قازاقستاندا 29 قازاننان باستاپ كاسىبي مەرەكە — كاسىپكەرلەر كۇنى اتاپ وتىلەدى. بۇل تۋرالى قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءتيىستى بۇيرىعىنا 2025 جىلعى 30 شىلدەدە قول قويىلىپ, بەكىتىلدى.
مەرەكە كۇنىنىڭ ءدال وسى كۇنگە ءتۇسۋى ماڭىزدى تاريحي وقيعامەن بايلانىستى: 2015 جىلعى 29 قازاندا قازاقستان رەسپۋبليكاسىنىڭ كاسىپكەرلىك كودەكسى قابىلدانعان ەدى. بۇل كودەكس كاسىپكەرلىك, ينۆەستيتسيالار, باسەكەلەستىك جانە مەملەكەتتىك باقىلاۋ سالالارىنداعى نەگىزگى زاڭنامالىق اكتىلەردى بىرىكتىرىپ, بيزنەستى قولداۋ جونىندەگى بىرىڭعاي مەملەكەتتىك ساياساتتىڭ بازالىق قاعيداتتارىن قالىپتاستىردى.
بۇگىندە ەلدە 2 ميلليون 300 مىڭنان استام بيزنەس سۋبەكتىسى تىركەلگەن. كاسىپكەرلەردى قولداۋ ەكونوميكالىق ساياساتتىڭ باسىم باعىتتارىنىڭ ءبىرى بولىپ قالا بەرمەك. تەك وسى جىلدىڭ وزىندە 2 مىڭنان استام جوباعا 288 ميلليارد تەڭگەدەن استام سۋبسيديا بەرىلدى, سونداي-اق 737 جوبا بويىنشا 61 ميلليارد تەڭگەگە كەپىلدىك بەرىلدى. 9 مىڭعا جۋىق كاسىپكەر ارنايى وقۋدان ءوتتى.
2025 جىلى شاعىن جانە ورتا بيزنەستى قولداۋعا 270 ميلليارد تەڭگەدەن استام قارجى باعىتتالماق. «ورلەۋ» جەڭىلدەتىلگەن نەسيە بەرۋ باعدارلاماسى ىسكە قوسىلدى, نەسيە مولشەرلەمەسى 12,6%. قولداۋدىڭ جالپى كولەمى 750 ميلليارد تەڭگەنى قۇرايدى, ونىڭ 300 ميللياردى — «دامۋ» قورىنىڭ, ال 450 ميللياردى — بانك رەسۋرستارىنىڭ ەسەبىنەن. قازىردىڭ وزىندە 200 ميلليارد تەڭگەگە جۋىق 400 جوبا قارجىلاندىرىلدى.
بيزنەس وكىلدەرىنىڭ حاباردارلىعىن ارتتىرۋ ماقساتىندا «تسيفرلىق بيزنەس كارتاسى» جوباسى ىسكە اسىرىلادى. 100-دەن استام قولداۋ شارالارىن قامتيتىن رەەستر بەكىتىلدى. سونىمەن قاتار, «بايتەرەك» حولدينگى قولداۋ شارالارىن قامتيتىن «Bgov» اقپاراتتىق جۇيەسى مەن «eGov Business» قوسىمشاسى بىرىكتىرىلدى. بۇل قوسىمشانى 71 مىڭنان استام پايدالانۋشى 2,3 ميلليون رەت قولدانعان.
