اۋىل الدەنىپ كەلەدى

اقكول – ءبىر كەزدەرى اۋدان ورتالىعى اتانىپ, كەيىنىرەك ىرىلەندىرۋگە بايلانىستى بۇل اتاعىن ءوز قولىمەن قاراتاۋ قالاسىنا بەرگەن ەلدى مەكەن. سودان كەيىن كوزدەن تاسا قالىپ, سول جىلدارى بۇل اۋىلدىڭ باسىنان باعى تايىپ, بازارى تارقاعانداي ازىپ-توزا باستاعانى دا جاسىرىن ەمەس. بەلگىلى اقىن, وسى توپىراقتىڭ پەرزەنتى, مارقۇم نارشا قاشاعانوۆتىڭ اقكولدەن ەل كوشىپ جاتىر دەپ كۇڭىرەنەتىن كەزى دە وسى تۇس. قازاقستاننىڭ كارتاسىنا جالپاعىنان جايعاسقان جامبىل وبلىسىنىڭ ءبىر ءبۇيىرىن جىلىتىپ, تامىرىنا قان جۇگىرتىپ جاتقان اقكولدىڭ ءبىر قاراعاندا جۇدەيتىندەي جاعدايى دا جوق سياقتى. قازىر قىزىلوردا, كورشى وڭتۇستىك قازاقستان وبلىسىنىڭ سوزاق اۋدانىنان, ودان بەرىدەگى جاڭاتاس قالاسىنان الماتى, استانا باعىتىندا جولعا شىققان اۆتوبۋس, كولىكتەر وسى اۋىل ارقىلى وتەدى. ودان قالسا سارىسۋدان تۇز تاسىعان, امانگەلدىدەن گاز تاسىعان كولىكتەر اعىلىپ جاتىر. بىلايشا ايتقاندا, جول جاعالاي ورنالاسقان اقكولدىڭ وزەگى تالاتىنداي تۇرمىسى تىم تومەن ەمەس. سوڭعى جىلدارى اقكول دەگەندە ويىمىزعا بىردەن اۋىزسۋ ماسەلەسى تۇسەتىن بولدى. قايبىر جىلى سوناۋ تاڭىرقازعاننىڭ بيىگىنەن وسى اۋىلعا قۇبىر تارتىلىپ, بىراق سۋ جاقسى جەتپەي, ەلدى ابدەن شۋلات­قانى بار. وسى جۇمىستى قولعا العاندار ءبىر باستالعان تىرلىكتى مىڭ قايتارا ىستەپ, كەشەگە دەيىن اۋىزسۋدىڭ «جىرى» ەش بىتپەدى. – كوپ ۋاقىتتان بەرى داۋ بولىپ كەلە جاتقان اۋىزسۋ ماسەلەسى وتكەن جىلدىڭ قىركۇيەگىندە شەشىمىن تاۋىپ, العاشىندا تاۋلىگىنە ءبىر مارتە, جەلتوقسان ايىنان باستاپ ەكى رەتتەن سۋ بەرىلە باستادى. قازىر اۋىلداعى 410 ءۇيدىڭ 382-ءسى تازا سۋ ءىشىپ وتىر. قالعان 28 ۇيگە تۇرعىندارىنىڭ بولماۋىنا بايلانىستى قۇبىر كىرگىزىلمەدى. سوڭعى جىلدارى ەلدىڭ تۇرمىسى جاقسارىپ كەلەدى. بۇگىندە اۋىلدا ۇلكەن جولدى جاعالاي ورنالاسقان 14 ازىق-ت ۇلىك دۇكەنى, 2 كافە, 1 دوڭگەلەك جەلىمدەۋ ورنى مەن 1 جانارماي قۇيۋ بەكەتى جۇمىس ىستەيدى. ودان بولەك قىمىز, شۇبات وندىرۋمەن اينالىساتىن شارۋا قوجالىقتارى بار. كەي شارۋاشىلىقتار استانا, الماتى, تاراز جانە قاراتاۋ قالالارىنا اپارىپ ءوز ونىمدەرىن ساۋدالاۋدا. جالپى العاندا, اۋىلدا 31 شارۋا قوجالىق ناقتى جۇمىس ىستەپ جاتىر. تاعى دا ءبىراز شارۋاشىلىقتار ىرىلەنۋ ۇستىندە, – دەيدى اقكول اۋىلدىق وكرۋگىنىڭ اكىمى اسقار قۋانىش. اۋىلدا №14 تالاس