پەريناتالدىق ورتالىق – ۇزدىكتەر قاتارىندا
قالا اكىمدىگى حالىقتىڭ دەنساۋلىعىنا باسا كوڭىل ءبولىپ وتىر. ءتىپتى ول ءۇشىن ارنايى وڭىرلىك باعدارلاما قابىلدادى. سول ارقىلى تۇرعىنداردىڭ دەنساۋلىعىن جاقسارتىپ, ساپالى مەديتسينالىق كومەكتىڭ قولجەتىمدىلىگىن ارتتىرۋدى كوزدەيدى. باستاما ءساتتى جۇزەگە اسسا, كەلەشەكتە بارلىق ءوڭىردىڭ مەديتسيناسىن دامىتۋ وسى باعدارلاماعا نەگىزدەلەدى. سوندىقتان شىمكەنتتىڭ دەنساۋلىق ساقتاۋ سالاسى ەلىمىزدىڭ, الەمنىڭ ەڭ وزىق تاجىريبەلەرىنە سۇيەنە وتىرىپ, العا قادام باسىپ كەلەدى.
مەگاپوليس مەديتسيناسىنىڭ ورلەپ جاتقانىنىڭ تاعى ءبىر دالەلى – ەلىمىز بويىنشا تۇزىلگەن رەيتينگتە قالالىق پەريناتالدىق ورتالىق دەنساۋلىق ساقتاۋ مەكەمەلەرى ىشىندە العاشقى تورتتىككە ەنگەن. وسى ارقىلى پەرزەنتحانا ۇجىمىنىڭ ناتيجەلى ەڭبەگىن كورۋگە بولادى. ساپالى مەديتسينالىق قىزمەت پەن جۇيەلى جۇمىستى انىقتاۋ ءۇشىن دەنساۋلىق ساقتاۋ مينيسترلىگى ەلىمىز بويىنشا 772 ۇيىم اراسىندا رەيتينگتىك تالداۋ جۇرگىزگەن. ولاردىڭ اراسىندا مەملەكەتتىك جانە جەكە كلينيكالار دا بار. ۇزدىكتەر قاتارىنان كورىنگەن ورتالىقتىڭ باس دارىگەرى گۇلبانۋ جۇماعاليقىزىنىڭ ايتۋىنشا, تاريف ەسەبىنەن انا مەن بالا دەنساۋلىعىن ساقتاۋعا بولىنەتىن قارجى بىرنەشە ەسە وسكەن. وسى قاراجاتقا پەرزەنتحانا ماتەريالدىق-تەحنيكالىق بازاسىن جاڭارتقان. ونىڭ ىشىندە جۇكتى ايەلدەردى سكرينينگتىك تەكسەرۋدەن وتكىزەتىن ۋدز اپپاراتتارى ساتىپ الىندى. ال مامانداردىڭ بىلىكتىلىگىنىڭ ارتۋى ناتيجەسىندە, سابيلەر ءولىمى 1,5 ەسەگە تومەندەدى. ال جاتىر ىشىندەگى سابيلەردىڭ ءولىمى 2 ەسەگە ازايدى. پەريناتالدىق ورتالىق جۇكتى, جاڭا تۋعان ايەلدەر مەن سابيلەرگە ءۇشىنشى دارەجەدە مەديتسينالىق قىزمەت كورسەتەدى. بىلتىر شىمكەنتتە 29 124 نارەستە دۇنيەگە كەلسە, ونىڭ 893-ءى وسى ورتالىقتا تۋعان. بۇل مەكەمە مەن باسقا دا پەرزەنتحانالاردا مەديتسينالىق قىزمەتتىڭ ساپاسىن كۇشەيتۋ ماقساتىندا كادرلاردىڭ كاسىبي بىلىكتىلىگىن ارتتىرۋعا باعىتتالعان ارنايى كۋرستار وتكىزىلدى. وسى ماقساتپەن وتكەن جىلى اكۋشەر-گينەكولوگ, رەانيماتولوگ, نەوناتولوگ ماماندار الىس-جاقىن شەتەلدەردە تاجىريبە الماسىپ قايتتى. قالالىق پەريناتالدىق ورتالىقتا گوسپيتالدى فارماتسيا ءبولىمى اشىلعان. بۇل – مەكەمەنىڭ ەڭ ۇلكەن جەتىستىگىنىڭ ءبىرى. پەرزەنتحانادا مۇنداي ءبولىمنىڭ بولۋى – الەمدىك تاجىريبەدە بار جانە بۇگىنگى مەديتسينانىڭ باستى تالابى. ءبولىمنىڭ مىندەتىنە دارىگەرلەردىڭ نۇسقاۋى بويىنشا ساپالى ەمدىك پرەپاراتتار دايىنداۋ, ونىڭ اسەرى مەن ناتيجەلىلىگىن باقىلاپ وتىرۋ كىرەدى. باس دارىگەردىڭ مالىمدەۋىنشە, بىلتىر 8116 ەكستراگەنيتالدى پاتولوگياسى بار جۇكتى ايەلدەر ورتالىقتىڭ كەڭەس بەرۋ-دياگنوستيكالاۋ بولىمىندە قارالدى. سونداي-اق وتباسىن جوسپارلاۋ ايماعىندا جۇكتى جانە جاڭا تۋعان ايەلدەر جۇكتىلىكتەن ساقتانۋدىڭ جولدارى مەن بالا كوتەرۋدىڭ ارالىق ۋاقىتى جونىندە كەڭەس الا الادى.
