جاڭاشىل پلاتفورمالار
سونىمەن قاتار شاشىراڭقى مەملەكەتتىك اقپاراتتىق جۇيەلەردى رەتكە كەلتىرۋ, ولاردى بىرىزدەندىرۋ جانە تيىمدىلىگىن ارتتىرۋ باعىتىندا ناقتى قادامدار جاساۋ كەرەگىن ايتقان ەدى. بۇل – تەحنولوگيالىق جاڭعىرۋ كەزەڭىندە ەلدىڭ باسەكەگە قابىلەتتىلىگىن ارتتىرۋدىڭ باستى شارتى. وسى ساياسي باعدار اياسىندا وتاندىق كاسىپكەرلەر مەن يننوۆاتورلار تىڭ جوبالار ۇسىنىپ وتىر. ولاردىڭ قاتارىندا جول-كولىك اپاتتارىن تىركەۋدى اۆتوماتتاندىراتىن درون جۇيەلەرى دە, قىزمەتكەرلەردىڭ ونىمدىلىگىن ارتتىرۋعا ارنالعان HR-پلاتفورمالارى دا بار. مۇنداي شەشىمدەردىڭ تەك ىشكى نارىققا عانا ەمەس, حالىقارالىق دەڭگەيگە شىعا الاتىنداي الەۋەتى مول. «Astana Hub» ۇيىم داستىرعان «AI’preneurs 2025» جوباسى اياسىندا جۇزەگە اسقان ستارتاپتاردىڭ بىرقاتارىن وقىرمان نازارىنا ۇسىنامىز.
«Stiker.AI»
«Stiker.AI» – فريلانس ماماندار مەن سالىق سالاسىنداعى كەڭەسشىلەردىڭ اكىمشىلىك جۇمىستارىن جەڭىلدەتۋگە ارنالعان اۆتوماتتاندىرۋ پلاتفورماسى. جوبانىڭ باستى ماقساتى – قۇجات جيناۋ, تولەم قابىلداۋ جانە كليەنتپەن بايلانىس سياقتى ۋاقىتتى كوپ الاتىن كۇندەلىكتى ۇدەرىستەردى بارىنشا وڭتايلاندىرۋ.
جۇيە قۇجات اينالىمىن اۆتوماتتاندىرادى, كليەنتتەن قاجەتتى فايلدار مەن اقپاراتتى ءوزى سۇراپ, جيناپ, ساقتايدى, سونداي-اق تولەمدەردى تىكەلەي WhatsApp ارقىلى قابىلداۋعا مۇمكىندىك بەرەدى. بۇل قوسىمشا ينتەگراتسيالارسىز, كليەنت ءۇشىن ىڭعايلى فورماتتا جۇزەگە اسادى. سونىمەن قاتار دايىن شابلوندار, اۆتوماتتى جاۋاپتار مەن ەسكە سالعىشتار ارقىلى كليەنتپەن قارىم-قاتىناس ساپاسى ارتادى.
ارتىقشىلىعىنىڭ ءبىرى – قوسىمشا كۇردەلى باعدارلامالاردى ورناتۋدىڭ قاجەتى جوق, بارلىعى سمارتفونداعى قوسىمشالار ارقىلى ىسكە اسادى. كوماندا بۇعان دەيىن ۆەنچۋرلىق قارجىلاندىرۋسىز-اق كليەنت ۇستاپ قالۋعا باعىتتالعان SaaS ءونىمىن ىسكە قوسقان تاجىريبەلى كاسىپكەرلەردەن قۇرالعان.
ء«بىز ءونىمنىڭ ينتەرفەيسى مەن فۋنكتسيونالىنا جاۋاپ بەرەمىز, نارىقتى جاقسى بىلەمىز جانە كليەنت تارتۋدا تاجىريبەمىز مول, تەحنولوگيالىق نەگىزىمىز جاساندى ينتەللەكت پەن اۆتوماتتاندىرۋعا سۇيەنەدى, ال قارجى ستراتەگياسىن «fractional CFO» باسقارادى. اقش-تا بۇل باعىت ميللياردتاعان دوللارلىق يندۋسترياعا اينالعان, ال قازاقستان مەن تمد نارىعىندا WhatsApp ارقىلى بيزنەس-كوممۋنيكاتسيا ەندى عانا دامىپ جاتىر. وسى تۇرعىدا «STIKER.AI» – جەرگىلىكتى نارىققا بەيىمدەلگەن, قولجەتىمدى ءارى ءتيىمدى شەشىم», دەيدى جوبا اۆتورلارىنىڭ ءبىرى ۆەنەرا.
