مەملەكەت باسشىسى قۇتتىقتاۋىندا ابايدىڭ الەمدىك دەڭگەيدەگى عۇلاما ەكەنىنە جانە ونىڭ رۋحاني مۇراسىنىڭ كەلەر ۇرپاق ءۇشىن دە وزەكتىلىگىن ساقتايتىنىنا نازار اۋداردى.
– اباي – ءتول مادەنيەتىمىزدى دامىتۋعا ولشەۋسىز ۇلەس قوسقان كەمەڭگەر تۇلعا, حالقىمىزدىڭ سانا-سەزىمىن جاڭعىرتقان ۇلى اقىن. ول جاڭا ادەبيەتىمىزدىڭ نەگىزىن قالاپ, دۇنيەتانىمىمىزدىڭ كوكجيەگىن كەڭەيتتى. وسكەلەڭ ۇرپاقتى ءبىلىمپاز, ەڭبەكقور, ادال ازامات بولۋعا شاقىرىپ, ۇلتتىڭ جاڭا ساپاسىن قالىپتاستىراتىن قاسيەتتەردى دارىپتەدى. حاكىم ابايدىڭ مول مۇراسى – قازاق حالقىنىڭ عانا ەمەس, بارشا ادامزاتتىڭ اسىل قازىناسى. ونىڭ وي-تولعامدارى مەن وسيەتتەرىنىڭ وزەكتىلىگى ەشقاشان جوعالمايدى. سوندىقتان ابايدى تانۋ جانە تانىتۋ, شىعارماشىلىعىن تەرەڭ زەردەلەۋ – اسا ماڭىزدى, – دەلىنگەن پرەزيدەنتتىڭ قۇتتىقتاۋىندا.
سەنات توراعاسى ءوز سوزىندە مەملەكەت باسشىسىنىڭ باستاماسىمەن اباي مۇراسىنىڭ ەلىمىزدە عانا ەمەس, حالىقارالىق دەڭگەيدە دە كەڭىنەن ناسيحاتتالىپ جاتقانىن اتاپ ءوتتى. ونىڭ ايتۋىنشا, 10 تامىزدىڭ رەسمي تۇردە اباي كۇنى بولىپ بەكىتىلۋى, اقىن شىعارمالارىنىڭ الەمنىڭ نەگىزگى تىلدەرىنە اۋدارىلۋى جانە الماتىدا اباي ۇلتتىق مەكتەبىنىڭ سالىنۋى – ۇلى ويشىلدى ۇلىقتاۋداعى ماڭىزدى قادامدار. سونداي-اق, «تولىق ادام» تۇجىرىمداماسىنىڭ قازىرگى مەملەكەتتىك ساياساتپەن ۇندەس ەكەنىن جەتكىزدى.
– مۇنداي ءىس-شارالاردى ابايعا تاعزىم ەتۋ عانا ەمەس, ونىڭ ويلارىن زاماناۋي تۇرعىدا جاڭاشا ءتۇسىنىپ, ومىردە جۇزەگە اسىرۋعا جاڭا مۇمكىندىك دەپ قابىلدايمىز, – دەدى ماۋلەن اشىمباەۆ.
مەرەيتوي اياسىندا حالىقارالىق, رەسپۋبليكالىق جانە وڭىرلىك دەڭگەيدە 100-دەن استام ءىس-شارا ءوتىپ جاتىر. ولاردىڭ قاتارىندا ايتىس, ۇلتتىق ونەر فەستيۆالى جانە باسقا دا ءىرى جوبالار بار. سونداي-اق, «ABAY ACADEMIYASY» العاشقى ەنتسيكلوپەديالىق پورتالى ىسكە قوسىلىپ, سەمەيدە ينكليۋزيۆتى كىتاپحانا اشىلدى.
وڭىرگە ساپارى بارىسىندا سەنات توراعاسى اباي مەن شاكارىمنىڭ كەسەنەلەرىن زيارات ەتىپ, قاراۋىل اۋىلىنداعى اقىن ەسكەرتكىشىنە گۇل شوعىن قويدى.
ابايدىڭ 180 جىلدىق مەرەيتويى ۇلتتىق دەڭگەيدەگى مادەني وقيعاعا اينالدى. وعان 15 ەلدەن كەلگەن دەلەگاتسيالار, زيالى قاۋىم وكىلدەرى, جاستار مەن قوعام قايراتكەرلەرى, بارلىعى 30 مىڭنان استام ادام قاتىستى.