«قۇرساق كوتەرگەن ايەلدەرگە بارلىق مەديتسينالىق كومەكتەر قاراستىرىلسا, ول قولجەتىمدى بولسا انا مەن بالانىڭ دەنساۋلىعىنىڭ قورعالعانى. بۇل جونىنەن ەلىمىزدە, ونىڭ ىشىندە شىمكەنتتە وتە اۋقىمدى جۇمىس جۇرگىزىلىپ جاتىر. مەديتسينا سالاسىنداعى وسىناۋ ماڭىزدى وزگەرىستەر ناتيجەسىندە, بۇرىنعى كەزبەن سالىستىرعاندا مەگاپوليستە انا مەن بالا ءولىمى سانى الدەقايدا تومەندەدى. ءبىز وتكەن جىلدىڭ ماۋسىمىنان باستاپ ء«بىر كۇندىك كلينيكا» جوباسىن ەنگىزدىك. سونىڭ اياسىندا حروموسومالىق پاتولوگياسى, باسقا دا كىناراتى بار سابيلەردى ءالى تۋماي تۇرىپ ەرتە باستان انىقتاۋعا مۇمكىندىك الدىق. جۇكتى ايەلدەر ء«بىر تەرەزە» قاعيداتى بويىنشا پەريناتالدىق ورتالىققا كەلىپ, بارلىق دياگنوستيكالىق تەكسەرۋدەن ءوتىپ, ءبىر كۇندە ناتيجەسىن بىلە الادى. ەگەر شارانادا اناعا قانداي دا ءبىر قاۋىپ توندىرەتىن اۋرۋ بەلگىسى بولسا نەمەسە دۇرىس جەتىلمەسە, جۇكتىلىكتى مەرزىمىنەن بۇرىن توقتاتۋعا كەڭەس بەرىلەدى. بۇل قىزمەت ءتۇرى پايدا بولعالى ون مىڭنان استام دياگنوستيكالىق تەكسەرۋ جۇرگىزىلدى. ىشتەگى قۇرساق دۇرىس جەتىلمەگەندىكتەن, قانشاما ايەل جۇكتىلىكتى مەرزىمىنەن بۇرىن توقتاتتى. سونىڭ ناتيجەسىندە دەنساۋلىعىندا تۋا ءبىتتى اقاۋى بار نارەستەلەر سانى بىرنەشە ەسەگە ازايدى. ستاتيستيكاعا نازار سالساق, دەنساۋلىعىندە كىناراتى بار كۇيدە تۋعان نارەستەلەردىڭ ءولىمى بىلتىر 40 پايىزداي تومەندەدى. ماسەلەن, وتكەن جىلى 29 جاعداي بولسا, 2023 جىلى اۋرۋ سالدارىنان شەتىنەپ كەتكەن بالالاردىڭ سانى 48-گە جەتكەن», دەدى گۇلبانۋ جۇماعاليقىزى.