كوللەدجى, 2 مەكتەپ, 140 ورىندىق «قارلىعاش» بالاباقشاسى, بالالار ونەر مەكتەبى, جاسوسپىرىمدەر سپورت مەكتەبى جۇمىس ىستەيدى. شىنىن ايتۋ كەرەك, قازىر اۋىلداردىڭ تىرشىلىگىن وسىنداي مەملەكەتتىك مەكەمەلەر دە جانداندىرىپ وتىر عوي. وتكەن جىلدارى اقكولگە وبلىس ورتالىعىنداعى جۇيكە اۋرۋلارى ينتەرناتىنىڭ ءبىر بولىگى كوشىپ كەلەدى ەكەن دەگەن اڭگىمە شىققان. بىراق, جامبىل وبلىستىق ەڭبەك جانە حالىقتى الەۋمەتتىك قورعاۋ باسقارماسىنىڭ باسشىسى جورابەك باۋبەكوۆ قارجى داعدارىسىنا بايلانىستى بۇل ءىستىڭ باسقاشا شەشىلگەنىن ايتادى. شىنىندا, ينتەرنات كوشىپ كەلسە عيمارات تا دايىن, ءبىر جاعى اقكولدىكتەرگە جۇمىس تابىلىپ, تىرشىلىگىنە سەپ بولىپ, ەل ءبىر سەرپىلىپ قالار ەدى. – ءبىزدىڭ اۋىلعا ءبىر بانكومات كەرەك. قازىر اۋىلدا اي سايىن جالاقى الاتىندار بارشىلىق. ودان بولەك, زەينەتاقى الاتىندار دا كوپ. سول ءۇشىن, قاراتاۋ قالاسىنا, قالا بەردى, سوناۋ تاراز قالاسىنا سەندەلەدى. سوسىن ىرگەمىزدە «امانگەلدى» گاز كەنىشى جاتىر, وسى مەكەمەگە ءبىزدىڭ اۋىلدىڭ جىگىتتەرى دە كوپتەپ جۇمىسقا تارتىلسا. بالكىم, كەنىشتە جۇمىس ىستەۋ ءۇشىن ارنايى مامان رەتىندە دايىندار, بولماسا قاراۋىل, اسپازشى, باسقا دا قارا جۇمىستاردى اتقارۋ اۋىلداعى ازاماتتاردىڭ قولىنان كەلەدى ەمەس پە؟ – دەيدى اقكول اۋىلىنىڭ تۇرعىندارى. اۋىلدا 67 جۇمىسسىز رەسمي تۇردە تىركەلگەن. وتكەن جىلى ولاردىڭ 39-ى تۇراقتى جۇمىسپەن قامتىلىپ, 18-ءى قوعامدىق جۇمىسقا تارتىلىپتى. بۇدان بولەك «ورلەۋ» جوباسى بويىنشا 9 ادام جۇمىسقا ورنالاسقان. – تالاس – نەگىزىنەن اۋىل شارۋاشىلىعى دامىعان اۋدان. «سىباعا» باعدارلاماسى بويىنشا وتكەن جىلى «اگرارلىق نەسيە كورپوراتسياسى» اق-تان 4 شارۋاشىلىق 53,0 ملن. تەڭگە نەسيە الىپ, 304 باس سيىر جانە 17 باس اسىلتۇقىمدى بۇقا ساتىپ الدى. سونىڭ ىشىندە اقكول اۋىلدىق وكرۋگىنەن «دياس» شارۋا قوجالىعى 10,2 ملن. تەڭگە نەسيە الىپ, 57 باس سيىر, 3 باس بۇقا ساتىپ الدى. جالپى العاندا, بىرىكسە بىتپەيتىن, ۇيىمداسسا ۇتپايتىن تىرلىك جوق. اقكول – بۇدان دا اۋىر, بۇدان دا جاۋاپتى كەزەڭدەردە مويى­ماي, بار قيىندىقتى ابىرويمەن ەڭسەرگەن اۋىل. اقكولدىكتەردىڭ قازىرگى قادامى, تىرشىلىگى كوڭىل قۋانتادى, – دەيدى تالاس اۋدانىنىڭ اكىمى بولات رىسمەندي. ورالحان ءداۋىت, «ەگەمەن قازاقستان». جامبىل وبلىسى, تالاس اۋدانى, اقكول اۋىلى. سۋرەتتى تۇسىرگەن التىنبەك قارتاباي.