ءتورت جولاقتى وتكەلدە جاياۋ جۇرگىنشىلەرگە ارنالعان جولاق پەن باعدارشامدار ورناتۋ كوزدەلگەن. قۇرىلىس 2024 جىلعى قاراشادا باستالعان, قازىرگى تاڭدا نىساننىڭ 50 پايىزى دايىن. مەردىگەر ۇيىمنىڭ دەرەگىنشە, جۇمىستار بەكىتىلگەن كەستەگە ساي ءجۇرىپ جاتىر.
«شىمكەنت – ەلىمىزدەگى ەڭ قارقىندى دامىپ كەلە جاتقان قالا. ونىڭ جول جەلىسى جاڭعىرتۋدى قاجەت ەتەدى. بۇل وتكەل «AMANAT» پارتياسىنىڭ سايلاۋالدى باعدارلاماسى اياسىندا سالىنىپ جاتىر جانە ول – سايلاۋشىلارعا بەرگەن ناقتى ۋادەلەرىمىزدىڭ ءبىرى. مەن وسى جوبانىڭ باعدارلاماعا ەنۋىنە باستاماشى بولىپ, قارجى بولىنۋىنە ىقپال ەتتىم. قازىر قۇرىلىس جۇمىستارى ءساتتى ءجۇرىپ جاتىر, ونى ءوزىم جەكە باقىلاۋدا ۇستايمىن», دەدى بولاتبەك ناجمەتدين ۇلى.
سونىمەن بىرگە, تىلەنشين كوشەسىندە دە وسىعان ۇقساس جول وتكەلىنىڭ قۇرىلىسى باستالعان. ونىڭ ازىرلىگى – 20 پايىز. ەكى نىسان دا 2026 جىلدىڭ سوڭىنا دەيىن پايدالانۋعا بەرىلمەك. بۇل جوبالار قالانىڭ شىعىس بولىگىن ورتالىقپەن بايلانىستىرىپ, كولىك اعىنىن قايتا بولۋگە جانە نەگىزگى ماگيسترالدەردىڭ جۇكتەمەسىن ازايتۋعا مۇمكىندىك بەرەدى.
شىمكەنتتە جول جەلىسىن جاڭارتۋ قارقىنى جوعارى. 2024 جىلدىڭ قورىتىندىسى بويىنشا جولداردىڭ 75 پايىزى جاقسى نەمەسە قاناعاتتانارلىق كۇيدە بولسا, بيىل بۇل كورسەتكىشتى 90 پايىزعا جەتكىزۋ جوسپارلانعان. 2026 جىلعا قاراي ۇزىندىعى 1000 شاقىرىمنان اساتىن 850 كوشەگە تولىق اسفالت توسەلەدى. ونىڭ ىشىندە 540 شاقىرىمى بيىل ىسكە اسىرىلماق. سونداي-اق 2025 جىلى قالادا 32 جاڭا باعدارشام ورناتىلىپ, جول بەلگىلەرى جاڭارتىلادى, رەتتەلمەيتىن وتكەلدەردىڭ باسىم بولىگى جارىقتاندىرىلادى.
دەپۋتاتتىڭ وڭىرگە ساپارى اياسىنداعى سايلاۋشىلارمەن كەزدەسۋلەرى كەشە باستالدى. ول بىرقاتار مينيسترلىكتەردىڭ وكىلدەرىمەن بىرگە الەۋمەتتىك جانە وندىرىستىك نىسانداردى ارالاپ, تۇرعىنداردى جەكە قابىلداۋدى جوسپارلاپ وتىر.