باس دارىگەردىڭ ايتۋىنشا, پەريناتالدىق ورتالىقتا ەكى جىلدان بەرى نەوناتالدىق حيرۋرگيالىق وپەراتسيا ءساتتى جاسالىپ كەلەدى. ول ءۇشىن مەكەمەدە ناۋقاستار جاتاتىن ارنايى توسەكتىك ورىندار قاراستىرىلدى. بۇل باستاما جاڭا تۋعان نارەستەلەرگە قاجەت جاعدايدا وپەراتسيا جاساپ, ءومىرىن ساقتاپ قالۋ ءۇشىن ءارى وسىنداي ناۋقاستارعا كورسەتىلەتىن مەديتسينالىق كومەكتەردىڭ ساپاسىن جاقسارتۋ ماقساتىندا قولعا الىنىپ وتىر. ەڭ كەرەمەت تۇسى نەوناتالدىق حيرۋرگيالىق وپەراتسيا ناۋقاس ءسابي جانساقتاۋ بولىمىندە جاتقان ۋاقىتىندا دا جاسالا بەرەدى. مۇنداي شۇعىل وپەراتسيا ومىرىنە قاۋىپ تونگەن نارەستەلەرگە دەر كەزىندە مەديتسينالىق كومەك كورسەتىپ, اجالدان اراشالاپ الىپ قالۋ ءۇشىن كەرەك. قالالىق پەريناتالدىق ورتالىقتا وسىنداي ەلۋدەن استام وپەراتسيا جاسالدى. سونىڭ ناتيجەسىندە, اۋرۋ بوپ تۋعان نارەستەلەردىڭ ءولىمى كۇرت ازايدى. ءوز كەزەگىندە نەاناتولوگ حيرۋرگتەر بىلىكتىلىگىنىڭ ارقاسىندا ءبىر كيلو سالماقپەن تۋعان كىشكەنتاي شاقالاقتارعا دا وسى پەرزەنتحانادا كۇردەلى وپەراتسيالار جاسالىپ جاتىر. بۇل دارىگەر مامانداردىڭ كاسىبي شەبەرلىگىنىڭ جوعارى ەكەنىن كورسەتەدى. جانە بىلىكتىلىكتى ارتتىرۋ بويىنشا ارنايى كۋرستار مەن الىس-جاقىن شەتەلدەردە تاجىريبە الماسۋ ءىسىنىڭ ءوز ناتيجەسىن بەرگەنىن بايقاتادى. وسى ورايدا پەرزەنتحانا ماماندارى بۇدان دا بيىك ناتيجەلەرگە قول جەتكىزۋ ءۇشىن ءالى دە ىزدەنىستەرىن ارتتىرىپ ەڭبەكتەرىن ەسەلەۋگە دايىن.
انا مەن بالا ساۋلىعى – باستى نازاردا
شىمكەنتتە ساناۆياتسيا دا تۇرعىندارعا مەديتسينالىق كومەك كورسەتۋدە قالتقىسىز قىزمەت اتقارىپ كەلەدى. سول قىزمەتتىڭ كومەگىمەن قالالىق پەريناتالدىق ورتالىقتىڭ نەاناتولوگيا بولىمشەسىنە شۇعىل تۇردە جيىرماعا جۋىق ناۋقاس ءسابي جاتقىزىلدى. ولاردىڭ بارلىعىنا قاجەتتى مەديتسينالىق كومەك كورسەتىلىپ, سونىڭ ناتيجەسىندە دارىگەرلەر نارەستەلەردى امان الىپ قالدى. بارىنەن بۇرىن ءسابيىنىڭ وڭالعانىن كورگەن انا باقىتتى. بالانىڭ ساۋ بوپ ومىرگە كەلۋى كوپ جاعدايدا اناعا دا بايلانىستى. ماسەلەن, ءجيى قۇرساق كوتەرۋ تەك انانىڭ وزىنە ەمەس, بالانىڭ دا دەنساۋلىعىنا قاۋىپ تۋعىزۋى مۇمكىن. مۇنداي جاعدايدا پەريناتالدىق ورتالىق ماماندارى وتباسىن جوسپارلاۋ بولىمىندە ايەلدەرگە ءتيىستى كەڭەس بەرەدى. ءاربىر انا سول