كەلىسسوزدەر بارىسىندا كولىك-لوگيستيكالىق ينفراقۇرىلىمى, اۋىل شارۋاشىلىعى, شيكىزاتتى قايتا وڭدەۋ, جاڭارتىلاتىن ەنەرگەتيكا, مۇناي وڭدەۋ جانە جوعارى تەحنولوگيالىق ءوندىرىس سياقتى سالالارعا ۇزاقمەرزىمدى ينۆەستيتسيالار تارتۋ مۇمكىندىكتەرىنە ەرەكشە نازار اۋدارىلدى. قاراستىرىلعان ناقتى جوبالار قاتارىندا حالىقارالىق كولىك دالىزدەرىنە شىعاتىن لوگيستيكالىق حابتاردى سالۋ جانە جاڭعىرتۋ, اگروونەركاسىپ كەشەنىنە وزىق تەحنولوگيالاردى ەنگىزۋ, «جاسىل» ەنەرگەتيكا (كۇن جانە جەل ەلەكتر ستانسالارى) سالاسىندا بىرلەسكەن كاسىپورىندار قۇرۋ, سونداي-اق مۇناي وڭدەۋ قۋاتتارىن دامىتۋ بار. كومپانيا بۇل باستامالاردى جۇزەگە اسىرۋعا 1,5 ملرد اقش دوللارىنا دەيىن ينۆەستيتسيا سالۋعا دايىن ەكەنىن ءبىلدىردى.
كەزدەسۋ بارىسىندا ع.وسپانقۇلوۆ مەملەكەتىمىز ينۆەستورلارعا مەملەكەتتىك قولداۋدىڭ كەڭ اۋقىمىن جانە حالىقارالىق نارىقتارعا قولجەتىمدىلىكتى قوسا العاندا, بيزنەس جۇرگىزۋگە قولايلى جاعداي ۇسىنا الاتىنىن جەتكىزدى.
– الدىڭعى قاتارلى حالىقارالىق ينۆەستيتسيالىق قورلارمەن ىنتىماقتاستىق ەلىمىزگە ەكونوميكانى ارتاراپتاندىرۋعا جانە وزىق تەحنولوگيالاردى ەنگىزۋ باعىتىندا قوسىمشا مۇمكىندىكتەرگە جول اشادى. ەل اۋماعىندا بولاشاعى زور جوبالاردى ىسكە اسىرۋعا تولىق قولداۋ كورسەتۋگە دايىنبىز, – دەدى ءسىم ينۆەستيتسيالار كوميتەتىنىڭ توراعاسى.
ءوز كەزەگىندە ش.بەن حامو ەلىمىزدىڭ ينۆەستيتسيالىق الەۋەتىن جوعارى باعالاپ, ونىڭ نەگىزگى ساۋدا جولدارىنىڭ توعىسىنداعى ستراتەگيالىق ورنالاسۋىن, تۇراقتى ماكروەكونوميكالىق سەرپىنىن اتاپ ءوتتى. ونىڭ سوزىنشە, ەلىمىز وندىرىستىك قۋاتتاردى ورنالاستىرۋعا, جاھاندىق جەتكىزۋ تىزبەكتەرىنە ينتەگراتسيالانۋعا, جوعارى ەكسپورتتىق الەۋەتى بار اۋقىمدى باستامالاردى جۇزەگە اسىرۋعا قولايلى جاعدايعا يە.
تاراپتار جەكەلەگەن باستامالار بويىنشا مازمۇندى كونسۋلتاتسيالاردى جالعاستىرۋعا, قول جەتكىزىلگەن ۋاعدالاستىقتاردى بەكىتۋ ءۇشىن شەڭبەرلىك كەلىسىمدەرگە قول قويۋ مۇمكىندىگىن قاراستىرۋعا ۋاعدالاستى.
ايتا كەتەيىك «ValueLBH Fund» – حالىقارالىق تاجىريبەسى بار ينۆەستيتسيالىق قور, ول جىلجىمايتىن م ۇلىك, ەنەرگەتيكا, ينفراقۇرىلىم, اگروبيزنەس سالالارىنداعى جوبالاردى قارجىلاندىرۋ جانە سۇيەمەلدەۋ بويىنشا ماماندانعان. قور ءوسۋ الەۋەتى جوعارى جانە ورنىقتى ەكونوميكالىق مودەلدەرى بار جوبالارعا ينۆەستيتسيا سالادى, سونداي-اق ەكولوگيالىق ستاندارتتار مەن الەۋمەتتىك جاۋاپكەرشىلىككە ەرەكشە كوڭىل بولەدى.