«Yer AI»
شەتەلدىڭ بەدەلدى ۋنيۆەرسيتەتىنە ءتۇسۋ – ارمان عانا ەمەس, جۇيەلى دايىندىقتى قاجەت ەتەتىن ۇزاق جول. كوپتەگەن تالاپكەر وسى جولدا ەمتيحانعا دايىندالۋ, ەسسە جازۋ, ستيپەنديا ىزدەۋ, قۇجات راسىمدەۋ سياقتى ونداعان مىندەتپەن بەتپە-بەت كەلەدى. ءدال وسى كەزدە «Yer AI» كومەكشى بولا الادى. بۇل – ۇزدىك جوعارى وقۋ ورىندارىنا تۇسۋگە ارنالعان جاساندى ينتەللەكت نەگىزىندەگى پلاتفورما. ول تالاپكەردىڭ بارلىق قابىلداۋ جۇمىس بارىسىن ءبىر جەردەن باسقارۋعا مۇمكىندىك بەرەدى. «Yer AI» ارقىلى ستۋدەنت Ielts نەمەسە Sat سەكىلدى تەستتەرگە دايىندالىپ قانا قويماي, ەسسە مەن موتيۆاتسيالىق حات جازۋ داعدىسىن جەتىلدىرەدى. سونداي-اق ستيپەنديالار مەن ۋنيۆەرسيتەتتەردى ىزدەپ تابادى, قابىلداۋ قۇجاتتارىنىڭ مارتەبەسىن باقىلايدى.
«تالاپكەرلەر ءۇشىن نەگىزگى قيىندىق – قابىلداۋ ۇدەرىسىنىڭ تىم شاشىراڭقى ءارى كۇردەلى بولۋى. ءبىز «Yer AI» ارقىلى بارلىق قاجەتتى قۇرالدى ءبىر جازىلىممەن قولجەتىمدى ەتتىك. بۇل – قالتاڭىزداعى جەكە قابىلداۋ كومانداسى. جاساندى ينتەللەكت ستۋدەنتكە دايىندىقتى جەكەلەپ جوسپارلاپ, قادام سايىن باعىت بەرەدى. ءبىزدىڭ ماقساتىمىز – تەك اقپارات ۇسىنۋ ەمەس, ستۋدەنتتى ناقتى ناتيجەگە جەتكىزۋ»,دەيدى جوبا اۆتورى ءامينا.
ورتالىق ازيادا جىل سايىن 200 مىڭنان استام جاس شەتەلدە ءبىلىم الۋعا نيەت بىلدىرەدى, بىراق ايماقتا تولىققاندى ءبىرتۇتاس پلاتفورما جوق. «Yer AI» وسى ولقىلىقتىڭ ورنىن تولتىرۋ ماقساتىندا جاسالعان. بۇل – تالاپكەر ءۇشىن ۋاقىتتى ۇنەمدەۋدىڭ, رەسۋرستاردى ءتيىمدى پايدالانۋدىڭ جانە ەڭ باستىسى ارمانداعان ۋنيۆەرسيتەتكە ءبىر قادام جاقىنداۋدىڭ زاماناۋي جولى.
«A Team»
كوپتەگەن كومپانيا باسشىسى ءوز كومانداسىنىڭ ناقتى قالاي جۇمىس ىستەپ جاتقانىن بىلمەيدى. ال كەيدە قىزمەتكەرلەر نە ءۇشىن بۇل جەردە جۇرگەنىن تۇسىنبەيدى. «Gallup» زەرتتەۋىنىڭ مالىمەتىنشە, ءار ءتورتىنشى قىزمەتكەر ءبىرىنشى جىلدىڭ ىشىندە جۇمىستان كەتەدى. مۇنىڭ سەبەبى باسشىلاردا قىزمەتكەرلەردىڭ تيىمدىلىگىن ولشەيتىن قۇرالدىڭ بولماۋى, ال قىزمەتكەرلەردە دامۋعا جانە ماقساتقا دەگەن تۇسىنىكتىڭ جوقتىعى. وسى ماسەلەنى شەشۋ ءۇشىن «Ateam» كومانداسى ەرەكشە HR-پلاتفورما جاساپ شىعارعان.
