مەرەكە مەرەيىن وسىرگەن مادەني شارالار

قالا كۇنى – قالىڭ جۇرتشىلىقتىڭ كوڭىلىنەن شىعىپ كەلە جاتقان ەلىمىزدەگى مەرەيلى مەملەكەتتىك مەرەكەلەردىڭ ءبىرى. بيىل ەلوردا كۇنىنە وراي «ەل جۇرەگى – استانا!» لەيتموتيۆىمەن 70-تەن استام شارا وتەدى. بارلىق شارالار ورتاق ءبىر تاقىرىپپەن توپتاستىرىلىپ وتكىزىلەدى. مەرەكەنىڭ باستى تاقىرىبى قازاق حاندىعىنىڭ 550 جىلدىعىنا, قازاقستان حالقى اسسامبلەياسىنىڭ 20 جىلدىعىنا ارنالادى. – وسى جىلى «ەل جۇرەگى – استانا!» لەيتموتيۆىمەن 70 شارا ۇيىم­داستى­رىلادى. سالتاناتتى شارامەن 500 مىڭنان استام استانالىقتار مەن قالا قوناقتارىن قامتۋ قاراستىرىلعان. وسى جىلعى مەرەكەنىڭ ەرەكشەلىگى شارالاردىڭ بارلىعى اشىق الاڭدا وتەدى, – دەدى استانا قالاسى مادەنيەت باسقارماسىنىڭ باسشىسى بولات ماجاعۇلوۆ ورتالىق كوممۋنيكاتسيالار قىزمەتىندە وتكىزىلگەن ءباسپاسوز ءماسليحاتىندا. ەلوردا كۇنىن رەسمي مەرەكەلەۋ 4 شىلدەدە مەملەكەتتىك تۋدى سالتاناتتى كوتەرۋ راسىمىنەن باستالادى. مەرەكەلىك شارالار ءداستۇر بويىنشا سالتاناتتى وتشاشۋمەن اياقتالادى. ونى قالانىڭ بىرنەشە بولىگىنەن, اتاپ ايتقاندا, ەسىل وزەنىنىڭ جاعاسىنان, «حان شاتىر» ساۋدا-ويىن-ساۋىق ورتالىعى الاڭىنان جانە ابىلاي حان داڭعىلى مەن پۋشكين كوشەسىنىڭ قيىلىسىنداعى ساياباقتان كورۋگە بولادى. – قالا كۇنى مەرەكەسى اياسىندا گول­ليۆۋد جۇلدىزى ستيۆەن سيگال, اكتەر, كاسىبي سپورتشى, «بوكس الەمى», «قاھار­ماندار ەلى» تەلەجوباسىنىڭ جۇرگىزۋشىسى سەرگەي باديۋك, سونداي-اق, كاسىپقويلار اراسىندا كيكبوكسينگتەن قازىرگى چەمپيون باتۋ حاسيكوۆتىڭ قاتىسۋىمەن ەلوردادا جەكپە-جەكتەر ونەرىنىڭ ءبىرىنشى حالىقارالىق فەستيۆالى وتكىزىلەدى, – دەپ مالىمدەدى جۋناليستەرمەن بولعان جۇزدەسۋدە ب.ماجاعۇلوۆ. ۇيىمداستىرۋشىلاردىڭ اقپارا­تىنشا, فەستيۆالعا اقش, قازاقستان, قىتاي, رەسەي, چەحيا, وڭتۇستىك كورەيا جانە جاپونيا ەلدەرىنەن وزدەرى قاتى­ساتىن جەكپە-جەك تۇرلەرىنىڭ ۇزدىك شەبەر­لەرى جانە ەڭ جوعارى بەلبەۋلەر مەن دانداردىڭ يەلەرى قاتىسادى. بۇل جولى – ايكيدو, دجيۋ-دجيتسۋ, كاپوەيرا, بۋدزينكان, تاي بوكسى, كاراتە گودزيۋ-ريۋ, شين كالي, كەندو, تاەكۆوندو, ۆين-چۋن, شاولين جانە قول جەكپە-جەگى سياقتى 12 ءتارتىپ ءتۇرى بويىنشا كورنەكى جەكپە-جەكتەردى وتكىزۋ جوسپارلانعان. جەكپە-جەكتەر ونەرىنىڭ فەستيۆالى 26 ماۋسىم كۇنى استاناداعى «داۋلەت» ۇلتتىق تەننيس ورتالىعىندا وتەدى. سونىمەن بىرگە, بيىلعى مەرەكەدە ەسىل وزەنىنىڭ جاعاسىندا تۇڭعىش رەت «نۇرلى ەسىل» اتتى مۋلتيمەديالىق-پيروتەحنيكالىق تاڭعاجايىپ شوۋ ۇيىم­داستىرىلادى. بۇل زامانۋي لازەرلىك جانە پيروتەحنيكالىق تەحنولوگيالاردى سۋ بەتىندە ويناتاتىن ايرىقشا كورىنىس بولماق. مۇنىمەن قوسا, وزەندە سيمفونيالىق وركەسترگە ارنالعان ساحنا ورناتىلادى, بۇل شوۋدىڭ اسەرىن ارتتىرا تۇسەدى. وركەستر قازاقتىڭ حالىق اندەرى مەن زاماناۋي كلاسسيكالىق اۋەندەردى ورىندايدى. ساحنانىڭ اينالاسىنا بيىكتىگى ءارتۇرلى سۋبۇرقاقتار سالتانات قۇرادى, جاڭا لازەرلىك تەحنولوگيالاردىڭ كومەگىمەن جارقىن بەينەروليكتەر كورسەتىلەدى. بۇل كورىنىستىڭ سوڭى ەسترادالىق-سيمفونيالىق وركەستردىڭ سۇيەمەلدەۋىمەن كوز جاۋىن الاتىن تاڭعاجايىپ پيرو­تەحنيكالىق شوۋعا ۇلاسادى.