جەردەن وزىنە كەرەك اقپاراتتى الا الادى. بىلىكتى دارىگەرلەر ايەلدەردى تولعاندىرعان كەز كەلگەن سۇراقتارعا جاۋاپ بەرۋگە ءازىر. باس دارىگەردىڭ مالىمدەۋىنشە, انا مەن بالا دەنساۋلىعىن قورعاۋ مەملەكەتتىڭ دەنساۋلىق ساقتاۋ سالاسىنداعى باستى مىندەتى مەن ستراتەگياسى بولعاندىقتان, جەرگىلىكتى اكىمدىك تاراپىنان وسى ماسەلەگە ءاردايىم ەرەكشە كوڭىل بولىنەدى. سول سەبەپتى جەرگىلىكتى اتقارۋشى بيلىكتىڭ قولداۋىمەن قالاداعى پەرزەنتحانالاردىڭ ماتەريالدىق-تەحنيكالىق بازاسى جىلدان-جىلعا جاڭارتىلىپ كەلەدى. سونداي-اق ناۋقاستاردى ەمدەۋ, اۋرۋ بەلگىلەرىن ەرتە انىقتاۋ ماقساتىندا ەلىمىزدە جانە شەتەلدە تاجىريبەدەن وتكەن مەديتسينانىڭ زاماناۋي وزىق ۇلگىلەرى قولدانىلادى. قازىردە ەلدە دەموگرافيالىق كورسەتكىشتەردى جاقسارتۋ بويىنشا ناقتى جۇمىستار قولعا الىنا باستادى. انا مەن بالا دەنساۋلىعىن قورعاۋ سول جۇمىستاردىڭ باستى باعىتى سانالادى. سول ءۇشىن مەملەكەت قازىناسىنان الەۋمەتتىك سالاعا, ونىڭ ىشىندە دەنساۋلىق ساقتاۋ ىسىنە جىل سايىن مول قارجى بولىنەدى. انا مەن بالا دەنساۋلىعىن قورعاۋ ماسەلەسىندە قالالىق دەنساۋلىق ساقتاۋ باسقارماسى دا بەلسەندى جۇمىس ىستەپ وتىر.
جالپى, شىمكەنتتىڭ پەريناتالدىق ورتالىعى 2011 جىلى اشىلعان. بۇگىنگە دەيىن مۇندا 110 مىڭنان استام ايەل بوساندى. 27 مىڭنان استام ءتۇرلى دارەجەدەگى وپەراتسيا جاسالدى. ورتالىق باس دارىگەرىنىڭ ايتۋىنشا, بيىلعى جىلدىڭ العاشقى ەكى ايىندا مىڭ جارىمداي ايەل اتالعان پەرزەنتحانادا ومىرگە نارەستە اكەلدى. بۇل كۇندە پەريناتالدىق ورتالىقتا بەس جۇزگە جۋىق ادام ەڭبەك ەتەدى. سوندىقتان ول شاھارداعى ەڭ قىزمەتكەر سانى كوپ مەكەمەنىڭ قاتارىندا.
ء«بىزدىڭ مىندەتىمىز – ورتالىققا تۇسكەن ءاربىر انا مەن بالاعا قامقورلىق كورسەتىپ, ساپالى مەديتسينالىق كومەك الۋىنا جاعداي جاساۋ. ويتكەنى ولاردىڭ دەنساۋلىعى ءبىز ءۇشىن بارىنەن دە ماڭىزدى», دەدى پەريناتالدىق ورتالىقتىڭ باس دارىگەرى گۇلبانۋ جۇماعاليقىزى.
دارىگەرلەر كومەگىنە شەتەلدىكتەر ءجيى جۇگىنەدى
شىمكەنت قالالىق دەنساۋلىق ساقتاۋ باسقارماسىنىڭ مالىمەتىنشە, بيىل مەگاپوليس تۇرعىندارىنا امبۋلاتوريالىق-ەمحانالىق دەڭگەيدە 60 مەكەمە مەديتسينالىق كومەك كورسەتتى. سونداي-اق بۇگىنگى تاڭدا 14 مەملەكەتتىك ەمحاناعا 607 مىڭ, ال 46 جەكە ەمحاناعا 639 مىڭ ادام تىركەلگەن.
