شاعىن جانە ورتا بيزنەس

ونى مەملەكەتتىك قولداۋدىڭ ءتيىمدى جولدارى تالقىلاندى پارلامەنت سەناتى ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتى دەپۋتاتتارىنىڭ ۇلتتىق كاسىپكەرلەر پالاتاسى باسشىلىعىمەن كەزدەسۋىندە قازاقستان پرەزيدەنتىنىڭ «نۇرلى جول – بولاشاققا باستار جول» حالىققا جولداۋىن ىسكە اسىرۋ اياسىندا شاعىن جانە ورتا بيزنەستى مەملەكەتتىك قولداۋ جانە ىسكەرلىك بەلسەندىلىكتى ىنتالاندىرۋدىڭ ءتيىمدى شارالارى ماسەلەلەرى تالقىلاندى. تالقىلاۋعا قاتىسۋشىلارعا ارناعان سوزىندە ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ توراعاسى تالعاتبەك ءابايدىلدين مەملەكەت باسشىسى العا قويعان ستراتەگيالىق ماڭىزدى مىندەتتەردى: 2050 جىلعا قاراي رەسپۋبليكا ەكونوميكاسىنداعى شاعىن جانە ورتا بيزنەستىڭ ۇلەسىن ەكى ەسە ۇلعايتۋ جانە 50 پايىزعا جەتكىزۋ قاجەتتىگىن اتاپ ءوتتى. ت.ءابايدىلدين بۇل مىندەتتەردى ىسكە اسىرۋ ءۇشىن مەملەكەت قولايلى ىسكەر احۋال قالىپتاستىرۋ جانە بيزنەستى جۇرگىزۋ ءۇشىن اكىمشىلىك كەدەرگىلەردى جويۋ جونىندەگى جۇيەلى جۇمىستار جۇرگىزىلىپ كەلە جاتقانىن اتاپ كورسەتتى. قازاقستان رەسپۋبليكاسى پارلامەنتىنىڭ سەناتى ءوز قىزمەتىندە وسى ماسەلەلەردى قۇقىقتىق تۇرعىدا قامتاماسىز ەتۋدەگى قىزمەتىنە ەرەكشە نازار اۋدارىلاتىنى ايتىلدى. 2014 جىلى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىنداعى كاسىپكەرلىك قىزمەت ءۇشىن جاعدايدى تۇبەگەيلى جاقسارتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ قابىلداندى. ودان باسقا, «ۇلتتىق كاسىپكەرلەر پالاتاسى تۋرالى» زاڭ دا قابىلداندى. كاسىپكەرلىك قىزمەت ساپاسىن رەتتەيتىن قۇقىقتىق بازانى ودان ءارى جەتىلدىرۋ ماسەلەلەرىنە قاتىستى سەناتور قازىرگى كەزدە پارلامەنتتە كاسىپكەرلىك كودەكسىنىڭ جوباسى كەڭىنەن تالقىلانىپ جاتقانىن, وندا قازاقستاندىق كاسىپكەرلىك قىزمەتتىڭ جانە مەملەكەتپەن ءوزارا ءىس-قيمىلىنىڭ نەگىزگى قاعيدالارى بەكىتىلگەنىن ايتتى. «بيزنەستى دامىتۋعا كەدەرگى كەلتىرەتىن كوپتەگەن ماسەلەلەر وسى زاڭنامالىق اكتىنى قابىلداعاننان كەيىن ءوزىنىڭ شەشىمىن تاباتىنىنا سەنەمىن. سونىمەن قاتار, ەۋرازيالىق ەكونوميكالىق وداق جانە وسىعان بايلانىستى كورشى ەلدەگى تاۋار وندىرۋشىلەرمەن باسەكەلەستىك جاعدايىندا قازاقستاندىق تاۋار وندىرۋشىلەردى قولداۋ ماسەلەلەرىن تالقىلاۋ ورىندى», دەدى ت.ءابايدىلدين. شاعىن جانە ورتا بيزنەستى قولداۋداعى داعدارىسقا قارسى شارالار تۋرالى بايانداي كەلىپ, ابىلاي مىرزاحمەتوۆ ۇلتتىق كاسىپكەرلەر پالاتاسى بىرقاتار شارالاردى, اتاپ ايتقاندا, ىشكى نارىقتى قورعاۋ جونىندەگى جەكەلەگەن شارالاردى, بيۋدجەتتىك ۇيىمدارعا, ۇلتتىق كومپانيالارعا جانە ءىرى جەر قويناۋىن پايدالانۋشىلارعا تاۋارلار, جۇمىستار جانە قىزمەت كورسەتۋلەر ساتىپ الۋدا جەرگىلىكتى ونىمدەر دەڭگەيىن ۇلعايتۋ, تاپسىرىستارمەن قامتاماسىز ەتۋ ورتالىعىن قۇرۋ, تابيعي مونوپوليالار سۋبەكتىلەرىنە قىزمەت كورسەتۋ تاريفتەرىن 2014 جىلعى دەڭگەيدە ساقتاۋ, اوك كاسىپورىندارىن قولداۋدى ۇسىنىپ وتىرعانىن ايتتى. اگروونەركاسىپ كەشەنىندەگى كاسىپكەرلەردىڭ وزەكتى ماسەلەلەرى تۋرالى ۇلتتىق كاسىپكەرلەر پالاتاسى اگروونەركاسىپ كوميتەتىنىڭ توراعاسى يۆان ساۋەر حاباردار ەتتى. ول ينۆەستيتسيالىق سالىم جاساعان كەزدە اگروونەركاسىپ كەشەنىنىڭ سۋبەكتىلەرى جوعالتاتىن شىعىستارىن قايتارۋدى سۋبسيديالاۋ ماسەلەلەرىن كوتەردى. كەزدەسۋ سوڭىندا سەناتورلار ۇسىنىستاردى زاڭنامالىق دەڭگەيدە جەدەل تۇردە ىسكە اسىرۋعا جان-جاقتى جاردەمدەسۋگە ازىرلىگى تۋرالى ايتتى, دەپ حابارلادى سەناتتىڭ ءباسپاسوز قىزمەتى.