ء«بىز تاجىريبەلى كاسىپكەرلەر كومانداسىمىز. 2018 جىلدان بەرى ءارتۇرلى جوبالاردى ىسكە قوسىپ كەلەمىز, بەس ەلدە جۇمىس ىستەدىك, 250 000 دوللاردان استام ينۆەستيتسيا تارتتىق. جينالعان تاجىريبەمىزدى بىرىكتىرىپ, «Ateam» پلاتفورماسىن جاسادىق. بۇل جۇيە ءار قىزمەتكەردىڭ بىلىكتىلىگىن تەكسەرەدى, وعان جەكە دامۋ جوسپارىن جاسايدى, كەرى بايلانىستى اۆتوماتتى تۇردە تالدايدى جانە باسشىعا ناقتى ۇسىنىس بەرەدى. سونىڭ ارقاسىندا كادر تۇراقسىزدىعى ءبىر توقساندا 50%-عا ازايادى, ال تيىمدىلىك 19%-عا ارتادى. قازىرگى HR-نارىعىندا ءبىز ۇسىناتىن مۇمكىندىكتەر جوقتىڭ قاسى. اقش-تا مۇنداي قىزمەتتىڭ باعاسى ءار قىزمەتكەرگە 200 دوللاردان باستالادى. قىركۇيەكتە ءبىز اقش-تا تولىق ىسكە قوسىلىپ, 250 000 ءتىپتى ودان كوپ ينۆەستيتسيا تارتۋدى جوسپارلاپ وتىرمىز. بارلىق ازىرلەمەمىز دايىن, ەندىگى ماقسات – اۋقىمدى ماسشتابتاۋ», دەيدى كوماندا مۇشەسى ماكسيم.
مامانداردىڭ ايتۋىنشا,
«A Team» – ولشەۋىش قۇرال عانا ەمەس, ناقتى دامۋعا جەتەلەيتىن جۇيە. بۇل كومپانيالارعا قىزمەتكەرلەرىن ساقتاپ قالۋعا, ولاردىڭ ىنتاسىن ارتتىرۋعا جانە تابىسىن ەسەلەۋگە كومەكتەسەدى.
«U-Drone»
جولدا اپات بولسا, كەپتەلىس ساعاتتاپ سوزىلادى. بۇل جۇرگىزۋشىلەر ءۇشىن قالىپتى جاعدايعا اينالعان. ويتكەنى اپاتتى راسىمدەۋ ۇزاققا سوزىلادى, ال جولداعى قوزعالىس تولىق توقتايدى. ستاتيستيكا بويىنشا, ەلىمىزدە جىل سايىن 30 مىڭنان استام جول-كولىك وقيعاسى تىركەلەدى. ونىڭ شامامەن 70 پايىزىندا زارداپ شەككەندەر بولمايدى. تەك كولىك زاقىمدالادى. مۇنداي جاعدايلاردى ەۋروپروتوكول ارقىلى تەز شەشۋگە بولادى, بىراق ونى جۇرگىزۋشىلەردىڭ نەبارى 10 پايىزى عانا قولدانادى. وسى ماسەلەنى شەشۋ ماقساتىندا ستارتاپشى ەرجان اعزاموۆ «U-Drone» جۇيەسىن جاساپ شىققان. بۇل – اپات ورنىن درون ارقىلى ءتۇسىرىپ, جاساندى ينتەللەكت كومەگىمەن بىرنەشە مينۋتتا 3D-مودەل جاسايتىن جانە بارلىق مالىمەتتى اۆتوماتتى تۇردە رەسمي حاتتاماعا ەنگىزەتىن جاڭا
تەحنولوگيا.
