ايشا باقتىعۇل – ينكليۋزيۆتى ونەردىڭ وكىلى. قارشادايىنان قىلقالامدى سەرىك ەتكەن ونىڭ شىعارماشىلىعى ەرەكشە جانداردىڭ دا ونەر ارقىلى ءوز ورنىن تابا الاتىنىن دالەلدەيدى. ىشكى الەمىن, ومىرگە كوزقاراسىن قىلقالام ارقىلى كورسەتەتىن كەيىپكەرىمىزدىڭ قولتاڭباسى قانشاما جانعا ءۇمىت پەن شابىت سىيلايدى.
جاقىندا سۋرەتشىنىڭ «نۇكتە مەن سىزىق» اتتى كورمەسى ءوتتى. وسىناۋ ايرىقشا كورمە ۇستازى ارىستانبەك شالباەۆ ەكەۋىنىڭ ۇزدىكسىز ەڭبەگىنىڭ ناتيجەسى. كورمە – تەك ونەر مەرەكەسى عانا ەمەس, الماتىلىق ەرەكشە جانداردىڭ شەكسىز مۇمكىندىكتەرىن پاش ەتكەن وقيعا بولدى.
ايشانىڭ سۋرەتشىلىك جولى پاندەميا كەزىندە باستالعان. ۇيدە وقشاۋلانۋ كەزەڭىندە ول سۋرەت سالۋعا دەن قويىپ, بۇل ونەر ءتۇرى ونىڭ وزىندىك قارىم-قاتىناس تىلىنە اينالسا كەرەك. اناسى ءاليا ساندىبايدىڭ ايتۋىنشا, ايشا از سويلەسە دە, ءوز ويىن, سەزىمىن سۋرەت ارقىلى جەتكىزەدى.
سۋرەتشى ارىستانبەك شالباەۆپەن تانىستىعى ايشانىڭ شىعارماشىلىعىنا جاڭا سەرپىن بەرگەن. ءبىر جىل كولەمىندە ولار 60-تان استام تۋىندىنى دۇنيەگە اكەلگەن. ۇستازى ايشانىڭ سۋرەتتەرىن جۇرەكپەن جازىلعان تۋىندىلار دەپ سيپاتتايدى. ونىڭ ايتۋىنشا, ايشا بوياۋلار مەن سىزىقتاردى تەرەڭ ءتۇسىنىپ, ىشكى دۇنيەسىن كەنەپ ارقىلى كورسەتەدى.
«نۇكتە مەن سىزىق» – شاكىرتىمنىڭ العاشقى جەكە كورمەسى. كورمەدە اكريلمەن, مايلى بوياۋمەن, قالاممەن, فلوماستەرمەن سالىنعان ءتۇرلى تۋىندىلار ۇسىنىلدى. ءار سۋرەت – ايشانىڭ ىشكى الەمىنىڭ كورىنىسى, ونىڭ ومىرگە دەگەن كوزقاراسى مەن سەزىمدەرىنىڭ بەينەسى», دەيدى ا.شالباەۆ.
ەرەكشە جانداردىڭ ونەردەن ءورىس تابۋى – قوعامنىڭ رۋحاني جەتىلۋىنىڭ كورىنىسى. ونەر شەكاراسى جوق شەكسىز الەم دەسەك, سول كەڭىستىكتە ايشا ارمانىن ەركىن ءوربىتىپ, ءوز الەمىن سومدايدى. ونىڭ ءاربىر سۋرەتى – ءۇنسىز تىلدەسكەن ءۇمىت, ءتوزىم مەن شابىتتىڭ ءبىرتۇتاس بەينەسى. ايشانىڭ ونەرى – تەك قىلقالاممەن سالىنعان سۋرەت ەمەس, ول – ومىرگە دەگەن ماحابباتتىڭ بوياۋلى ورنەگى.
«ايشا الەمگە وزگەشە قارايدى, تۇيسىگىمەن تانيدى, جۇرەگىمەن سەزەدى. ونىڭ جان دۇنيەسىندەگى تازالىق پەن سەزىمتالدىق سۋرەتتەرىنەن سىر شەرتەدى. ادەتتەگى كوركەم وبرازداردان گورى, تۋىندىلارىندا ءۇنسىز سويلەيتىن بوياۋ, جارىق پەن كولەڭكەنىڭ ءتىلى بار. ەرەكشە كۇتىمدى قاجەت ەتەتىن جانداردىڭ ءبىرى بولا تۇرا, ول ونەردەن ءوز ءورىسىن تابۋعا تالپىنادى. ارمانىن قاعاز بەتىنە بوياۋمەن ءورىپ, بولمىسىنىڭ بايلىعىن قىلقالام ارقىلى پاش ەتىپ ءجۇر. ايشا سالعان سۋرەتتەر – قوعامنىڭ ءۇنى. ول ءومىردى وزگەلەردەن دە تەرەڭىرەك قابىلدايدى. جانى نازىك, جۇرەگى كەڭ سۋرەتشىنىڭ ونەرى تەك بەينەلەۋ ەمەس, بولاشاققا باعىتتالعان ىشكى داۋىستىڭ كورىنىسى. قوعامدا ايشا سىندى تالانتتى جانداردىڭ تانىلىپ, سونداي-اق تابىسقا جەتىپ جاتقانى – رۋحاني دامۋدىڭ ولشەمى. ەرەكشە جاندارعا قولداۋ كورسەتۋ ارقىلى ءبىز تەك الەۋمەتتىك ادىلەتتىلىكتى ەمەس, ادامزاتتىڭ ەڭ اسىل قاسيەتتەرىن: جاناشىرلىقتى, مەيىرىمدىلىكتى, شابىتتى ۇلىقتايمىز. ولاردىڭ الەۋەتىن تانۋ – ادامگەرشىلىك پارىزىمىز», دەيدى ونەرتانۋشى ءمولدىر ساعىندىقوۆا.
الماتى
