قوعامنىڭ قوزعاۋشى كۇشى
ەل حالقىنىڭ ۇشتەن ءبىرىن قۇرايتىن جاستار – جاڭا يدەيالار مەن جاڭاشىلدىقتىڭ, شىعارماشىلىق پەن دامۋدىڭ قاينار كوزى. ولار زاماناۋي تەحنولوگيالاردى يگەرىپ, يننوۆاتسيالىق ستارتاپتار قۇرىپ, حالىقارالىق وليمپيادالاردا جەڭىسكە جەتىپ, ەكولوگيانى قورعاۋ مەن ەرىكتى قوزعالىستارعا بەلسەنە ارالاسىپ جاتىر. ۇكىمەت جاستار ساياساتىن ەل دامۋىنىڭ باسىم باعىتى رەتىندە بەلگىلەپ, ولاردىڭ ءبىلىم الۋىنا, كاسىبي وسۋىنە, مادەني جانە قوعامدىق ومىرگە بەلسەندى ارالاسۋىنا مۇمكىندىك بەرەتىن كەشەندى باعدارلامالاردى ىسكە اسىرىپ كەلەدى.
جاسامپاز جاس مامان
قازىرگى جاھاندانۋ داۋىرىندە ساپالى ءبىلىم جاس ادامنىڭ ەرتەڭگى كۇنىنىڭ جارقىن كەپىلى. ەلىمىزدە تەحنيكالىق جانە كاسىپتىك ءبىلىم بەرۋ جۇيەسى جاڭارتىلىپ, وقۋ مەن وندىرىستىك تاجىريبەنى ۇشتاستىراتىن قوسارلى باعدارلامالار ەنگىزىلىپ جاتىر. تسيفرلىق پلاتفورمالار ارقىلى زاماناۋي داعدىلاردى يگەرۋ مۇمكىندىگى كەڭەيىپ, حالىقارالىق ءبىلىم الماسۋ باعدارلامالارى مەن عىلىمي جوبالارعا قاتىساتىن جاستار قاتارى ارتىپ كەلەدى. «جاس مامان» جوباسى, گرانتتار, وقۋعا جەڭىلدىكپەن بەرىلەتىن كرەديتتەر جانە 2029 جىلعا دەيىنگى جاڭارتىلعان مەملەكەتتىك جاستار ساياساتى تۇجىرىمداماسى – جاس بۋىننىڭ كاسىبي جانە جەكە دامۋىنا جول اشاتىن ماڭىزدى قادامدار.
تابىستى ەڭبەككە تالپىنىس
مەملەكەت جاستاردىڭ ەڭبەك نارىعىندا ورنىعۋىنا باعىتتالعان بىرقاتار باعدارلامالاردى جۇزەگە اسىرىپ جاتىر. سونىڭ ىشىندە «ديپلوممەن – اۋىلعا» جوباسى اۋىلدىق ايماقتاردى بىلىكتى ماماندارمەن قامتاماسىز ەتسە, «جاستار پراكتيكاسى» مەن «العاشقى جۇمىس ورنى» باعدارلامالارى تاجىريبەسى جوق تۇلەكتەرگە العاشقى رەسمي جۇمىسقا ورنالاسۋ مۇمكىندىگىن بەرىپ وتىر. پرەزيدەنتتىك جاستار كادرلىق رەزەرۆى – ەل باسقارۋ ىسىنە جاڭا بۋىندى تارتۋعا جانە ولاردىڭ مەملەكەتتىك قۇرىلىمداردا باسشىلىق قىزمەتتەرگە جەتۋىنە جول اشاتىن ەرەكشە باستاما.
تۇرمىسقا ءتيىمدى تۇرعىن ءۇي
باسپانا – جاس وتباسىلار مەن جاس مامانداردىڭ نەگىزگى قاجەتتىلىگىنىڭ ءبىرى. پرەزيدەنت قاسىم-جومارت توقاەۆتىڭ تاپسىرماسىمەن «ناۋرىز» جانە «وتاۋ» جەڭىلدەتىلگەن تۇرعىن ءۇي باعدارلامالارى ىسكە اسىپ جاتىر. بۇل باستامالار ارقىلى مىڭداعان جاس ازامات تومەن پايىزدىق مولشەرلەمەمەن جانە قولايلى وتەۋ شارتتارىمەن باسپاناعا قول جەتكىزىپ, ءومىر ساپاسىن جاقسارتتى. سونىمەن قاتار, ەلىمىزدىڭ بارلىق وڭىرىندە ىسكە قوسىلعان جەڭىلدەتىلگەن يپوتەكالىق جوبالار ايماق جاستارىنا دا تەڭ مۇمكىندىك بەرىپ وتىر.