قالا تۇرعىندارىنا قادامدىق قولجەتىمدىلىكتى قامتاماسىز ەتۋ ماقساتىندا 2022–2024 جىلدار ارالىعىندا 14 ەمحانا اشىلىپ, ولاردىڭ ورتاشا جۇكتەمەسى 25 مىڭنان 20 مىڭعا ازايدى. اۋرۋحانالارداعى توسەكتىك ورىن سانى 2023 جىلى 4 393-تەن 2025 جىلى 4 894 توسەكتىك ورىنعا كوبەيدى, ياعني ءوسىم 10 %-دى قۇرادى. بيىلعى 6 ايلىق ەسەپ ىشىندە جوعارى تەحنولوگيالىق مەديتسينالىق كومەك كورسەتۋ اياسىندا 356 وپەراتسيا جاسالدى. ونىڭ ىشىندە, 3 جۇرەك, 10 بۇيرەك الماستىرىلدى. 2025 جىلدىڭ ءبىرىنشى جارتىجىلدىعىندا باعاسى قىمبات قىزمەتتەردەن كومپيۋتەرلىك توموگرافياعا 11 442, ماگنيتتىك-رەزونانستىق توموگرافياعا 14 273 ناۋقاس جۇگىندى.
بۇل رەتتە قالالىق №1 كلينيكالىق اۋرۋحاناسى – قالا تۇرعىندارى مەن قوناقتارىنا حيرۋرگيالىق, تراۆماتولوگيالىق, ۋرولوگيالىق, نەيروحيرۋرگيالىق, گينەكولوگيالىق, نەۆرولوگيالىق جانە تەراپەۆتىك بەيىندەگى تاۋلىك بويى شۇعىل جانە جوسپارلى مەديتسينالىق كومەك كورسەتەتىن بىردەن-ءبىر ستاتسيونار ەمدەۋ مەكەمەسى. قازىرگى ۋاقىتتا №1 قالالىق كلينيكالىق اۋرۋحاناسى 530 توسەكتىك ورىنمەن جابدىقتالعان. اۋرۋحانادا مەديتسينا عىلىمدارىنىڭ كانديداتتارى, جوعارى جانە ءبىرىنشى بىلىكتىلىك ساناتى بار دارىگەرلەر قىزمەت كورسەتەدى. ماماندار – الىس-جاقىن شەتەلدىك كلينيكالاردا وقىپ, ءبىلىمىن ارتتىرىپ كەلگەندەر. مەكەمە پاتسيەنتتەردى ەمدەۋ كەزىندە كوپتەگەن دياگنوستيكالىق جانە تاكتيكالىق ماسەلەلەردى شەشۋگە مۇمكىندىك بەرەتىن زاماناۋي قۇرالدارمەن جاراقتالعان. سونىمەن بىرگە اۋرۋحانا بازاسىندا جۇكتى جانە بوسانعان ايەلدەرگە حيرۋرگيالىق كومەك كورسەتەتىن ورتالىق جۇمىس ىستەيدى. ونىڭ جۇمىسىن رەتتەۋ ءۇشىن دەنساۋلىق ساقتاۋ باسقارماسى ارنايى بۇيرىق شىعارعان. كلينيكادا ءتۇرلى تەكسەرۋ جۇرگىزىلەدى. ماسەلەن, «اrkau innovation» انگيوگرافىندا ناۋقاس رەنتگەن ارقىلى تەكسەرىلەدى. بىلتىر كلينيكادا انگيوگرافيالىق وپەراتسيا جاساۋ بولمەسى اشىلعان بولاتىن. زاماناۋي مەديتسينالىق قۇرالدىڭ كومەگىمەن بۇگىندە دارىگەرلەر مي تامىرلارىنا, باس سۇيەگى ىسىگىنە وپەراتسيا جاساپ, قانشاما ناۋقاستىڭ العىسىنا بولەندى. دارىگەر ماماندار بەل جانە كەۋدە ومىرتقاسىنداعى وپەراتسيالار ترانسپەديكۋليارلىق جۇيەلەرمەن جانە كەيدجدەرمەن بەكىتىلەتىنىن ايتادى.
كۇردەلى وپەراتسيالارعا ماماندانعان
كلينيكادا اسقازان-ىشەك جولدارى ورگاندارىنا, قالپىنا كەلتىرۋ جانە رەكونسترۋكتيۆتى سيپاتتاعى وپەراتسيالار جاسالادى. وسى ورايدا تراۆماتولوگ-حيرۋرگتەر تىزە, جامباس بۋىندارىن پروتەزدەۋ بويىنشا كۇردەلى وپەراتسيا جاساۋدى ۇيرەندى. №1 قالالىق كلينيكالىق اۋرۋحانانىڭ دارىگەرلەرى جىل باسىنان بەرى ءمامس ەسەبىنەن 100-گە جۋىق ازاماتقا بۋىن اۋىستىرۋ وپەراتسياسىن جاسادى.
