قالا تۇرعىندارى مەن قوناقتارى جۇگىرۋ فەستيۆالىن 6.20-دا ەكسپو اۋماعىنداعى تاۋەلسىزدىكتىڭ 25 جىلدىعىنا ارنالعان مونۋمەنت جانىنان باستادى. وندا الدىمەن فەستيۆالدىڭ ۇيىمداستىرۋشىلارى Heart Center Foundation قوعامدىق قورى ىنتىماقتاستىق تۋرالى مەموراندۋم اياسىندا رەسپۋبليكالىق ترانسپلانتاتسيانى ۇيلەستىرۋ ورتالىعىنا 15 ملن تەڭگە كولەمىندە گرانت تابىستادى.
رەسمي دەرەك بويىنشا قازىر ەلىمىزدە جۇرەك, بۇيرەك, باۋىر جانە وكپە ترانسپلانتاتسياسىنا 4 117 ادام مۇقتاج. ونىڭ ىشىندە 3 مىڭنان استامى – بۇيرەك, 145-ءى – جۇرەك اۋىستىراتىن ۋاقىتتى كۇتىپ ءجۇر. وكىنىشكە قاراي, جىل سايىن 300-دەن استام ادام ءوز دونورىن تابا الماي, كۇتۋ پاراعىنان شىعىپ قالادى. جۇگىرۋگە كەلگەن ءار قاتىسۋشى وسى دەرەكتەردەن قۇلاعدار بولىپ, 1كم, 3 كم نەمەسە 10 كم قاشىقتىقتى باعىندىرۋعا بەل شەشتى.
قوردىڭ نەگىزىن قالاۋشى جانە UMC باسقارما توراعاسى, بەلدى دارىگەر يۋري پيا جوباعا قولداۋ ءبىلدىرىپ كەلگەن كوپشىلىككە العىس ايتتى. ترانسپلانتاتسيانى ناسيحاتتاۋ ارقىلى قاعامدا دونورلىق تۋرالى دۇرىس تۇسىنىك قالىپتاستىرۋعا بولاتىنىن جەتكىزدى.
ء«بىزدىڭ ەلىمىز – ورتالىق ازيادا ترانسپلانتاتسيا مەن ولىمنەن كەيىنگى دونورلىق دامىعان جالعىز مەملەكەت. بۇل – ەلىمىزدىڭ دامۋ دەڭگەيىنىڭ كورسەتكىشتەرىنىڭ ءبىرى. العاشقى جۇرەك ترانسپلانتاتسياسى جاسالعانىنا تۋرا 13 جىل تولدى. سودان بەرى وپەراتسيا سانى ايتارلىقتاي ارتتى. Juregimnin Jenimpazy جوباسى قوعامدا دونورلىق تۋرالى تۇسىنىكتى قالىپتاستىرۋ ءۇشىن وتكىزىلەدى. دەمەك, وسىنداي ءىس-شارالار ارقىلى دونورلىقتى ناسيحاتتاۋ ءبىزدىڭ مىندەتىمىز»,– دەدى قوردىڭ نەگىزىن قالاۋشى جانە UMC باسقارما توراعاسى, دارىگەر يۋري پيا.
يۋري پيانىڭ جەتەكشىلىگىمەن ەلىمىزدەگى دارىگەرلەر وسى كۇنگە دەيىن 104 ترانسپلانتاتسيا جاساعان. بىلسەڭىزدەر, ول – 2012 جىلى ەلىمىزدە العاش جۇرەك ترانسپلانتاتسياسىن جاساعان كارديوحيرۋرگ. دارىگەر UMC جۇرەك ورتالىعىنان كەلگەن ءبىر توپ مەديتسينا قىزمەتكەرىن باستاپ, ۇجىم بوپ 1 شاقىرىم قاشىقتىقتى ەڭسەردى.
قوعامدىق قور ديرەكتورى مۇرات زاۋىروۆ جۇگىرۋدىڭ باس دەمەۋشىسىنەن جانە قاتىسۋشىلاردىڭ تىركەۋ جارناسىنان تۇسكەن قاراجات جىلداعى ادەپپەن رەسپۋبليكالىق ترانسپلانتاتسيانى ۇيلەستىرۋ ورتالىعىنا جانە قوردىڭ ءبىلىم بەرۋ جانە اعارتۋ جوبالارىنا باعىتتالاتىنىن ايتتى.
ء«بىز فەستيۆالدى جىل سايىن وتكىزىپ ءجۇرمىز. سوندا قوعامنىڭ ترانسپلانتولوگيانى دامىتۋدىڭ ماڭىزىن تۇسىنەتىنىن بايقايمىز. بيىل وتكەن جىلمەن سالىستىرعاندا 500 ادامعا ارتىق جيىلدىق. ءبىزدىڭ ماقساتىمىز – وسى تاقىرىپتاعى اقپاراتتىق ۆاكۋمدى جويۋ. ول ءبىزدىڭ قولىمىزدان كەلدى دەپ ەسەپتەيمىن. بۇدان بولەك, ىنتىماقتاستىق تۋرالى مەموراندۋم اياسىندا قور رەسپۋبليكالىق ترانسپلانتاتسيانى ۇيلەستىرۋ ورتالىعىنا 15 ملن تەڭگە گرانت بەردى»,– دەدى م.زاۋىروۆ ءسوزىن تۇيىندەپ.
نەگىزى اۋقىمدى ءىس-شارا الدىندا جۇگىرۋگە دايىندىق جۇرگىزىلگەن. بوتانيكالىق باقتاعى «سىي» ينستاللياتسياسى جانىندا ەكى اي تەگىن جاتتىعۋ ۇيىمداستىرىلىپتى. وعان شامامەن مىڭعا جۋىق ادام قاتىسقان. تۇيىندەي كەلە فەستيۆالدى شاعىن جانە ءىرى كاسىپكەرلەر, ەكىنشى دەڭگەيلى بانكتەر قولداعانىن ايتا كەتەلىك.
