سۋرەتتەردى تۇسىرگەن – ەرلان ومار, «EQ»
«Kazinform» اگەنتتىگىنىڭ 105 جىلدىعىنا وراي ۇيىمداستىرىلرعان كورمەدە وتكەن عاسىردىڭ 30-جىلدارىنان بۇگىنگى كۇنگە دەيىنگى ەل ومىرىندەگى ماڭىزدى وقيعالاردى تۇسىرگەن اگەنتتىك تىلشىلەرىنىڭ بىرەگەي مۇراعاتتىق جانە ەكسكليۋزيۆتى فوتوسۋرەتتەرى قويىلعان. كوپتەگەن فوتوسۋرەت العاش رەت قالىڭ وقىرمانعا ۇسىنىلدى.
كورمە ماتەريالى التى بولىمنەن تۇرادى: 1928–1959 جىلدارداعى جانە ەكىنشى دۇنيەجۇزىلىك سوعىس كەزىندەگى قازاقستان; 1960–1985 جىلدارداعى ءىرى قۇرىلىس جوبالارى, قالالار مەن اۋدانداردىڭ ەكونوميكالىق دامۋى; الماتى مەن استانانىڭ كەيىنگى 40 جىلداعى شەجىرەسى; الەۋمەتتىك-مادەني وزگەرىستەر; سونداي-اق مەملەكەتتىڭ داۋمىنا ۇلەس قوسقان كورنەكتى تۇلعالار پورترەتتەرى.
«Kazinform» حالىقارالىق اقپارات اگەنتتىگىنىڭ باسقارۋشى ديرەكتورى ناعاشىبەك الدان كورمەنىڭ باستى ەرەكشەلىگىنە توقتالدى. ونىڭ ايتۋىنشا, مۇندا قاتتالعان سۋرەتتەردىڭ ءبىرازى حالىق نازارىنا العاش رەت ۇسىنىلىپ وتىر. «كەيىنگى ەكى جىلدا رەسەي مەن قازاقستان مۇراعاتتارىندا اۋقىمدى ىزدەنىس جۇمىسى جۇرگىزىلىپ, ون مىڭنان استام فوتو مەن قۇجات جينالدى. بۇل – سۋرەتتەر عانا ەمەس, ەلىمىزدىڭ كەيىنگى جۇزجىلدىق تاريحىنىڭ ايناسى. كورمەدە سوعىس پەن سوعىستان كەيىنگى كەزەڭدەر, يندۋستريالاندىرۋ جىلدارى, تاۋەلسىزدىك ءداۋىرى, الماتى مەن استانانىڭ قۇرىلىس ساتتەرى, ەلگە ەڭبەگى سىڭگەن ادامداردىڭ بۇرىن-سوڭدى جاريالانباعان سۋرەتتەرى بار», دەدى ول.
