كۇز جيىن-تەرىن ۋاقىتى. جەردە وسكەن ءداندى جەردە قالدىرماۋعا تىرىسقان وبلىس ديقاندارى قاۋىرت قيمىل ۇستىندە. ادەتتە جاۋاپتى ناۋقان الدىندا ءىس-قيمىل بارىسىن ەكشەپ, قولدا بار كۇشتى تارازىلاپ, جالپاق جۇرتتى ىرىزدىق جورىعىنا جۇمىلدىرۋعا ارەكەت ەتىلەدى. تاياۋدا استىقتى وڭىردە اۋقىمدى اگروكەڭەس وتكىزىلدى. وبلىس اكىمىنىڭ ورىنباسارى مۇرات بالپان توراعالىق ەتكەن جيىنعا 300-دەن استام ديقاندار, اۋىل شارۋاشىلىعى قۇرىلىمدارىنىڭ باسشىلارى, اۋدان اكىمدەرى جانە جەرگىلىكتى اتقارۋشى ورگانداردىڭ وكىلدەرى قاتىستى.
جيىندى اشقان مۇرات بالپان بيىلعى ناۋقاننىڭ باستى مىندەتى – جۇمىستاردى ۇيىمداسقان تۇردە, قىسقا مەرزىمدە جانە شىعىنسىز وتكىزىپ, ءوڭىردىڭ ازىق-ت ۇلىك قاۋىپسىزدىگىن قامتاماسىز ەتۋ ەكەنىن اتاپ ءوتتى.
اۋىل شارۋاشىلىعى جانە جەر قاتىناستارى باسقارماسىنىڭ باسشىسى نۇربەك بادىراقوۆتىڭ ايتۋىنشا, وبلىستىڭ جالپى ەگىس القابى 5,5 ميلليون گەكتاردى قۇرايدى, ونىڭ 495 مىڭ گەكتارى – مايلى داقىلدار, بۇل رەكوردتىق كورسەتكىش. جيناۋعا شامامەن 7 مىڭ استىق جينايتىن كومباين قاتىسادى, ولاردىڭ ۇشتەن ەكىسى – زاماناۋي, جوعارى ءونىمدى تەحنيكا.
جىل باسىنان بەرى وبلىس ديقاندار شامامەن 40 ميلليارد تەڭگەگە 1,1 مىڭ بىرلىك اۋىل شارۋاشىلىعى تەحنيكاسىن ساتىپ العان. اوك-كە مەملەكەتتىك قولداۋ كولەمى 233,5 ميلليارد تەڭگەنى قۇرادى, ونىڭ ىشىندە 63,3 ميلليارد تەڭگە – قايتارىمسىز سۋبسيديالار. قالعان قارجى جەڭىلدەتىلگەن نەسيەلەۋگە جانە فورۆاردتىق ساتىپ الۋعا باعىتتالدى.
«قازگيدرومەت» فيليالىنىڭ مالىمەتىنشە, تامىز-قىركۇيەك ايلارىندا اۋا تەمپەراتۋراسى نورما شەگىندە, جاۋىن-شاشىن مولشەرى نورماعا جۋىق نەمەسە تومەن بولادى. كوپتەگەن اۋدانداردا جازدىق بيدايدىڭ ونىمدىلىگى كوپجىلدىق ورتاشا كورسەتكىش دەڭگەيىندە كۇتىلۋدە, ال بۇلاندى, بۋراباي, زەرەندى جانە ساندىقتاۋ اۋداندارىندا ورتاشا كورسەتكىشتەن جوعارى بولادى دەپ بولجاندى.
اقمولا وبلىسى
