الاڭىنا اينالىپ كەلەدى. ءىس-شارا اياعىندا مۇنداي جيىندار دەموكراتيا قاعيداتتارى مەن قۇقىق رەفورمالارىن جەتىلدىرۋگە ارنالعان پراكتيكالىق ۇسىنىمدار ازىرلەۋگە جانە مەملەكەت پەن ازاماتتىق قوعام سەرىكتەستىگىن نىعايتۋعا وڭ ىقپال ەتەتىنى ايتىلدى.