«زاقىمدالعان بۋىندى جاساندى يمپلانتقا اۋىستىرۋ بويىنشا كەشەندى وپەراتسيانىڭ قۇنى 1,5 ملن تەڭگەدەن اسادى. جاساندى بۋىن ۇزاق جىلعا جارامدى ءارى قاراپايىم بۋىننان ەش ايىرماشىلىعى بولمايدى. ءبىزدىڭ اۋرۋحانادا قولدانىلاتىن ەندوپروتەزدەر – اقش-تا جاسالعان ساپالى مەديتسينالىق ونىمدەر. بۋىن اۋىستىرۋ وپەراتسيالارى, ەڭ الدىمەن, اۋىرسىنۋدى جەڭىلدەتۋ ءۇشىن كەرەك. ەكىنشىدەن, پاتسيەنتتەر وڭالتۋ كەزەڭىنەن وتكەننەن كەيىن ەكى نەمەسە التى ايدان سوڭ كومەكشى قۇرالدار – بالداقتى پايدالانباي, بۇرىنعىداي ءجۇرىپ-تۇرا الادى» دەدى شىمكەنت قالالىق №1 كلينيكالىق اۋرۋحاناسىنىڭ باس دارىگەرى قايرات قاليبەكوۆ.
ماماننىڭ ايتۋىنشا, كلينيكادا ىشكى ورگانداردى الماستىرۋ وپەراتسياسى جاقسى جولعا قويىلعان. ءتىپتى بۇل كورسەتكىش بويىنشا اۋرۋحانا تەك شىمكەنت ەمەس, رەسپۋبليكا كولەمىندەگى ەڭ الدىڭعى مەديتسينالىق مەكەمەلەردىڭ قاتارىنا كىرەدى. ستاتيستيكاعا كوز جۇگىرتسەك, بۇگىنگە دەيىن مۇندا بۇيرەك ترانسپلانتاتسياسى بويىنشا 237 وپەراتسيا جاسالسا, 32 باۋىر الماستىرىلعان.
«اۋرۋحانادا بارلىق ستاندارتقا سايكەس كەلەتىن كەڭ قابىلداۋ بولمەسى بار. مۇندا ناۋقاستى ەشقايدا اپارۋدىڭ قاجەتى جوق. سەبەبى كلينيكادا قاجەتتىلىكتىڭ بارلىعى تۇگەل قاراستىرىلعان. اتاپ ايتقاندا, مەكەمەدە رەانيماتسيا زالدارى, جەدەل وپەراتسيالىق بولمە, ەندوسكوپيالىق قىزمەت, ۋلترادىبىستىق اپپاراتتار, جەدەل زەرتحانا, رەنتگەن, مرت, كت اپپاراتىنا تۇسىرەتىن بولمەلەر بار. سونىمەن قاتار پالاتالار دا سانيتارلىق-ەپيدەميالىق قىزمەتتىڭ نورماتيۆتىك تالاپتارىنا ساي جابدىقتالعان. ءارى ءبىزدىڭ كلينيكادا نەيروحيرۋرگيالىق, قان-تامىر حيرۋرگياسى, ورتوپەديالىق, ترانسپلانتولوگيالىق بەيىندەگى ونشاقتى جوعارى تەحنولوگيالىق مەديتسينالىق كومەك تۇرلەرى كورسەتىلەدى. جىل باسىنان بەرگى 6 ايدا 24 ناۋقاس وسىنداي جوعارى تەحنولوگيالىق مەديتسينالىق كومەكتىڭ ءتۇرىن الدى. تاعى جىل سوڭىنا دەيىن 38 ناۋقاسقا مەديتسينانىڭ ەڭ دامىعان تاسىلدەرى بويىنشا ەمدەۋ شاراسىن جۇرگىزەمىز. كلينيكالىق اۋرۋحانانىڭ ماتەريالدىق-تەحنيكالىق تۇرعىدان جاڭارتىلىپ, جاڭاشا ەمدەۋ ادىستەرىنىڭ تاجىريبەگە