سۋرەتتى تۇسىرگەندەر – ا.دۇيسەنباەۆ, ە.ۇكىباەۆ
كەڭەستە ىشكى ىستەر ءمينيسترى ەرجان سادەنوۆتىڭ, ۇلتتىق قاۋىپسىزدىك كوميتەتىنىڭ توراعاسى ەرمەك ساعىمباەۆتىڭ, دەنساۋلىق ساقتاۋ ءمينيسترى اقمارال ءالنازاروۆانىڭ جانە قارجىلىق مونيتورينگ اگەنتتىگىنىڭ توراعاسى جانات ەليمانوۆتىڭ باياندامالارى تىڭدالدى.
مەملەكەت باسشىسىنىڭ ايتۋىنشا, بۇل الەۋمەتتىك كەسەلدىڭ بەلەڭ الۋىنا قاتىستى احۋال ەلىمىزدە دە, حالىقارالىق اۋقىمدا دا الاڭداتارلىق جاعدايعا جەتتى.
– ناركوتيزم – زاماننىڭ دەرتى, قوعام ءۇشىن اسا قاۋىپتى. ول جاستاردىڭ بولاشاعىنا بالتا شابادى. ۇلت ساۋلىعىنا قاتەر توندىرەدى. ناشاقورلىق پەن ەسىرتكى بيزنەسىندەگى الەمدىك ءۇردىس الاڭداتارلىق سيپاتقا يە بولدى. كوپتەگەن ەلدىڭ ۇكىمەتتەرى اتالعان پروبلەمانى فيزيكالىق جانە پسيحيكالىق تاۋەلدىلىك قانا ەمەس, اۋقىمدى قوعامدىق, ەكونوميكالىق جانە قۇقىقتىق قۇبىلىس رەتىندە قاراستىرا باستادى. ناركوتيزم تەرمينى مۇنداي ءتاسىلدىڭ ءمان-ماعىناسىن اشادى, – دەدى قاسىم-جومارت توقاەۆ.
ساراپشىلار مەن عالىمدار ناركوتيزم ۇعىمىنىڭ ناشاقورلىقتان الدەقايدا كەڭ ەكەنىن, الەۋمەتتىك, ەكونوميكالىق جانە قۇقىقتىق پروبلەمالارمەن, سونىڭ ىشىندە ۇلتتىق قاۋىپسىزدىك ماسەلەسىمەن ۇشتاسىپ جاتقانىن ايتادى.
پرەزيدەنت ەسىرتكىگە تاۋەلدىلەر ەمدەۋ-ساۋىقتىرۋ شارالارىمەن جەتكىلىكتى دەڭگەيدە قامتىلماي وتىرعانىنا نازار اۋدارىپ, ماسەلەنى شەشۋ قاجەت ەكەنىن مالىمدەدى.
– ەسىرتكىگە تاۋەلدى جانداردىڭ كوپشىلىگى مەن ولاردىڭ جاقىندارى جاريالىلىقتان جانە جۇرتشىلىقتىڭ تالقىلاۋىنان قاۋىپتەنىپ, پروبلەماسىن جاسىرادى, – دەدى مەملەكەت باسشىسى.
بۇل رەتتە مەملەكەتتىك ساياساتتىڭ ناشاقورلارعا كەڭشىلىك تانىتىپ, ال ەسىرتكى ساۋداسىنا كەلگەندە قاتاڭ جانە مۇلدە توزبەۋشىلىك ۇستانىمدا بولۋعا ءتيىس ەكەنى ايتىلدى.
قاسىم-جومارت توقاەۆ اتالعان ىندەتكە قاتىستى ستاتيستيكالىق مالىمەتتەردى جيناۋ مەن وڭدەۋ باعىتىنداعى اقپاراتتىق-ساراپتامالىق جۇمىستى جەتىلدىرۋ, سونداي-اق حيميالىق زاتتاردىڭ تارالۋىن قاداعالاۋ ماسەلەلەرىن تاعى ءبىر ماڭىزدى مىندەت دەپ سانايدى.
