بۇل تۋرالى مەملەكەتتىك كىرىستەر كوميتەتى توراعاسىنىڭ ورىنباسارى جانىبەك نۇرجانوۆ مالىمدەدى.
باستى جاڭالىقتاردىڭ ءبىرى – تەكسەرۋلەر مەن بەرەشەكتى ءوندىرىپ الۋ ىسىندە قاتاڭ شارالاردان باس تارتۋ. ەندى شاعىن كولەمدەگى سالىق قارىزى ءۇشىن كاسىپكەرلەردىڭ ەسەپشوتتارى اۆتوماتتى تۇردە بۇعاتتالمايدى. ونىڭ ورنىنا ەسكەرتۋ جۇيەسى كەزەڭ-كەزەڭىمەن ەنگىزىلىپ, بيزنەس يەلەرىنە قاتەلىكتەردى ايىپپۇلسىز تۇزەتۋگە ۋاقىت بەرىلەدى.
«سالىقتىق اكىمشىلەندىرۋدىڭ تاسىلدەرى تۇبەگەيلى وزگەرەدى. بىرىنشىدەن, كامەرالدىق تەكسەرۋلەر ەندى ەسكەرتۋ سيپاتىندا جۇرگىزىلەدى. ەكىنشىدەن, بەرەشەكتى ءوندىرىپ الۋ, تولەم مەرزىمىن كەيىنگە قالدىرۋ جانە ءبولىپ تولەۋ راسىمدەرى ەداۋىر جەڭىلدەيدى. ۇشىنشىدەن, ەگەر بەرەشەك كولەمى از بولسا, كاسىپكەرلەردىڭ شوتتارى اۆتوماتتى تۇردە بۇعاتتالمايدى. ونىڭ ورنىنا كەزەڭ-كەزەڭىمەن حابارلاندىرۋ جۇيەسى قولدانىلادى. بۇل بيزنەسكە ۋاقىتىلى تۇزەتۋ ەنگىزۋگە مۇمكىندىك بەرەدى», دەدى كوميتەت توراعاسىنىڭ ورىنباسارى.
سونىمەن قاتار شاعىن جانە ورتا بيزنەسكە, سونداي-اق ءوزىن-ءوزى جۇمىسپەن قامتىعان ازاماتتارعا ارنالعان ارنايى سالىق رەجىمدەرى جاڭارتىلدى.