ەنۋىنە جانە مامانداردىڭ كاسىبي تۇرعىدان بىلىكتىلىكتەرىنىڭ جوعارىلاۋىنا ءبىرىنشى كەزەكتە قالالىق اكىمدىك مۇددەلى. سەبەبى №1 كلينيكالىق اۋرۋحانا – مەگاپوليستىڭ كوپ جىلدىق تاريحى بار, وزىندىك ءداستۇرى قالىپتاسقان ماڭدايالدى مەديتسينالىق ۇيىمدارىنىڭ ءبىرى. سول ءۇشىن دە جەرگىلىكتى اتقارۋشى بيلىك تاراپىنان كلينيكانىڭ دامۋىنا ارقاشان جوعارى دەڭگەيدە قولداۋ كورسەتىلىپ كەلەدى. بۇگىندە الەم كوز ىلەسپەس جىلدامدىقپەن دامىپ جاتىر. سونىڭ ىشىندە مەديتسينا سالاسى دا بار. كەيىنگى كەزدە اشىلعان تسيفرلىق تەحنولوگياداعى جاڭالىقتار مەديتسينا سالاسىندا دا كەڭىنەن قولدانىلا باستادى. وسىنىڭ ءبارىن ۋاقىت كوشىنەن قالماي يگەرۋ مەگاپوليس دارىگەرلەرىنىڭ بۇگىنگى باستى مىندەتى دەپ بىلەمىن», دەدى ق.قاليبەكوۆ.
شيپا ىزدەپ كەلەتىندەر كوبەيدى
الدا مەگاپوليستى جوعارى تەحنولوگيالىق مامانداندىرىلعان مەديتسينالىق قىزمەت ۇسىنا الاتىن ورتالىققا اينالدىرۋ ماقساتى تۇر. باستاما ءوز ناتيجەسىن بەرىپ تە كەلەدى. قازىردىڭ وزىندە جۇزدەن استام شەتەل ازاماتى جىل سايىن شىمكەنتكە دەرتىنە داۋا ىزدەپ كەلەدى دەيدى باس دارىگەر. ونىڭ ايتۋىنشا, بۇل كۇندە قالالىق №1 اۋرۋحانادا قىتاي, وزبەكستان, رەسەيدەن كەلگەن ناۋقاستارعا كۇردەلى وپەراتسيا جاسالىپ, ەمدەۋ-دياگنوستيكالىق تەكسەرۋلەر جۇرگىزىلەدى. كلينيكانىڭ قىزمەتىن پايدالانۋشى پاتسيەنتتەردىڭ ىشىندە رەسپۋبليكانىڭ ءار وڭىرىنەن كەلەتىن ازاماتتار دا كوپ. ستاتيستيكاعا سۇيەنسەك, كلينيكا ەلىمىزدىڭ تۇكپىر-تۇكپىرىنەن كەلگەن بەس جۇزدەن استام ناۋقاسقا مەديتسينالىق كومەك ۇسىنىپتى.
سونداي-اق شەكارا اسىپ شىمكەنتكە ەم ىزدەپ كەلگەندەردىڭ باسىم بولىگىنە قالالىق №2 اۋرۋحانادا كۇردەلى نەيروحيرۋرگيالىق وپەراتسيالار جاسالدى. ناۋقاستار – وزبەكستان, تاجىكستان, موڭعوليا, شۆەيتساريا سەكىلدى ەلدەردىڭ ازاماتتارى. ايتقانداي رەسەيدەن دە وسى كلينيكادا ەمدەلۋ ءۇشىن كوپ ناۋقاس كەلىپ جاتادى. اۋرۋحانانىڭ باس دارىگەرى باحىتجان پوزيلوۆ مۇنداعى وپەراتسيالار ەرەكشە كۇردەلى ساناتقا جاتاتىنىن, تاجىريبەلى دارىگەرلەردىڭ جوعارى كاسىبيلىگى مەن شەبەرلىگىنىڭ ارقاسىندا بارلىق وپەراتسيا ءساتتى جاسالاتىنىن ايتادى.
