دەپۋتات كوممۋنالدىق جاعاجاي مەن بىرقاتار تۋريستىك نىساندى ارالاپ, ينفراقۇرىلىم ماسەلەسىنە نازار اۋداردى. اتاپ ايتقاندا, سانيتارلىق تازالىق, كارىز جۇيەسى, كولىك باقىلاۋ جانە ينجەنەرلىك ينفراقۇرىلىم جايى قوزعالدى.
ءماجىلىس دەپۋتاتى بولات كەرىمبەك ينفراقۇرىلىمدى جەتىلدىرۋ جۇمىسىن ءارى قاراي جالعاستىرۋدىڭ ماڭىزىن اتاپ ءوتتى.
«الاكول – تەك جەتىسۋ وبلىسىنىڭ ەمەس, تۇتاس ەلىمىزدىڭ تۋريستىك برەندى. سوڭعى جىلدارى مۇندا اۋقىمدى جۇمىستار جۇرگىزىلدى. ەلەكتر جارىعى مەن ينتەرنەت ماسەلەسى شەشىلدى. كارىز جۇيەسى سالىنىپ جاتىر. بىراق ءالى دە جۇيەلى شەشىمدى قاجەت ەتەتىن ماسەلەلەر بار. ء بىز ءۇشىن باستى ماقسات – تابيعات بايلىعىن ساقتاي وتىرىپ, حالىققا جايلى جاعداي جاساۋ. بۇل باعىتتا مەملەكەت پەن كاسىپكەرلەردىڭ كۇش بىرىكتىرۋى اسا ماڭىزدى», دەدى دەپۋتات.
ايتا كەتەلىك, كەيىنگى جىلدارى الاكول جاعالاۋىندا ينفراقۇرىلىم ەداۋىر جاقسارعان. تۋريستىك نىساندار سانى ءبىر جىلدا 270-تەن استى. ۇزىندىعى 56,7 شاقىرىم ەلەكتر جەلىسى مەن قوسالقى ستانسا سالىنىپ, ۇزدىكسىز جارىق بەرىلىپ تۇر. جاعالاۋ ينتەرنەتپەن قامتىلىپ, 16 بازالىق ستانسا ورناتىلدى. اقشي اۋىلىندا 69,7 شاقىرىم كارىز جەلىسى تارتىلىپ, تازارتۋ قۇرىلعىسىنىڭ قۇرىلىسى باستالدى. بيىل سانيتارلىق جاعدايدى جاقسارتۋ ءۇشىن 22 توراپ, 220 كونتەينەر, 7 تەحنيكا بەرىلدى. قاۋىپسىزدىكتى قامتاماسىز ەتۋ ماقساتىمەن كولدە 4 ينسپەكتور, 12 قۇتقارۋشى جانە 46 پوليتسيا قىزمەتكەرى كەزەكشىلىك اتقارىپ ءجۇر.
سونىمەن قاتار «AMANAT» پارتياسىنىڭ 2023-2027 جىلدارعا ارنالعان سايلاۋالدى باعدارلاماسى اياسىندا جەتىسۋ وبلىسىنا قاراستى الاكول, كەربۇلاق, پانفيلوۆ اۋداندارى مەن تالدىقورعان قالاسىندا 684,4 شاقىرىم ەلەكتر جەلىلەرىن كۇردەلى جوندەۋدەن وتكىزۋ كوزدەلىپ وتىر.
