دەنساۋلىق ساقتاۋ مينيسترلىگىنىڭ دەرەگى بويىنشا, بۇل كورسەتكىشتەر بىرنەشە وبلىستا جوعارى دەڭگەيدە. وسىعان بايلانىستى ۇلتتىق كوميسسيا شەشىمىمەن جەرگىلىكتى اتقارۋشى ورگاندار, دارىگەرلەر, پەداگوگتەر, ساراپشىلار, اتا-انالار جانە ازاماتتىق قوعام وكىلدەرى قاتىساتىن ارنايى سەمينار وتكىزىلىپ كەلەدى.
پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مۇشەسى, پارلامەنت ءماجىلىسىنىڭ دەپۋتاتى جۇلدىز سۇلەيمەنوۆا ماڭعىستاۋ وبلىسىندا «جاستار مەن جاسوسپىرىمدەردىڭ رەپرودۋكتيۆتىك دەنساۋلىعىن ساقتاۋدىڭ ءتيىمدى جولدارى» تاقىرىبىندا سەمينار وتكىزدى. سەمينارعا ماڭعىستاۋ وبلىستىق ءبىلىم, دەنساۋلىق ساقتاۋ, جاستار ساياساتى, ءدىن ىستەرى, اقپارات جانە قوعامدىق دامۋ باسقارمالارىنىڭ وكىلدەرى, قالا, اۋدان اكىمدەرىنىڭ الەۋمەتتىك سالاعا جاۋاپتى ورىنباسارلارى, قۇقىق قورعاۋ ورگاندارىنىڭ كامەلەتكە تولماعاندار ىستەرى, ولاردىڭ قۇقىقتارىن قورعاۋ جانە تۇرمىستىق زورلىق-زومبىلىققا قارسى كۇرەس بولىمدەرى قىزمەتكەرلەرى مەن پەداگوگ-پسيحولوگتەر, مەكتەپ مەدبيكەلەرى, كوللەدج, مەكتەپ ديرەكتورلارى, تاربيە ءىسى جونىندەگى ورىنباسارلارى, اتا-انالار كوميتەتى مەن باق وكىلدەرى, انالار كەڭەستەرىنىڭ مۇشەلەلەرى قاتىستى.
ءماجىلىس دەپۋتاتى ج.سۇلەيمەنوۆا «انا مەن بالانى قورعاۋ, ۇلت ساۋلىعىن ساقتاۋ – ەلىمىزدىڭ تابىستى بولاشاعىنىڭ ىرگەتاسى. بالالار مەن جاسوسپىرىمدەردىڭ دەنساۋلىعىن نىعايتۋدا يننوۆاتسيالىق تاسىلدەردى ەنگىزۋ – مەملەكەتتىك ساياساتتىڭ باستى قاعيداتتارىنىڭ ءبىرى. نارەستە, بالا جانە انا ءولىمىن ازايتۋ, ەرتە جۇكتىلىكتىڭ الدىن الۋ – دەنساۋلىق ساقتاۋ جۇيەسىنىڭ تيىمدىلىگىنىڭ نەگىزگى كورسەتكىشى بولۋعا ءتيىس», دەدى.
بۇرىن ەمحانالار جانىندا جۇمىس ىستەگەن جاسوسپىرىمدەرگە ارنالعان بولىمشەلەر دەنساۋلىق ساقتاۋ رەفورماسىنان كەيىن جابىلىپ قالعان. قازىر بۇل قىزمەتتى قايتا اشۋ ماسەلەسى كۇن تارتىبىندە تۇر. سونداي-اق مىندەتتى الەۋمەتتىك ساقتاندىرۋ قورى ارقىلى جۇمىس ىستەيتىن 4 جاستار دەنساۋلىعى ورتالىعى تولىق پايدالانىلماي كەلەدى.
2024 جىلى بۇۇ حالىق قورى (يۋنفپا) جۇرگىزگەن ساۋالنامادا ەل جاستارىنىڭ كوپشىلىگى جىنىستىق دەنساۋلىق تۋرالى اقپاراتتى ينتەرنەت پەن الەۋمەتتىك جەلىدەن الاتىنى انىقتالدى. ماسەلەنى شەشۋدە تەك ءداستۇرلى ساباقتارمەن شەكتەلمەي, تسيفرلىق تەحنولوگيالار مۇمكىندىكتەرىن پايدالانۋ وزەكتى. اتا-انالارمەن جۇمىستى كۇشەيتۋ جانە مەكتەپتەگى تاربيە ساعاتتارىنىڭ مازمۇنىن جەتىلدىرۋگە كوڭىل ءبولۋ قاجەت, سونداي-اق وتباسىن قولداۋ ورتالىقتارىنىڭ جۇمىسىن كەڭەيتۋ شارت.
سەميناردا ءار قاتىسۋشى پىكىر ءبىلدىرىپ, ۇسىنىستارىن ورتاعا سالدى. ءبىر جىل بۇرىن اشىلعان وتباسىن قولداۋ ورتالىقتارىنىڭ ماقساتى, جۇمىس جۇيەسى جانە تاجىريبەسى ەگجەي-تەگجەيلى ءتۇسىندىرىلدى. باستى ماقسات – جاستاردىڭ دەنى ساۋ, سانالى, ءبىلىمدى, ومىرلىك دۇرىس تاڭداۋ جاساي الاتىن ۇرپاق بولىپ قالىپتاسۋى.
ماڭعىستاۋ وبلىسى