پرەزيدەنت ناشاقورلىقتىڭ الدىن الۋ شارالارىن كۇشەيتۋدى, اسىرەسە, ءبىلىم بەرۋ مەن اقپارات سالاسىندا كەڭىنەن جۇمىس جۇرگىزۋدى تاپسىردى.
مەملەكەت باسشىسىنىڭ پىكىرىنشە, جاستار اراسىندا ەسىرتكىنىڭ ناسيحاتتالۋىنا جول بەرۋگە بولمايدى. بۇل رەتتە ول ينتەرنەتتە جانە مەديا يندۋستريادا تىيىم سالىنعان زاتتار مەن ىشىمدىك ءىشۋدى دارىپتەيتىن جاعىمسىز ءۇردىس بەلەڭ العانىنا توقتالدى.
جيىندا ەسىرتكىمەن بايلانىستى قۇقىق بۇزۋشىلىقتى انىقتاۋ, جولىن كەسۋ مەن جازالاۋدىڭ تيىمدىلىگىن ارتتىرۋعا قاتىستى كەشەندى ماسەلەلەرگە ەرەكشە ءمان بەرىلدى.
– كەز كەلگەن ەسىرتكى ءتۇرىنىڭ ءوندىرىسى مەن ساتىلىمىنا قاتاڭ تىيىم سالىنىپ, مەملەكەتتىڭ ءجىتى باقىلاۋىندا بولۋى كەرەك, – دەدى پرەزيدەنت.
قاسىم-جومارت توقاەۆ ترانسۇلتتىق ۇيىمداسقان قىلمىسقا قارسى ءىس-قيمىلدى, سونداي-اق ەسىرتكى ساتاتىن ورىندار مەن زەرتحانالاردىڭ يەلەرىن اشكەرەلەۋ جۇمىستارىن كۇشەيتۋ قاجەتتىگىن ايتتى.
سونىمەن قاتار مەملەكەت باسشىسى كۇماندى قارجى وپەراتسيالارىن باقىلاۋعا الۋدىڭ ماڭىزىنا توقتالدى. بۇل تۇيتكىل قۇقىق قورعاۋ ورگاندارىنىڭ نازارىنان تىس قالماۋعا ءتيىس.
پرەزيدەنت ناركوتيزمگە قارسى كۇرەسكە قوعام بولىپ جۇمىلۋدىڭ ماڭىزدى ەكەنىن اتاپ ءوتتى. سونداي-اق ۇكىمەتكە, ءوڭىر اكىمدەرىنە جانە جاۋاپتى مەملەكەتتىك ورگاندارعا ناشاقورلىقتان ساقتاندىرۋ جانە ەسىرتكى بيزنەسىنە قارسى كۇرەس شارالارىن كۇشەيتۋ جونىندە بىرقاتار ناقتى تاپسىرما بەردى.
جيىن قورىتىندىسى بويىنشا مەملەكەت باسشىسى ناشاقورلىققا جانە ەسىرتكى قىلمىسىنا قارسى ءىس-قيمىل ماسەلەلەرى جونىندەگى ۆەدومستۆوارالىق شتابتى ىشكى ىستەر مينيسترلىگىنىڭ قاراۋىنان الىپ, قازاقستان رەسپۋبليكاسى ۇكىمەتىنىڭ دەڭگەيىنە كوتەرۋدى تاپسىردى. بۇل ناشاقورلىقپەن جانە ەسىرتكى ساۋداسىمەن كۇرەستى جانداندىرۋعا, سونداي-اق ءتيىستى مەملەكەتتىك ورگاندار اراسىنداعى جۇمىستى اناعۇرلىم ءتيىمدى ۇيلەستىرۋگە مۇمكىندىك بەرەدى.
