«جىل باسىنان بەرى سپورت ارداگەرلەرىنە جۇيەلى قولداۋ كورسەتۋ باعىتىندا بەلسەندى جۇمىس جۇرگىزىپ كەلەمىز. مەنىڭ تاپسىرمام بويىنشا وڭىرلەردەگى بارلىق سپورت ارداگەرلەرىنىڭ بىرىڭعاي ءتىزىمىن جاساۋ باستالدى. وسى ارقىلى ءبىز ارداگەرلەرگە قانداي قولداۋ شارالارىن جۇزەگە اسىرۋعا بولاتىنىن انىقتاي الامىز. الداعى ۋاقىتتا اكىمدىكتەرمەن, سپورت فەدەراتسيالارىمەن جانە باسقا دا قۇزىرلى ورگاندارمەن بىرلەسىپ قولداۋ تەتىگى قالىپتاسادى. ونىڭ ىشىندە جۇمىسپەن قامتۋعا جاردەمدەسۋ, مەديتسينالىق كومەك كورسەتۋ جانە بۇقارالىق سپورتتى دامىتۋعا تارتۋ ماسەلەلەرى بار. سىزدەردىڭ ەسىمدەرىڭىز ەلىمىزدىڭ سپورت تاريحىنا التىن ارىپتەرمەن جازىلعان. ءبىز قازىردىڭ وزىندە ءبىراز ارداگەرگە قولداۋ كورسەتىپ وتىرمىز جانە بۇل باعىتتاعى جۇمىس جالعاسىن تابادى», – دەدى مينيستر.
سونىمەن قاتار مينيستر بۇگىندە سپورتتىق مانسابىن اياقتاعان تانىمال سپورتشىلاردىڭ كوبى سپورت مەنەدجمەنتى مەن مەملەكەتتىك باسقارۋ سالاسىنا تارتىلىپ جاتقانىن اتاپ ءوتتى. ولاردىڭ دەنى قازىر سپورت باسقارمالارى مەن فەدەراتسيالاردى باسقارىپ وتىر. سالا ماماندارى قىزمەتكە تاعايىندالماس بۇرىن وڭىردەگى نەمەسە فەدەراتسياداعى سپورتتى دامىتۋ جوسپارىن كاسىبي تاجىريبەسىنە سۇيەنە وتىرىپ ۇسىنادى. بۇل شارا سپورتتاعى ساباقتاستىقتى قامتاماسىز ەتىپ, تاجىريبە الماسۋعا جول اشادى.
ايتا كەتەيىك, سپورت كۇنىنە وراي ەلىمىزدە 150-دەن استام ءىس-شارا وتەدى. ولاردىڭ باسىم بولىگى مينيسترلىكتىڭ ۇسىنىسى بويىنشا سپورت ارداگەرلەرى مەن ەڭبەك سىڭىرگەن جاتتىقتىرۋشىلاردى ۇلىقتاۋعا, سونداي-اق بۇقارالىق جانە بالالارعا ارنالعان سپورتتىق ءىس-شارالارعا باعىتتالعان.
وتاندىق سپورتتى دامىتۋ ىسىنە سپورت ارداگەرلەرىنىڭ قاتىسۋى – سالاداعى ساباقتاستىقتى دارىپتەپ قويماي, سونىمەن قاتار مىقتى ءارى كاسىبي جۇيە قالىپتاستىرۋعا ۇلەس قوسادى.