يگىلىككە باستايتىن يننوۆاتسيا
جاس كاسىپكەرلەردى قولداۋ ماقساتىندا مەملەكەت گرانتتىق بايقاۋلار, بيزنەس-ينكۋباتورلار, اكسەلەراتسيالىق باعدارلامالار جانە «تاۋەلسىزدىك ۇرپاقتارى» گرانتتارىن ۇسىنىپ وتىر. جاستاردىڭ بەلسەندىلىگى IT, اگروتەحنولوگيا, «جاسىل» ەنەرگەتيكا, كرەاتيۆتى يندۋستريا جانە الەۋمەتتىك كاسىپكەرلىك سالالارىندا ايقىن كورىنىپ كەلەدى. ولار حالىقارالىق نارىققا شىعىپ, شەتەلدىك ارىپتەستەرمەن بايلانىس ورناتىپ, ەل ەكونوميكاسىنا جاڭا سەرپىن بەرىپ جاتىر.
ەرىكتىلەر ەڭبەگى ەرەن
ەل جاستارى ەكولوگيالىق, مادەني جانە الەۋمەتتىك جوبالارعا بەلسەندى ارالاسىپ, ءوز ەركىمەن قوعامعا قىزمەت ەتۋ ءداستۇرىن قالىپتاستىرىپ جاتىر. مىسالى, «جاسىل ەل» ەڭبەك جاساقتارى جىل سايىن مىڭداعان جاسقا ۋاقىتشا جۇمىس پەن تاجىريبە الۋعا مۇمكىندىك بەرەدى. بۇل تەك كاسىبي داعدىلاردى دامىتۋ عانا ەمەس, سونىمەن بىرگە وتانسۇيگىشتىك پەن جاۋاپكەرشىلىكتى نىعايتۋعا باعىتتالعان قادام.
جاھاندىق ارەناداعى جاستار
حالىقارالىق فورۋمدار, مادەني الماسۋ باعدارلامالارى جانە ءبىلىم جوبالارى ارقىلى قازاقستاندىق جاستار جاھاندىق تاجىريبە جيناپ, شەتەلدىك ارىپتەستەرىمەن بايلانىس ورناتىپ جاتىر. الماتىنىڭ 2025 جىلعى تمۇ جاستار استاناسى اتانۋى – ەلىمىزدىڭ جاستار ساياساتىن دامىتۋداعى جەتىستىگىنىڭ حالىقارالىق دەڭگەيدە مويىندالۋى.
جۇمىسشى ماماندىقتار جىلى – جاڭا مۇمكىندىك
2025 جىل ەلىمىزدە جۇمىسشى ماماندىقتار جىلى دەپ جاريالاندى. بۇل – ونەركاسىپ, قۇرىلىس, ەنەرگەتيكا, كولىك جانە IT سالالارىندا بىلىكتى كادرلاردى دايارلاۋدى كۇشەيتۋگە باعىتتالعان قادام. دۋالدى وقىتۋ جۇيەسى, زاماناۋي وقۋ-وندىرىستىك ورتالىقتار جانە كاسىپتىك باعدار بەرۋ ءىس-شارالارى جاستاردى ەڭبەك نارىعىندا سۇرانىسقا يە مامان بولۋعا ىنتالاندىرىپ جاتىر.
ينستيتۋتسيونالدىق تەتىكتەر
ەلىمىزدە 234 جاستار رەسۋرستىق ورتالىعى جۇمىس ىستەپ, ايماقتاردا جاستار باستامالارىن قولداپ كەلەدى. اكىمدىكتەر جانىنداعى جاستار ىستەرى جونىندەگى كەڭەستەر كەڭەسشى ورگان رەتىندە بەلسەندى جۇمىس ىستەيدى. ال «جاستار» عىلىمي-زەرتتەۋ ورتالىعى سالاداعى زەرتتەۋ مەن تالداۋ جۇمىستارىن ۇيلەستىرىپ, جىل سايىن «قازاقستان جاستارى» ۇلتتىق بايانداماسىن جاريالايدى.
سونىمەن, حالىقارالىق جاستار كۇنى – بۇل وتكەندى باعامداپ, كەلەشەكتى باعدارلايتىن تانىمدىق مەرەكە. ءبىلىمدى, بەلسەندى جانە باستاماشىل جاستار – ەلىمىزدىڭ ەڭ ۇلكەن بايلىعى. ولار جاڭا قازاقستاندى قالىپتاستىرۋدا الدىڭعى قاتاردا بولىپ, ەل دامۋىنا جاڭا تىنىس بەرەدى.