سونىمەن قاتار مەديتسينالىق ءتۋريزمدى دامىتۋعا شىمكەنت قالاسىنداعى دياگنوستيكالىق ورتالىق تا ۇلەس قوسىپ جاتىر. بۇل مەكەمە حالىققا امبۋلاتوريالىق-ەمحانالىق دەڭگەيدە دە قىزمەت كورسەتە الادى. جوعارى تەحنولوگيالىق قۇرال-جابدىقتارمەن جابدىقتالعان. قىزمەتكەرلەرىنىڭ كوپشىلىگى – تاجىريبەلى ءارى جوعارى بىلىكتى كاسىبي ماماندار. دياگنوستيكالىق ورتالىق جاڭا تەكسەرۋ اپپاراتتارىن ىسكە قوسۋ ارقىلى مامانداندىرىلعان مەديتسينالىق قىزمەت سالاسىن جاڭا دەڭگەيگە كوتەرىپ وتىر. سونداي-اق وندا حالىقارالىق زەرتحانالىق ISO قر ست 15-189 ستاندارتى ەنگىزىلگەن. ورتالىقتىڭ دياگنوستيكالىق تەكسەرۋىنەن ورتالىق ازيا, ەۋروپا, رەسەي, اقش ەلدەرىنىڭ دە ازاماتتارى ءوتىپ تۇرادى. بىلتىرعى ستاتيستيكانى قوسقاندا بۇگىنگە دەيىن جۇزگە جۋىق شەتەلدىك ناۋقاسقا مەديتسينالىق ۇيىم كونسۋلتاتيۆتىك-دياگنوستيكالىق, ونىڭ ىشىندە زەرتحانالىق, راديولوگيالىق, ەندوسكوپيالىق قىزمەت كورسەتكەن. اتالعان مەكەمەنىڭ باس دارىگەرى شولپان مىرزاحمەتوۆانىڭ ايتۋىنشا, كونسۋلتاتيۆتىك-دياگنوستيكالىق قىزمەتتەرگە جۇگىنەتىن شەتەلدىك ازاماتتاردىڭ سانى جىل سايىن 10-15 ادامعا ارتىپ كەلەدى ەكەن. «دياگنوستيكالىق ورتالىق مەديتسينالىق قىزمەت كورسەتۋدە زاماناۋي جوعارى تەحنولوگيالىق مرت, كت, ۆيدەوەندوسكوپيالىق جانە پرەميۋم ساناتتى ۋلترادىبىستىق اپپاراتتار سەكىلدى مەديتسينالىق قۇرال-جابدىقتارمەن تولىق قامتاماسىز ەتىلگەن» دەيدى باس دارىگەر.
مۇنان وزگە شاھاردا ورنالاسقان ايتۋلى كلينيكانىڭ ءبىرى – «شىمكەنت جۇرەك ورتالىعى» شەتەلدىك سەرىكتەستەرىمەن بىرگە ىنتىماقتاستىق كەلىسىمشارت جاساسىپ, مەديتسينالىق تۋريزم سالاسىندا بەلسەندى قىزمەت اتقارىپ كەلەدى. بۇل ەمدەۋ مەكەمەسى دە اقش, رەسەي, اۋعانستان, تاجىكستان ەلدەرىنىڭ جۇرەك-قان تامىرى اۋرۋىنا شيپا ىزدەگەن ازاماتتارىنا جوعارى تەحنولوگيالىق وپەراتسيا جاسادى.
قالالىق دەنساۋلىق ساقتاۋ باسقارماسى ماماندارىنىڭ ايتۋىنشا, وسى كۇندە مەگاپوليستە ساقتاندىرىلماعان ازاماتتاردىڭ ۇلەسىن تومەندەتۋ باعىتىندا اقپاراتتىق-ءتۇسىندىرۋ جۇمىستارى تۇراقتى تۇردە جۇرگىزىلىپ كەلەدى. سونىڭ اياسىندا مەديتسينا سالاسىنا جاۋاپتى قىزمەتكەرلەر ازاماتتارعا ءوز مارتەبەسىن تەكسەرۋ, جارنالارىن ۋاقتىلى تولەۋ بويىنشا كەڭەس بەرۋمەن شۇعىلدانىپ ءجۇر. باسقارما وكىلدەرىنىڭ مالىمدەۋىنشە, شىمكەنت قالاسىنىڭ تۇرعىندارىن مەديتسينالىق ۇيىمداردا تىركەۋ جانە قىزمەت الۋ راسىمدەرىن جەڭىلدەتۋ ءۇشىن قازىرگى تاڭدا ءتيىستى جۇمىس ءوز دەڭگەيىندە اتقارىلىپ جاتىر.
شىمكەنت
