ءىس-شارا ماڭعىستاۋ وبلىسى اكىمدىگى, قر ەكولوگيا جانە تابيعي رەسۋرستار مينيسترلىگى جانە تەگەران كونۆەنتسياسى حاتشىلىعىنىڭ بىرلەسىپ ۇيىمداستىرۋىمەن ءوتتى. وعان تەگەران كونۆەنتسياسى حاتشىلىعىنىڭ وكىلدەرى, مەملەكەتتىك ورگاندار, عىلىمي-زەرتتەۋ ينستيتۋتتارى, جاس ەكولوگتار مەن ۇكىمەتتىك ەمەس ۇيىمداردىڭ وكىلدەرى قاتىستى. قاتىسۋشىلار كليماتتىڭ وزگەرۋى كاسپي تەڭىزى ەكوجۇيەسىنە قالاي اسەر ەتىپ جاتقانىن تالقىلاپ, ونىڭ كەرى اسەرىن ازايتۋعا باعىتتالعان ۇسىنىستار ازىرلەدى.
ءىس-شارا بارىسىندا ماڭعىستاۋ وبلىسى بويىنشا بالىق ينسپەكتسياسى باسقارماسىنىڭ مامانى گۇلنۇر ابدىعاليەۆا يتبالىقتاردىڭ تىرشىلىك ورتاسىن ساقتاۋ شارالارىنىڭ ماقسات-مىندەتتەرى تۋرالى ايتىپ بەردى.
«مۇنداي شارالاردى ءۇش كەزەڭگە بولۋگە بولادى. ءبىرىنشى كەزەڭدە مىندەتتى تۇردە تالدامالىق جۇمىس جۇرگىزىلۋى قاجەت. ارحيۆتىك ماتەريالداردى, ەسەپتەر مەن بۇرىن جاسالعان زەرتتەۋلەردى پايدالانا وتىرىپ, ساراپتامالىق شولۋ ۇيىمداستىرىلادى. ەكىنشى كەزەڭ – ادىستەمەلىك جۇمىس. بۇل كەزەڭدە سىرتقى فاكتورلاردىڭ يتبالىقتاردىڭ مىنەز-قۇلقىنا اسەرى مەن بالىقتارعا اكۋستيكالىق ىقپالى زەرتتەلەدى. سونىمەن قاتار شۋ مەن ءدىرىل سياقتى فاكتورلار قاراستىرىلادى. ءۇشىنشى كەزەڭدە ناقتى ءىس-شارالار بويىنشا ۇسىنىستار ازىرلەنەدى. مىسالى, ماۋسىمدىق كەزەڭدەرگە بايلانىستى كەمەلەر قوزعالىسىن رەتتەۋ, ۋىلدىرىق شاشاتىن اۋماقتاردى قورعاۋ جانە بالىق قورىن ارتتىرۋ بويىنشا ۇسىنىستار ەنگىزىلەدى», دەدى گۇلنۇر ابدىعاليەۆا.
سونداي-اق كەزدەسۋدە «AMANAT» پارتياسىنىڭ ماڭعىستاۋ وبلىستىق فيليالى جانىنداعى ەكولوگيالىق كەڭەستىڭ توراعاسى ورىنباسار توقجانوۆ كاسپي تەڭىزىنىڭ پروبلەمالارىنا توقتالدى.
«كاسپي تەڭىزى دەڭگەيىنىڭ تومەندەۋى – بۇل تەك ەكولوگيالىق ماسەلە عانا ەمەس, سونىمەن قاتار ايماقتىڭ الەۋمەتتىك-ەكونوميكالىق دامۋىنا اسەر ەتەتىن فاكتور. ءبىز تەڭىز تابيعاتىن ساقتاۋ جانە ونىڭ بولاشاعىن قامتاماسىز ەتۋ ءۇشىن بارلىق مۇددەلى تاراپتاردىڭ كۇشىن بىرىكتىرۋىمىز كەرەك», دەپ اتاپ ءوتتى ورىنباسار توقجانوۆ.