«مەن جول قاۋىپسىزدىگى مەن قالالىق جوسپارلاۋ سالاسىندا 10 جىلدان بەرى جۇمىس ىستەيمىن. كوماندامدا درون تەحنيكاسى, ءموبيلدى تەحنولوگيالار, ماشينا جاساۋ, ەلەكتروندى ينجەنەريا جانە جول قاۋىپسىزدىگى سالاسىندا تاجىريبەلى ماماندار بار. سوندىقتان ءبىز اپات ورنىن راسىمدەۋدى تولىق اۆتوماتتاندىرۋدى ماقسات ەتتىك. جۇيە ارقىلى بۇكىل جۇمىستى جارتى ساعاتتا تىندىرۋعا بولادى. جۇيەنىڭ جۇمىس ىستەۋ ءتارتىبى قاراپايىم. پوليتسياعا حابار تۇسكەن سوڭ درون وقيعا ورنىنا ۇشادى, ءتۇسىرىلىم جاساپ, دەرەكتەردى وڭدەيدى. جاساندى ينتەللەكت دايىن حاتتامانى پوليتسياعا جولدايدى, ال قۇجات بەكىتىلگەن سوڭ جۇرگىزۋشىلەر ونى ونلاين الادى. بۇل ۋاقىتتى ۇنەمدەۋ عانا ەمەس, پوليتسيا قىزمەتكەرلەرىنىڭ جۇكتەمەسىن ازايتۋعا دا مۇمكىندىك بەرەدى», دەيدى ە.اعزاموۆ.
جۇيە قازىر الماتى مەن استانا قالالارىندا قاناتقاقتى جوبا رەتىندە ىسكە قوسىلماقشى. ازىرلەۋشىلەردىڭ ايتۋىنشا, الماتى قالالىق پوليتسيا دەپارتامەنتىمەن كەلىسسوزدەر جۇرگىزىلگەن, سونداي-اق «AkDrones» كومپانياسىمەن سەرىكتەستىك ورناتۋ جوسپاردا بار. جىل اياعىنا دەيىن كەلىسىمشارت جاسالىپ, كەلەسى جىلى كەمىندە ءۇش ايماقتا ىسكە قوسىلادى. 2027 جىلعا قاراي ءتورت ايماققا دەيىن كەڭەيتۋ كوزدەلگەن.
«Astana Hub» باس ديرەكتورى ماعجان ماديەۆتىڭ ايتۋىنشا, اتالعان ستارتاپتار كەلەسى جوباعا ۇلگى بولارلىقتاي جاڭا ستاندارت ورناتىپ وتىر.
«Astana Hub» الاڭىندا ءار اۆتور ءوز يدەياسىن ناقتى ونىمگە اينالدىرىپ, ونى نارىققا شىعارا الادى. بۇل جولدا ولارعا تاجىريبەلى ترەكەرلەر باعىت كورسەتەدى, سالالىق ساراپشىلار كاسىبي كەڭەس بەرەدى. قاجەتتى رەسۋرستارعا قول جەتكىزۋ جوبانى جىلدام دامىتۋعا مۇمكىندىك بەرەدى. مۇنداي جۇيە تيىمدىلىگىن الدەقاشان دالەلدەگەن. وسى ارقىلى شەتەلدىك ينۆەستورلارمەن كەلىسىم جاساپ, ءونىمىن باسقا ەلدەرگە ساتقان تابىستى ستارتاپتار دا بار. ءبىز ەندى ەلىمىزدەگى IT-تالانتتاردى كوبىرەك تارتىپ, ولاردىڭ الەۋەتىن اشۋعا كومەكتەسكىمىز كەلەدى. ءاربىر ستارتاپ – تەك ءبىر كاسىپتىڭ تابىسى ەمەس, بۇكىل IT-سالاسىنىڭ دامۋىنا قوسقان ۇلەس. سول سەبەپتى ءبىز جوبالاردى جاھاندىق دەڭگەيگە شىعارىپ, ەلىمىزدى ورتالىق ازياداعى تەحنولوگيالىق كوشباسشىلاردىڭ بىرىنە اينالدىرۋدى كوزدەيمىز. بۇل – ەلدىڭ يننوۆاتسيالىق الەۋەتىن ارتتىرىپ, جاستاردىڭ ءوز ەلىندە باسەكەگە قابىلەتتى ءونىم جاساۋىنا مۇمكىندىك بەرەتىن ماڭىزدى قادام», دەيدى ول.
